ماذا ستصبح مستقبلاً

[مربط الجن]

سلاااااااااااااااام

اسعد الله اوقاتكم بكل خير
كم هو جميلا ان ترى تميسيح صغنون وهو يلعب امام الشاطي بكل برائه وعذوبة الطفولة وهو يذهب ويقترب من الشاطي همن يعود وقد رش على عمره مويه من البحر والابتسامه تشق خشته ومستانس وحوله تماسيح كبار شهب الملامح متجطلين على الشاطي يتأملون ذلك التمساح الصغنون وكل واحدن ينقش اسنانة من الطحالب المتعلقه بين فكيه... صورة رائعة ولكنها تتمزق و تتلاشى حينما تمر سحليه وتشوت وتسطح هالتميسيح الصغنون ببوز مبعثرتن علامات الطفوله على خشته ليستقر في قعر البحر.. همن تعط مطلقةً كراعينها لتسابق الريح.. بذمتك ايها التمساح ذا مو ظلم؟؟؟

هذا حالنا مع هذه الجامعه...وهذا ماعلمتنا اياه ماغير ظلم وتشويت وتشويه معالم.. نعم لقد كنت بالامس منبطح امام هالشاشه حتى ازبط هالجدول واعدله على مزاجي ولكن قد تفاجئت وارتسمت على ملامح خشتي البريئه علامات التعجب والحيره...لقد تعبت وانا ماغير اتمقل واقلب عيوني بين الصفحات ويوم غطيت بسباتٍ عميق انفتح الحذف والاضافه..بذمتك ذا موب قهر..؟

أنا..من انا.. طال جامعي أدرس إدارة أعمال..!

نستهل موضوعنا بطرح قول عالم الاقتصاد الصيني تشوشانغ المطفوق صاحب نظرية التكتلات والاندماجات التجارية بين الشركات يومن حضر افتتاح اول مصنع تفصيل هدوم بالصين مع الرئيس الصيني ابو ظروس . عاد قال وهو ماسكن مقص شريط افتتاح المصنع وسط هتافات وتصفيق حار: لو كل اثنين صنيين يشتركون بخياطة ثوب طال عمرك..سوف نغرق الاسواق بالملابس الصينيه ونصير نتحكم في تفصيخ وتلبيس خلق الله . ويا جعل الذيب ياكلني ان تسذبت عليكم طال عمرك.. ولأول مرة بالتاريخ يبتسم ابو ظروس وانبسط تشوشانغ المطفوق وفرحوا الحاظرين وباركوا له وقالوا ياحظك بيهديك الرئيس مكينة خياطة هالحين.. وما كان من الرئيس الصيني ابو ظروس الا ان امر الجنود بتفصيخ العالم الاقتصادي من ملابسة وجلدة بسلك كهرب حتى ما يتلقف ويقص الشريط مرتن ثانية...
الا ان دراسة اقتصادية اجراها شريطي العسل والسمن البري برغش الملتمس انتقد بشدة ما قالة هالعالم الصيني.(شريطي = تاجر ..شرح توضيحي لمحبين الهمبرقر والأتكيت)
حيث قال: ماعليكم من ها الصيني ابو عيون والله انه داج ويستاهل الجلد..وانا اتحداه يدخل الخيط با الابرة في اسبوع من غير غش ومن عشا لعشا ...

وقد عرف التاجر ابو خضير صاحب بقالة السعادة اللي بحارتنا والمشهور بابو خضير النظول التجارة وقال:
التجارة لغةً:مواد غذائية + زبون = دراهم
وشرعاً: عملية تبادل مصالح بين شخصين شخص عندة بقالة وشخص عندة دراهم بمخباة و تمر عبر قنوات متعددة اولها يجي الشخص ابو دراهم للبقالة وثانيها ينشد راعي البقالة عندك صلصة ؟. همن تبدا مرحلة التفاوض ويليها الاتفاق همن كلن يشرب بيالة شاهي واخيرا تتم عملية البيع همن يطس احد الشخصين ويبقى الشخص الاخر بالبقالة يحتري زبون ثاني .

وحذر ابو خضير النظول من آفة التجارة وهي ( سجل على الحساب لين اخر الشهر)..وانا استغل ها المناسبة واحذر ابو خضير واقول داعسك داعسك الله لا يعوق بشر...


نعم .. هذا ماتعلمته من هالجامعه بخصوص التخصص...والله الموفق

( مجرد فضفضه بمناسبة افتتاح الحذف والاضافه ورئصني ياقدع )

[قلبي أماراتي]

مربط الجن!!
ترهم كانو كاتبين ا الحذف والاضافه يوم الثلاثاء الساعه 3 مساء
وان شاء الله قدامك فرصه تعدل جدولك
الساعه 3 كان ظغط ع الموقع وللحين ماخلصنا
بالتوفيج

[مربط الجن]

مربط الجن!! ترهم كانو كاتبين ا الحذف والاضافه يوم الثلاثاء الساعه 3 مساء وان شاء الله قدامك فرصه تعدل جدولك الساعه 3 كان ظغط ع الموقع وللحين ماخلصنا بالتوفيج

ياهلابك طال عمرك وحياك .. أحب أنوه وأبشر لسعادة حظراتك اني سويت الجدول وقضيت منه والله الموفق
شاكر لتس هالمرور الزين اختي

لتس ودي

[عاشقة المستحيل]

و عليكم السلام

بصرااحه عليك تشبيهات

بس كلام سلييم

و مشي حالك ان شاء الله كل شي يزبط

<< شوف حالتي شعبها مقفله

و بالنسبه

نعم .. هذا ماتعلمته من هالجامعه بخصوص التخصص...والله الموفق

لا الخير جايك قدام .. ما تعلمت و ما شفت شي ..
يا ( تميسيح صغنون )
و خليك متفائل
ليش مواضيعك كلها تحطيييم !!

بس تونس

اتمنى لك التوفيق

تقبل مروري

عاشقة المستحيل

^_^

[مربط الجن]

المشاركة الأصلية كتبت بواسطة عاشقة المستحيل و عليكم السلام بصرااحه عليك تشبيهات بس كلام سلييم و مشي حالك ان شاء الله كل شي يزبط << شوف حالتي شعبها مقفله و بالنسبه لا الخير جايك قدام .. ما تعلمت و ما شفت شي .. يا ( تميسيح صغنون ) و خليك متفائل ليش مواضيعك كلها تحطيييم !! بس تونس اتمنى لك التوفيق تقبل مروري عاشقة المستحيل ^_^

سلااااااام

يخليك ربي عاشقة المستحيل وسبحان الله كلامك عين الصواب والمفروض دايما نحط التفاؤل والفرح امام اعيننا وماعاد ننظر ولانلقي الهموم والمشاكل قفانا

يخليك ربي طال عمرك كلامك عين الصواب يالطالبه الجاده

لتس ودي

[& صمت الجروح &]

محد قلك تغط في سبات عميق
المفروض مصحصح للحذف والاضافه
تستاهل ههههههههههههههههههههههههههه

[زاحفه200]

هذي اخرة الدجة والنوم وشكلك مالقيت مواد تضيفها وجلست تألف هالقصة والله خطيييييييييييير ماشاءالله عليك جبتها من جد هالجامعة ملعوب علينا فيها

[مربط الجن]

المشاركة الأصلية كتبت بواسطة زاحفه200 هذي اخرة الدجة والنوم وشكلك مالقيت مواد تضيفها وجلست تألف هالقصة والله خطيييييييييييير ماشاءالله عليك جبتها من جد هالجامعة ملعوب علينا فيها

اتصدقين ياوخيتي عاد ذي الجامعه دايم اسمع عنها عند عثمان تاج الزين السوداني راعي المطعم(مطعم الخرطوم)
عاد ها المطعم يقطن بحارتنا وصاحبه درس بالجامعه ..واول مرة اشوف مطعم يبيع ملابس رياضه .. ويومن سألته ليش ياعثمان .. قال تنويع تجاري وبعد نظر اقتصادي .. واليوم الثاني مركبينه سيارة مكافحه الغش التجاري ومودينه قسم الشرطه.

[مربط الجن]

المشاركة الأصلية كتبت بواسطة & صمت الجروح & محد قلك تغط في سبات عميق المفروض مصحصح للحذف والاضافه تستاهل ههههههههههههههههههههههههههه

سلاااااااااام

أبد طال عمرك هو صحيح ياصمت الجروح ماحدن قالي ارقد واسحب ع الدوام مير وش الدبره كان كل ماحاولت اصحى جسمي يرقدني غصب لدرجة اني ماصحيت الا وانا اشهق ابحث عن نفس اتنفسه
<< كان غارق بسعابيله وهو راقد

يسلمك ربي طال عمرك ع المرور

لتس ودي

[misslolo]

والله انتى تنفع تكون مؤلف قصص وروايات لاكن من الأفضل تكتب باللغة العربية الفصحى عشان يكون تأثير المعنى أقوى ماشاء الله تملك خيال وابداع واسلوب وتأليف مشاء الله عليك لأنه هذا مو أول موضوع أقراه لك قبل كده قريت موضوع مؤثر
وهذا واضح من خلال توقيعك وصورتك الشخصية
مستقبل باهر إن شاء الله