طلب بسيط

[المبتدئة]

السلام عليكم ورحمة اللة وبركاتة
انا من كلية الاقتصاد المنزلي بجدة ملابس ونسيج حبيت أقدم ماجستير لازم يكون في الكلية أو عادي أقدم في الجامعة
وحكاية التزكية من الدكتورات لابد أطلبها من قبل أي ((أجيبها من الدكتورات اليوم والسنة الجاية أقدمها ))ولا أجيب استمارة أشرح فيها أني ابغى أكمل ماجستير وأعطيها للدكتورات اورئيسة القسم أوأجيب ورقة من الجامعة ترى أول مرة مااعرف شي نهائى وكمان التوفل ماعرف عنه اي شي ممكن أدرس في الجامعة توفل وكم الرسوم لاني حبيت أكمل دراسه الماجستير السنة الجاية بأذن اللة رجاء ردو على تساؤلاتي
ولكم جزيل الشكر

[نجاة الفرسي]

السلام عليكم

دحين انا دخت من اسألتك <<امزح

شوفي في الكليه مافي ماجستير هذا اللي سمعته لحد اليوم..الماجستير بالجامعه بس
انتي تروحي بدون ما تكتبي حاجه.. اول شي تصوري الوثائق حقتك كلها كذا نسخه 3 تكفي وتروحي شئون الطالبات يختموا عليهاااا صورة طبق اصل
بعدين تروحي مكتب رئيسة قسم الملابس وتقولي لهم ابغى ورقة توصيه اطلبي 3 خير وبركه اصلا المطلوب اتنين
وتروحي تشوفي الدكاترة اللي جبتي عندهم ممتاز واذا ما لقيتيهم اسألي مين يدرس نفس المادة اللي جبتي فيها ممتاز
لانو انا مالقيت الدكتورة ايمان بلوني ووقعت لي بدالهاا دكتورة بتعطي نفس المادة
وبعد كدا تسجلي في اختبار بديل التوفل وتزااااااااااااااااكري كويس انجليزي وتروحي تختبري ولازم تجيبي 400 من 600
طبعاا بتعرفي انو بديل التوفل تدفعي 200 رسوم وتدوريي كتاب خاص بالتوفل مثل كتب اصدارات بارونز خذي العودي او الموف لا تاخدي الاصدار الجديد
وامممممممممممممممم اي سؤال انا حاضرة


بليز ادعيلي اجيب الدرجة المطلوبه

[qamar_1985]

اختي الدمية الفاتنة انا بقدم ماجستير تغذية وعلوم اطعمه بس ابغى اسال عن اختبار القبول بالعربي ولابالانجليزي انا اختبرت التوفل ونجحت فيه بس ابغى اعرف معلومات عن اختبار القبول عربي ولاانجليزي فيه نظري وعملي ولالا والمقابلة لانه انتي عارفه كلية التربيه كل دراستنا كانت عربي مانعرف اي مصطلح انجليزي واذا عندك فكره عن المواد الي نذاكرها عشان الاختبار والمصطلحات ياريت تقوليلنا جزاك الله خير وفقك معليش طولت عليكي

[نجاة الفرسي]

المشاركة الأصلية كتبت بواسطة qamar_1985 اختي الدمية الفاتنة انا بقدم ماجستير تغذية وعلوم اطعمه بس ابغى اسال عن اختبار القبول بالعربي ولابالانجليزي انا اختبرت التوفل ونجحت فيه بس ابغى اعرف معلومات عن اختبار القبول عربي ولاانجليزي فيه نظري وعملي ولالا والمقابلة لانه انتي عارفه كلية التربيه كل دراستنا كانت عربي مانعرف اي مصطلح انجليزي واذا عندك فكره عن المواد الي نذاكرها عشان الاختبار والمصطلحات ياريت تقوليلنا جزاك الله خير وفقك معليش طولت عليكي

اهااااااااااااااا
تيب والله الف مبروك عقبال ما انجح انا كمان في التوفل
اتصدقي سؤالك في الصميم
افتكر البنات اللي قدموا في الكليه ايام كنت سنه رابع واختبروا القبول كان كلللللللللللللو انجليزي و6 بنات نجحوا من 200 بنت
بس احنا المفروض اختبرنا انجليزي يعني حيكون عربي
والله لو طلع انجليزي مصيبه
وبالنسبه للكتب اللي نذاكرها تعرفي دكتورة امان الجارحي .. هذي انا سألتها وقالت كل اللي درستيه من مواد التخصص من اولى لرابع
بس انا عني حذاكر تغذية علاجيه ومشاكل الغذاء وعادات غذائيه وتخطيط وجبات واممممممم تغذية انسان وتقييم الحاله الغذائيه وممكن تثقيف غذائي مع اني بحس انو ماله داعي..
والله يوفق الجميع يارب
ووحده في الجامعه قدمت ماستر تغذية وحولت التخصص بتقول انو الدراسه بالانجليزي يعني ورااااااااانا وراااااااااااااانا انصحك سوي زيي وادخلي معهد
انا دخلت الثقافي السعودي اللي بعد الصيرفي 3 شهور ب1500 يعني الفله

ونسيت حاجه مهمه.. << يا كثر كلامك يا بنت
احس انو مهم نحفظ المصطلحات الانجليزيه و الطبيه تبغ تخصص التغذية
انا اخدت دورة بس ما اخدت الكتاب
قلت افتح كتبي وادور عليهااا هناك

[المبتدئة]

مشكورة وجزاك الله خيرا يا اختي ((الدمية الفاتنة )) بس ماقلتيلي لازم التزكية بتاريخ قريب من موعد التقديم حق الماجستير ام لا لاني الكلية جدا بعيدة عني وتعرفين المواصلات مافي أحد يجيبني ويوديني ..
معليش تعبتك كثير

[نجاة الفرسي]

المشاركة الأصلية كتبت بواسطة المبتدئة مشكورة وجزاك الله خيرا يا اختي ((الدمية الفاتنة )) بس ماقلتيلي لازم التزكية بتاريخ قريب من موعد التقديم حق الماجستير ام لا لاني الكلية جدا بعيدة عني وتعرفين المواصلات مافي أحد يجيبني ويوديني .. معليش تعبتك كثير

لا مو لازم اصلا ما يكتبو تاريخ
حقتي مافيها تاريخ
وفي بنات تزكيتهم لها سنه عندهم
والله الحال من بعضه في المواصلات
يوم الاحد عصبت على اللي في شباك التسجيل لانهم ما رضيو ياخدو اوراقي عشان نتيجة التوفل ما طلعت.. بجد كنت حبكي ..