مواد السنة الثالثة.. بدايتنا كأطباء أسنان حقيقيين.. تكمن هنا ~

[Dr~NanoOok]

السلام عليكم ورحمة الله ,,

السنة الثالثة من كل مرحلة دراسية..

كان لنا معها ذكريات !

بدءًا من الثالث ابتدائي !

وانتقالنا من الصفوف الدنيا إلى العليا

وعالمٌ جديد.. ومواد جديدة .. وبداية الكتابة بالقلم بدلا من المرسام
=p

~

الثالث متوسط ..

وانتقالنا من مرحلة إلى أخرى

إلى عالم الثانوية وما فيها !

~

الثالث الثانوي ..

أهم المراحل الدراسية.. وهي التي تحدد مستقبل المرء ودخوله الجامعة

~

ولربما أعتبرها البعض.. الصف الثالث من كل مرحلة

هي المرحلة الأصعب.. فهي المرحلة الانتقالية !

~

وحتى هنا.. السنة الثالثة بكليتنا.. وتخصصنا..

السنة الثالثة من طب الأسنان ..

السنة التي سمعنا عنها الكثير..

والمشهورة بعبارة أنها "عنق الزجاجة" << وصراحة تغيظني هذه الجملة كثيرا ! "^^

وأنها أصعب السنوات وأدسمها

و و و و و

كلام أكثره مُبالغ فيه.. و من باب التهويل و التخويف حتى !

~

أهم شي سيبوكم من الرسائل السلبية هادي

وركزوا واستعدوا لهذه السنة .. نفسيا أهم شي

وماهي بالسنة المستحيلة.. والمواد الصعبة والكلام الكتير حقهم دا

اللي ما يودي ولا يجيب

اللي يقدر ينظم وقته.. ويعرف كيف يزاكر بتركيز

يقدر على هذه السنة.. وبمعدل عالي باذن الله

وما اقلكم إنها سهلة.. يبغالها مجهود

تتذكروا ثالث ثانوي كيف.. هي زيها وممكن تقولوا ضعفين اللي عملناه فيها
=p

لكن تذكروا.. المره هذه بندرس المواد اللي نحبها..

مواد تخصصنا الحبيب..

اللي من خلاله حنقدر نحقق حلمنا وطموحنا..

حلمنا اللي يهون عشانه كل صعب ^_^

~

طيب نجي لسبب صعوبة سنة تالت ؟؟

وهي الضغط

ضغط في المواد و المنهج و العملي

من جهة المواد.. في الترم الأول 8 مواد

وبالترم الثاني 10 مواد

المنهج

بما أن المواد جديدة وأول مره بناخدها

وهي مرحلة التأسيس بالتخصص.. وأغلب المعلومات اللي فيها هي الأساس وعليها تبنى السنوات الجاية

وكمية المنهج طويلة ودسمة

العملي

عدة معامل خلال السنة.. وكل معمل له متطلبات و تكاليف لازم تنعمل وتتسلم

وآخر شي الدوام الطويل

تقريبا كل يوم من 8 إلى 4

ويوم نرجع الساعة 5

~

عشان كده يادوب يكفي الوقت اننا نعمل كل دا

وعشان كده تنظيم الوقت هو أهم أهم شي

طيب ممكن تقولوا ..

ليش بالزات سنة ثالث ضغط وتقولوا انها صعبة

بالرغم اننا في سنة رابع وخامس طب أسنان

حيكون عندنا 10 مواد بالترم غير العيادات والعملي ؟

جوابي:

لأنها هي البداية.. وأي شي بالبداية يكون صعب

لكن مع الوقت والتعوّد حيصير أسهل

غير ان كمية المناهج حتصير أقل في رابع وخامس

و بعض المواد ما حتكون لأول مره بناخدها

والأساسيات خلاص اتعلمناها بسنة ثالث.. وبكده حتسهل علينا أكتر بعدين

ولازم تعرفوا

دراسة طب الاسنان متكاملة.. وكل سنة تعتمد على اللي قبلها

فاذا ما ركزتوا بسنة ثالث.. حتندم عليه بسنة رابع وهكذا

الين لما نتخرج

~

يُتبع ,,

[Dr~NanoOok]

خلاص كفاية مقدمة وكلام عن سنة ثالث..

وخلينا نشوف المواد واحده واحدة

زي ما ذكرت أول..

أنه بالترم الأول حيكون فيه 8 مواد وهي

3 مواد من الطب البشري
و 5 مواد تخصص أسنان

,’

حتكلم أول شي عن مواد التخصص

Operative Dentistry
اصحاح الأسنان

عليها 4 ساعات + العملي

المادة هذه هي أهم مواد سنة ثالث.. لأن لها أكبر عدد ساعات بالجدول

وهي أساس طب الأسنان.. وحتستمر معانا هذه المادة على طول

مررره ممتعة ودمها خفيف.. حتتعلموا فيها الأساسيات من كيفية التعامل مع التسوس

وكيفية ازالته و عمل الـ cavities بأنواعها

واستعمال الحشوات وأنواعها بالتفصيل

و تتعلموا الأدوات اللي حتستخدوها في عملكم وفي العيادة

والشي الممتع والجديد اللي اتعرفت عليه

هو وجود كلاسات عديدة للتسوس

يعني مو سوسة وأقوم احفرها والسلام "^^

لاااا ليها دراسة وشغل و تصنيف

وعلى أساسها أقوم بعملية الحفر على أساسات وأشكال

ومتى استعمل الحشوة الفضية amalgam .. ومتى الحشوة البيضاء composite

وكل شي عنهم

,’

العملي

معمل الاوبريتيف هو أمتع معمل ^^

وهنا حتحسوا لأول مره انكم صرتوا أطباء أسنان من جد

وحتستعملوا جهاز الحفر لأول مره hand-piece

و كيف تحشوا الأسنان و وتصلحوها خطوة خطوة

~

Dental Biomaterial

المواد المستخدمة في طب الأسنان

عليها ساعتين + العملي

حتدرسوا فيها كل المواد اللي بنستخدمها في طب الأسنان

الحشوات:
Amalgam – composite – Gold

أنواع الـ impretion materials
اللي بنستعملها عشان ناخد نسخة وطبعة من فك المريض و أسنانه

التلبيسات للأسنان:
اكريلك – فينير – سيراميك

مادة يبغالها حفظ.. و مهمة جدا ومرتبطة بغيرها من مواد هذه السنة وتعتمد عليها

,’

العملي

حيكون مجرد اننا حنشوف المواد اللي درسناها بالمحاضرة

وكيفية استعمالها واعدادها

ولازم تنبهوا كويس.. لأنه كل دا حيفيدكم في العيادات السنة الجاية

وكل شي حتعملوه بنفسكم

~

Removable Prosthodontics

الاستعاضة السنية المتحركة

عليها ساعتين + العملي

في المادة هذه حتاخدوا طقم الأسنان Denture

سواءً الكامل أو الجزئي

Full denture & RPD

حتدرسوا بالترم الأول طقم الأسنان الكامل

وكيفية اختياره للمريض.. وعمله وخصائصه

و ترتيب الأسنان وكيفية تنظيمها

و خطوات عمل وصناعة الطقم إلى تسليمه إلى المريض جاهز

وبالمعمل

حتقوموا بعمل كل شي بالتفصيل

وبآخر الترم حتسلموا طقم أسنان كامل

ووقتها حتشعروا بالانجاز اللي عملتوه طوال الترم

وانه فعلا بيحتاج جهد وعلم عشان يتعمل

مو أي كلام يعني

,

وبالترم التاني

حتاخدوا الطقم الجزئي

وهي تقريبا نفس فكرة الطقم الكامل .. لكن ليها خواص

و تصنيفات وأشياء أكتر

وبالمعمل

حتتعلموا برضو خطوات صنعه

لكن ما حتعملوه للنهاية زي الطقم الكامل

~

Oral Histology

أنسجة الفم و الأسنان

عليها ساعتين + العملي

هذه المادة مهمة.. ومهم فيها الفهم قبل الحفظ

بسنة ثانية اخدتوا جينرال هيستولوجي

واخدتوا فكره عامة عن كل انسجة الجسم ودرستوها كلها

وهذه السنة حنتعمق في انسجة الأسنان و الفم بشكل كبير

حندرس مينا الأسنان ومكوناتها تحت المجهر

وباقي الأنسجة .. صراحة ما اعرف ترجمتها بالعربي ايش "^^

Enamel – dentin – cementum

واللثة

و الـ TMJ

و الجيوب الأنفية وغيرها الموجود بالوجه

,’

العملي

شرائح وسلايدات حتشوفوها تحت المجهر بالمعمل

وحترسموها << حيطلبوا منكم كراسة رسم وألوان ^^

~

[Dr~NanoOok]

~

Oral Pathology

علم أمراض الفم

عليها ساعتين + العملي

دراسة لأمراض الفم بالتفصيل

والأنسجة المحيطة بيها..

مادة دسمة.. تحتاج حفظ وطريقة للتفريق بين كل مرض والتاني

لكنها حلوة.. وفيها كمية معلومات روعة

وفعلا تحس انك طبيب أسنان وتقدر تفتي اللي يسألوك ^^

,’

العملي

صور حقيقية للمرض + شرائج مجهرية للنسيج حق المرض

~

وبكده خلصنا مواد التخصص

ونجي لمواد الطب البشري وهي 3 مواد

’,

General Pathology

الأمراض العامة

عليها 4 ساعات + العملي

مادة دسمة .. فيها أمراض كل الجسم وبالتفصيل

يبغالها مزاكرة أول بأول وتركيز

ولأن عدد ساعاتها كبير وتأثر في المعدل

دكاترها مو مره متعاونين معانا

وحووسة.. لكن الله يسهلها

,’

العملي

حتشوفوا أعضاء صار فيها المرض

داخل جارات و علب بالمعمل.. بالاضافة لشرائح مجهرية ليها

~

Pharmacology

علم الأدوية

ساعتين .. بدون عملي

هذه المادة معذبة الكثيرين "^^

وحتى طلبة البشري نفسهم بيكرهوها

ومحد بالتخصصات الطبية سمعت انه حاببها

عيبها كثيرة اسماء الأدوية وخواص كل واحد منها

و المشكلة الأساسية فيها ..

انه اسألتها دايما تجي من المريخ !

أسئلة عجيبة فعلا !

والأفضل تحطوا في بالكم.. أنا بدرس عشان أستفيد

ومو عشان الدرجات !

~

Microbiology

الكائنات الحية الدقيقة

ساعتين + العملي

دراسة الفيروسات و البكتريا و الفطريات

انواعها .. خواصها.. والأمراض اللي تسببها وكيفية علاجها

مادة أنا شخصيا مررره ما كنت أحبها

وفيها كمية معلومات كثيييييرة واللي استفدت منه قليل

العملي حقها

نشوف المزارع حقت البكتريا و وأشكال نمو البكتريا عليها

و كيفية التعقيم و و << برضو كلام فاضي :p

~

وبكده خلصنا مواد الطب البشري

وبقيت لنا مادتين جديدة حناخدها على الترم الثاني..

اللي هي ..

Oral Radiology

الأشعة التشخيصية للفم و الأسنان

عليها ساعتين + العملي

,’

هذه المادة حتاخدوها على مرحلتين

المرحلة الأولى.. في الترم الثاني من سنة ثالث

والمرحلة الثانية.. في الترم الأول من سنة رابع

وحتكلم هنا عن الجزء حق سنة ثالث

أول شي حتاخدوا مقدمة عن علم الأشعة و أغلبه فيزياء

بعدين عن خواص الأشعة وكيفية توليدها واستخدامها

و الأجهزة المستخدمة في طب الأسنان

وكيفية استعمالها .. وأنواع الأفلام وكيفية تحميضها وحفظها

وكيف تقرؤوا الأشعة بشكل صحيح وتطلعوا منها الأمراض و المشاكل اللي بالأسنان والفم

والحلو انكم حتشوفوا وتطبقوا كل شي بشكل عملي في العيادات

<< وحتكون أول مره ليكم تروحوا العيادات ^^

العملي

حتصوروا كل الأسنان بالفم.. بعدة أنواع وأحجام من الأفلام وتكنيكات

و كيف تعملوا الأشعة البانورامية للفم كاملا

و تحمضوا بنفسكم الأفلام اللي اخدتوها.. مره يحمس

~

Biostatistics

الاحصاء الحيوي و طرق البحث

عليها ساعتين .. ومافي عملي

الاحصاء حيكون خاص في مجال طب الأسنان ويختلف عن اللي اخدتوه بالتحضيري

<< بالنسبالي أنا ما درست تحضيري ولا احصاء فيها ^^

وهي مره سهلة.. وتعتمد على الرياضيات والقوانين الحسابية

عشان تعرفوا تطلعوا نسبة معينة للأمراض و الاحصاءات العامة لها

وليها جزء ثاني داخل فيها.. وهي طرق البحث

حتتعلموا كيف تعملوا بحث.. و الفرضيات والطرق اللي حتمشوا عليها

وكلااااام كتير "^^

المادة هذه أسهل مادة بالترم

ومرررره خفيفة بالمقارنة مع غيرها

~

وبكده انتهينا من مواد سنة ثالث ^_^

يلا شدوا حيلكم فيها.. وباذن الله حتكون ممتعة وحلوة

~

الموضوع هذا مجهود شخصي .. وأخد مني مره وقت

فلا تنسوني من صالح دعاءكم ..

^_^

بالتوفيق لكم جميعا

[Dr~NanoOok]

Operative Dentistry

Art & science of Operative Dentistry
by Sturdevant

كتاب مهم وحيفيدكم للسنوات الجاية
غير أن دكاترة المادة ما يعطوا شيتات لمحاضراتهم

فاكتبوا معاهم كل شي بالمحاضرة

~

Dental Biomaterial

مايحتاج نشتريلها كتاب.. الشيتات كافية
لكن هناك كتاب للقسم.. ما اعرف اسموا "^^
على العموم الدكاترة حيقولكم اسمه بداية السنة

~

Removable Prosthodontics

McCracken Removable Prosthodontics

اشوف ان الشيتات + النوتز حقتكم مع الدكاترة في المحاضرات كافية
ومحد من دفعتنا اشترى الكتاب هذا السنة دي

~

Oral Histology

Ten Cate's oral histology

كتاب مهم وفيه شرح مره حلو
وحتحتاجوه كتير في جزئية د.سهر و د.نادية
مره يحبوا يرجعوا للكتاب.. وشيتاتهم كلامها قليل

~

Oral Pathology

Neville, Oral and Maxillofacial Pathology

حلو للصور حقت الأمراض.. ويعتبر مرجع ليكم بعدين
لكن كمذاكرة.. الشيتات + النوتز حقتكم كافية باذن الله

~

General Pathology

Robbins Basic Pathology

مو مهم الكتاب.. واذا حابين تاخدوه.. فاستعيروه من البشري
الشيتات حقت القسم كافية

~

Pharmacology

lippincott's Pharmacology

مو مره مهم الكتاب ما انصحكم تشتروه

~

Microbiology

برضو حق lippincott

وبرضو مو مهم

~

Oral Radiology

Oral Radiology: Principles and Interpretation

مو مهم شراءه

~

يعني باختصار ..
الكتب المهمة اللي ممكن تشتروها هي

Operative & oral histo

والباقي دوروا على النسخة الالكترونية حقته وحملوها على كمبيوتركم

[مَـزٍآج ..}..]

مآ شآء الله تبآرك اللهـ . .

موضوع من أروع مآ يكوٍن .. وإن ششآء الله نعدي السنـه هذي الي سمعنـآ عنها الكثيـرٍ ..

الموأإد صحيح كثيرهـ الله يعيننـآ ويسهل علينـآ ..

وبفهم ليش دكآتره البشري دآيما مو متعآونيين معآنآآ > طبعاً مو كلهم

ششرح مبسسط وسسهل عن السسنـه الجآيـه .. الله يعطيكِ ألف ألف عآفيه بصرإأحـه . .

وأسال الله في هذي الأيام الكريمـه إأنـه يوفقكـ في السنـه الرإأبعه على مجهودك الطيب مـ ع ـآنآ !!

ولو تسمحيلي على نقل الموضوع في منتدإأنـآ الخاص بطلاب و طالبآت دفعتنـآ o9 !!

عشآن تعم الفآئدهـ .. وانا انتظر ردكـ يآ دكتورهـ !!

[Dr~NanoOok]

أكيد ! اتفضل وانقل الموضوع

هو القصد منه الاستفادة للكل باذن الله
وكان نفسي أنبّه الأعضاء اللي هنا .. اللي بسنة ثالثة على الموضوع
عشان يجوا يقروه ويستفيدوا منه

وبما انك حتنقلوا.. فجزاك الله خير

وأنا موجودة لأي سؤال أو استفسار عن المواد =)

,’

وهذا فعلا شرح مبسط عن كل مادة..
كان نفسي أعمل بشكل شامل << لكن ليش الحووسة حتى قبل ما تبدوؤا السنة
=p

و احنا بالدفعة وزعنا علينا الأدوار
بأن كل ليدر مادة .. تعمل ملخص عن مادتها وشرح شامل عنها

وكان نفسي أفيدكم بيه دحين.. لكن المشروع دا ما حيتجمع ويجهز إلا على بداية السنة
وحنعرضه لبنات الدفعة بوقتها

لكن إن شاء الله موضوعي حيفيدكم برضو بشكل كويس

^_^

[مَـزٍآج ..}..]

المشاركة الأصلية كتبت بواسطة dr~nanoook أكيد ! اتفضل وانقل الموضوع هو القصد منه الاستفادة للكل باذن الله وكان نفسي أنبّه الأعضاء اللي هنا .. اللي بسنة ثالثة على الموضوع عشان يجوا يقروه ويستفيدوا منه وبما انك حتنقلوا.. فجزاك الله خير وأنا موجودة لأي سؤال أو استفسار عن المواد =) ,’ وهذا فعلا شرح مبسط عن كل مادة.. كان نفسي أعمل بشكل شامل << لكن ليش الحووسة حتى قبل ما تبدوؤا السنة =p و احنا بالدفعة وزعنا علينا الأدوار بأن كل ليدر مادة .. تعمل ملخص عن مادتها وشرح شامل عنها وكان نفسي أفيدكم بيه دحين.. لكن المشروع دا ما حيتجمع ويجهز إلا على بداية السنة وحنعرضه لبنات الدفعة بوقتها لكن إن شاء الله موضوعي حيفيدكم برضو بشكل كويس ^_^

مشكورهـ ..

وفعلآً دفعتكم مره متعآونـه .. حتى بدإأيه السنـه دخل علينـآ الليدر ونآسي اسمه والله

بس الله يعطيه ألف عآفيه ..

وإن شآء الله نحنـآ بدورنـآ ما نقصل على الي طالعيـن سنـه ثآنيـه !!

ألف شكـر !!

[DR-loai]

السلام عليكم
كيفكم يا حلوين ...
انا اخوكم ادرس في جامعة طيبة بس من مكة << شعترة صح خخخخخ
معليش د/ نانوك ..
انتي مو تقصدي سنة تالتة بالنظام القديم اللي هوا مع التحضيري ولا تقصدي بالنظام الجديد اللي هوا بدون التحضيري ولا ايش الهرجة ؟؟؟
لاني طالع رابعة بالنظام القديم ( مع التحضيري )
وتالتة بالنظام الجديد ( من غير التحضيري )
وشاكر لكي موضوعك الحلو وماقصرتي كفيتي ووفيتي ^____^

[Dr~NanoOok]

اهلين بيك د.لؤي

عندنا حتى بعد تطبيق نظام التحضيري
السنوات بقيت زي ما هي

أول سنة بالجامعة = سنة تحضيرية
بعدها سنة ثانية = بنسميها ثانية طب أسنان
السنة الثالثة = ثالثة طب أسنان

وهكذا ..
ومجموع السنوات هو ست سنوات دراسة .. بالاضافة لسنة الامتياز

وياليت تقولنا ايش المواد اللي اخدتها بثانية وثالثة عندكم =)

[DR-loai]

اهاااااااا
اجل الهرجة زينا بالزبط ....
طبعا السنة التحضيرية مواااد اغلبها عامة وانتي عارفة كيف مايحتاج اقولها ..
اما السنة التانية هادي المواد اللي اخدناها :
مقدمة لتعليم طب الأسنان
التشريح وعلم الأنسجة وعلم الأجنة
علم وظائف الأعضاء
الكيمياء الحيوية
مواد طب الأسنان الحيوية (1)
صحة الأسنان العامة
تشريح الأسنان
اما سنة تالتة هادي المواد اللي اخدناها :
علم الأمراض العام
علم الأدوية في طب الاسنان (1)
الأحياء الدقيقة وعلم المناعة
بيولوجية الفم وأنسجة الفم
تشخيص أمراض الفم (1)
الإستعاضة المتحركة (1)
طب الأسنان التكاملي (1)
التشريح الجراحي التطبيقي، التخدير والخلع
أمراض الفم
طب الأسنان الوقائي
أشعة الفم (1)
إصحاح الأسنان (1)
مواد طب الأسنان الحيوية (2)
وبـــــــــــــــس اتمنى اني اكون افدتك ... *___^