معضلتي مع البنات و الدراسة..

[LeLou]

بسم الله الرحمن الرحيم..

السلام عليكم و رحمة الله و بركاته..

أول حاجة كيف اختباراتكم إن شاء الله كلها تمام و ماشية على خير؟!

أنا من زمان ليا عن الساحة و اليوم في موضوع منرفزني و ودي اتناقش فيه مع أحد..

معضلتي مع البنات و الدراسة..

أنا شخصيًا مع استمرار حياتي الدراسية جالسة أكره البنات أكثر و أكثر..
أنا ما أبغى أعمم لأنه الشي دا غلط و في فعلاً بنات محترمات و كويسات و نواياهم طيبة و كل حاجة..بس الفئة إللي أبغى أتكلم عنها اليوم و من الآخر كدا الناس الاستغلالية..

أنا شخصيًا – و أعوذ بالله من كلمة أنا - من النوع إللي أركز في المحاضرة مع الدكتورة و من النوع إللي أعتمد 70 في المية في مذاكرتي و حلي على اللي آخذه في المحاضرة..
و من النوع إللي بصراحة ما أرد أي أحد يسألني لأنه عندي قناعة أنه العلم مو حق أحد و أنا مو من حقي أمنع العلم عن أحد..
فتجي بعض ناس تستغل دا الشي،، أنا أعرف العينة دي من بعيد لأنها مرت عليا كثير لكن في بعضهم استغلاليين علنًا جهرًا و بعين قوية..

يعني زي مثلاً واحد بنت مرة سألتني:" راح تاخذي معادلات تفاضلية السيميستر الجاي" قلت:" إن شاء الله أكيد و ما راح أءخرها"
قامت تخيلوا أيش ردت:" إيوا أحسن خذيها عشان احنا ناخذها بعدك و تشرحي لنا هي"
سلامات من متى اتعينت مدرسة خصوصية من غير راتب ؟!
المصيبة أنه أنا ليا معاها سيميستر واحد و دا الثاني يعني حتى الميانة ما لحقت تطيح خصوصًا أني مو مرة محتكة مع بنات القسم ..
أحس شوية و يقولوا لي تعالي اختبري بدالنا ..
طبعًا هذا واحد من المواقف إللي باتعرض لها باستمرار..

أنا ما أمانع لما الواحدة تكون ماهي فاهمة و تسالني،، غابت لظروف و تسألني،، لكن يستهتروا و ما يهتموا معتمدين أنه في واحدة يسألوها؟!
سحب على المحاضرات من غير سبب وجيه و هما في الجامعة،، غيابات،، هروب من المحاضرات كمان و ضحك عالدكاترة..
طيب تبغي تسوي كدا اتحملي نتائج أفعالك إنتي كان بإمكانك إنك توفري على نفسك دا كله<< رأيي الشخصي في الناس دي ..

طبعًا الموضوع دا ازداد مؤخرًا بسبب فترة الاختبارات،، بصراحة أنا مرة جاني غثيان من دا الموضوع ..
أنا تخصصي فيزياء،، و التخصص مو سهل أبدًا و يبغاله شد حيل و مخ مفتح،، و طبعًا هذا الشي مو موجود إلا من رحم ربي ..

فكيف ممكن أتعامل مع الناس هذي و أخلص منها؟!
مشكلتي أني ما أحب أدي أحد على وجهه،، و ما أحب أكون وقحة حتى لو كان إللي قدامي وقح..
فأيش الحل؟!

أنتظر اقتراحات و نقاشات حضرات أعضاء مجلس الكواكب الأعلى<< مقتبستها من حكاية لعبة..
دمتم بود||~

[الإمبراطورة]

موضوع ع الوتر..
كلنآ بنعآني من النآس المُستغلّة

::

أنآ أشوف انو مبدأ العون والمُسآعدة.. شي جميل
خصوصآ إذآ كآن التعآون متبآدل.. إذآ احتجتيهم يسآعدونك بلآ تردد


بس الوضع إذآ زآد عن حدّهـ مُشكلة .. لآ تعطينهم وجه بزيآدة
إذآ يبغوآ يصوروآ منك أورآق /دفتر المحآضرآت.. مو مشكلة ..انتي مو خسرآنة ;)
أمآ انك تشرحين لهم وكذآ ! على حسب إذآ عندك اختبآرآت أو مشغولة .. فـ اعتذري منهمْ .. انتِ مو ملزمة أبدآ ..
إذآ عندك وقت ومو فآرقة معآكِ .. فـ سآعديهم .. أيش المُشكلة ؟




احتسبي الأجر في كل تعآملآتك..
وربي لآ يضيّع لكِ تعب..

[LeLou]

المشاركة الأصلية كتبت بواسطة الإمبراطورة موضوع ع الوتر.. كلنآ بنعآني من النآس المُستغلّة :: أنآ أشوف انو مبدأ العون والمُسآعدة.. شي جميل خصوصآ إذآ كآن التعآون متبآدل.. إذآ احتجتيهم يسآعدونك بلآ تردد بس الوضع إذآ زآد عن حدّهـ مُشكلة .. لآ تعطينهم وجه بزيآدة إذآ يبغوآ يصوروآ منك أورآق /دفتر المحآضرآت.. مو مشكلة ..انتي مو خسرآنة ;) أمآ انك تشرحين لهم وكذآ ! على حسب إذآ عندك اختبآرآت أو مشغولة .. فـ اعتذري منهمْ .. انتِ مو ملزمة أبدآ .. إذآ عندك وقت ومو فآرقة معآكِ .. فـ سآعديهم .. أيش المُشكلة ؟ احتسبي الأجر في كل تعآملآتك.. وربي لآ يضيّع لكِ تعب..

ما هو المشكلة أنه الواحد كان يقول عون و مساعدة و من فرج عن مسلم كربة من كرب الدنيا فرج الله عنه بها كربة من كرب يوم القيامة..

لكن ليش كدا يعني عشان كانوا لما يسألوني أجاوبهم و أساعدهم صاروا حتى ما يحاولوا كل شي يجوني فيه..
أنا كمان بأذاكر زيي زيهم و باختبر نفس المادة و في نفس القاعة زيي زيهم..

و يا ليتهم يطلبوا الأوراق و بس..
مرة كان عندنا اختبار معمل يوم الأربعاء،، و اتصلت عليا بنت يوم الثلاثاء الساعة 9 و نص في الليل..
حطي تحت كلمة أنا أكون نايمة في دا الوقت 50 خط..
تقول لي كلمي لي صاحباتك إللي اختبروا في الشعب إللي قبل تجيب لي أوراقها..
صحي النوم،، توك اللي تفتكري،، يعني مو بس تطلب مني إلا تخليني أتصل على الناس في الليل و أطلب منهم..
ليش ما تاخذ ملزمتي و تصورها و أنا طول الأسبوع قدامها،، و من الأساس ليش ما كانت تحضر و تكتب مع الاستاذة..
كانت تدخل المعمل و تقول للاستاذة ممكن أروح دورة المياه و تروح و ما ترجع،، و الاستاذة كانت تكتب كل شي عالسبورة و احنا ننقل منها..

أنا هذا إللي ينرفزني..
الله المستعان بس..

يعطيك ِ العافية عالمرور الجميل إمبراطورة||~

المشاركة الأصلية كتبت بواسطة ~*~ ملكة الليل ~*~ بإختصآآآآآآآآآآر تساعدي وبحدوود وبسبب طبعاا كغياب او مرض او سبب قوي اما استهتاار ومن دا الكلام لآ ,,, ماتعطيهم وجه آصلآ تحياتي لكي

ما هو الموضوع بدأ كدا بعدين هما اتجاوزوا الحدود..
معاكي حق،، و شكرًا لمرورك||~

المشاركة الأصلية كتبت بواسطة المشتاقه لخالقها الحل إنك ماتعطينهم وجة ابد وتكوووون شخصيتك قوووية .... مثال: الباب اللي يجيك منو الريح سدو واستريح إذا سئلتك عن شئ قوليلها مدررررررررري مدام إنك ماتحبن تعطينها على وجهها هيا بتفهمها زيييين الله يووووووفقك خيتو وبالله التوفيق

المشكلة أنا ما أحب الكذب كمان..
عمومًا أنا صرت أرد عليهم بطريقة جافة شوية مو زي أول..
المشكلة الناس ما تعرف المثل القائل إذا كان حبيبك عسل لا تاكله كله..

شكرًا على مرورك،، و موفقة يا رب،، و الله يعيننا على دي الناس||~

[~*~ ملكة الليل ~*~]

بإختصآآآآآآآآآآر

تساعدي وبحدوود وبسبب طبعاا كغياب او مرض او سبب قوي

اما استهتاار ومن دا الكلام لآ ,,, ماتعطيهم وجه آصلآ

تحياتي لكي

[المشتاقه لخالقها]

المشاركة الأصلية كتبت بواسطة lelou أنا شخصيًا – و أعوذ بالله من كلمة أنا - من النوع إللي أركز في المحاضرة مع الدكتورة و من النوع إللي أعتمد 70 في المية في مذاكرتي و حلي على اللي آخذه في المحاضرة.. زيك بالتمام 100% اعتمد على شرح الأستاذة 70% وبصراحة دايم احب اجلس بعيد عن الناس اللي اعرفهم اللي بس تحب تهرج وتضحك وتستهتر فالمحاضرة أنا ما أمانع لما الواحدة تكون ماهي فاهمة و تسالني،، غابت لظروف و تسألني،، لكن يستهتروا و ما يهتموا معتمدين أنه في واحدة يسألوها؟! سحب على المحاضرات من غير سبب وجيه و هما في الجامعة،، غيابات،، هروب من المحاضرات كمان و ضحك عالدكاترة.. طيب تبغي تسوي كدا اتحملي نتائج أفعالك إنتي كان بإمكانك إنك توفري على نفسك دا كله<< رأيي الشخصي في الناس دي .. اكيييييد تتحمل نتيجة اللي تسوويه بنااااات مستهترات بجد فكيف ممكن أتعامل مع الناس هذي و أخلص منها؟! مشكلتي أني ما أحب أدي أحد على وجهه،، و ما أحب أكون وقحة حتى لو كان إللي قدامي وقح.. فأيش الحل؟!

الحل إنك ماتعطينهم وجة ابد وتكوووون شخصيتك قوووية ....

مثال: الباب اللي يجيك منو الريح سدو واستريح

إذا سئلتك عن شئ قوليلها مدررررررررري

مدام إنك ماتحبن تعطينها على وجهها هيا بتفهمها زيييين

الله يووووووفقك خيتو

وبالله التوفيق

[rubi]

عادي لاتشيلي هم وضحيلها انك ماعندك وقت تشرحي لانو رضاها عليكي غير مهم

كمان قولي انك ماتعرفي يعني مو اي احد صراحة عندو قدرة توصيل المعلومة فا ببساطة قولي كدا

عموما بالحركات وكل شي وضحي انك مو قريبة منها وانو في حدود بينكم

ازا زودتها مرررة عاد تستاهل الكلام اللي عالوجه بالصريح

[LeLou]

المشاركة الأصلية كتبت بواسطة rubi عادي لاتشيلي هم وضحيلها انك ماعندك وقت تشرحي لانو رضاها عليكي غير مهم كمان قولي انك ماتعرفي يعني مو اي احد صراحة عندو قدرة توصيل المعلومة فا ببساطة قولي كدا عموما بالحركات وكل شي وضحي انك مو قريبة منها وانو في حدود بينكم ازا زودتها مرررة عاد تستاهل الكلام اللي عالوجه بالصريح

إنت ِ تووحفة يا عسل..

المشكلة هما كانوا يسألوني و أنا كنت أجاوبهم فصعب دحين أقول لهم أنا ما أعرف أوصل لأنهم كانوا يفهموا..
هو احنا نفس الدفعة و الدفعة مرة قليلة أقل من 20 فعلى الأغلب حنكون مع بعض الين التخرج..
و عمومًا طالبات قسمنا مرة قليل..

فهما حسبوا أنه احنا قريبين من بعض رغم اني من زمان مو محتكة معاهم كثير و في أوقات الفراغ دايمًا أجلس مع صحباتي القدامى في التخصصات الأخرى..

و أنا أصلا بديت أدي عالوجه شوية..
يعطيكي العافية و موفقة يا عسل||~

[мαѕooяy]

هلآ هلآ لولتي حبيبي ،، وحشتيني ..
،
حبيبي بالنسبة لموضوعك ، .. مثلك انا اوجه كثير آسئلة زي كدآ
لكن مآدري تعودت أو يعني ، آخدها بروح رياضيه اشرح حسب ماقدر ،،
بس بما انو مضايقك الموضوع ،
انتى ماشاء الله عليكِ آعرفكـ عندك اسلوب راقي بالكلام ،
فعادي ، صارحيهـآ آنوآ والله ماقدر أو أي حاجة تبينلهم أنوآ ماعندك القدرة
للشرح لهم ،
وصدقيني مارح يرجعولك ،
،

،
،
ربي يسعدكـ ،

[LeLou]

المشاركة الأصلية كتبت بواسطة мαѕooяy هلآ هلآ لولتي حبيبي ،، وحشتيني .. ، حبيبي بالنسبة لموضوعك ، .. مثلك انا اوجه كثير آسئلة زي كدآ لكن مآدري تعودت أو يعني ، آخدها بروح رياضيه اشرح حسب ماقدر ،، بس بما انو مضايقك الموضوع ، انتى ماشاء الله عليكِ آعرفكـ عندك اسلوب راقي بالكلام ، فعادي ، صارحيهـآ آنوآ والله ماقدر أو أي حاجة تبينلهم أنوآ ماعندك القدرة للشرح لهم ، وصدقيني مارح يرجعولك ، ، ، ، ربي يسعدكـ ،

هلا ميسو إزيك يا عسل..
كيفك و كيف اختباراتك؟!
//

أنا عارفة إنتي عندك نفس دي المأساة..
و بصراحة أنا برضو عادي و آخذ بروح رياضية..
بس مو لدرجة أنهم ما يحاولوا و يستهتروا معتمدين أني أشرح لهم..

زي اللي تقول لي خذي المادة و احنا بعدك و اشرحي لنا..
يعني من غير ما حتى تاخذ المادة و تشوف حتفهمها و لا لآ..
و غيرها كثير..
أنا أشوفهم مرة اتجاوزوا حدودهم..

تخيلي وصلت لدرجة أنه في مادة أنا أخذتها السنة إللي فاتت هما ما أخذوها..
و يوم اختبارهم أنا كنت تعباااانه عالآخر و جيت الجامعة كان عندي ساعة و نص سيكشن و كان مرة مهم جيت احضره و أنا قاعدة أجر نفسي..
و ما قدرت آخذ مسكن لأني ما أكلت شي..
تخيلي أول ما شافتني واحدة فيهم تقول لي نبغاكي تذاكري لنا ما احنا عارفين و الاختبار اليوم..
قلت لها أنا تعبانة مرة و حمشي 12 ونص بعد السيكشن على طول و كلمت بابا أني حجلس ساعتين بالكثير..
قامت تقول لي مو مشكلة نص ساعة بس الين واحدة..
تخيلي الوقاحة..
أنا سكتت و أول ما خلص السيكشن قاموا يقولوا لي تعالي ذاكري لنا قلت لهم في وجههم أنا ماني فاكرة الأسئلة تبع اختبار أمس عشان أفتكر لكم حاجة أخذتها السنة إللي فاتت..


أنا هذي الفئة إللي منرفزتني،، و هذا النوع من الاتكال الا منطقي..
و أظن أني حكيتك أني متعقدة من هذي الأشياء و إللي صار لي أيام الثانوي..
//

ربنا يوفقك يا عسل و يسعدك..
بالتوفيق في اختباراتك||~

[كيميائية العام]

فعلا موضوع مهم وكلنا بنعاني منو
اهم شي انتبهي على دفاترك ومذكراتك لانو بعضهم اذا صدتيهم ممكن يسو اي شي لمصلحتهم
وكمان اذا ماسعتيهم حيقولو شايفة نفسها علينا
المهم ساعديهم في حدود المعقول مو يغيبو هم وانت تشرحي