يابنت تغطي , قدامك سعودي !!؟

[فاقدة أبوها]

السلام عليكم ورحمة الله وبركاته

يابنت تغطي ... قدامكـ سعودي

عــادة العين أصدق من الأذن وهناك العديد من المشاهد التي تلفت الانتباه
خـاصه حينما نسمع مقولـــة !!
تغطي يابنت هذا سعودي!!
لمــاذا ؟!!
الموضوع صريح ويتحدث عن واقع نعايشه

بعض من هذه المشاهد :

المشهد الأول

فتاة تتحدث مع أحد العمال الأجانب وتسولف معه وتأخذ راحتها معه ويدخل سعودي
تغطي كأنها ما كانت تكلم رجال مثله مثل اللي دخل وتغطي يا بنت سعودي.

المشهد الثاني

إمرأة تخرج للسواق أو العامل في المنزل بملابس عادية لا عبايه ولاهم يحزنون بحجة
أنه أجنبي عادي تكلمه بدون ما تغطي عليه ولو دق الباب سعودي قالت تغطي يا بنت قدامك سعودي !

المشهد الثالث

بنت تطلب عشاء من أحد المطاعم وطبعا يجيبها عامل توصيل الطلبات تخرج تستقبل
وتأخذ منه الطلب مع الشكر والتقدير ولاتغطي يا بنت تراه مو سعودي.

المشهد الرابع

مجموعه من الفتيات في أحد المجمعات أو في أي مكان ودهم يسألون عن شي
صادفوا شخص لابس جينز وقميص لو سمحت يرد سمي آووه آآآآسفين
وتغطي يابنت هذا سعودي < طلع سعودي.

المشهد الخامس

بخارج المملكه تنزع الحجاب وتتحرر في لبسها ولكن عندما تعود
تلبس حجابها وتتستر وكأن لها رب في السعوديه ورب خارج السعوديه وهذا قمة التناقض .
وقسم باللهـ اني اعرف بنات بس يطلعوا من المدينه اللي فيها يشيلو الحجاب واللهـ يعني حتي لو يروح البحر
وغيرها من المشاهد كثيرر

طبعا كل المشاهد بمباركة الأب والإخوان وشيء طبيعي لو شاهد ابنته أو أخته تتحدث
مع أجنبي بعكس أن هي تحدثت مع سعودي !!
ولانريد التحدث عما يحصل في سياراة الليموزين (( التاكسي )) لأنها وبكل اسف غنيه عن التعريف

وفي الأخير أنا لأأقول أن هذه المشاهد تحصل في
مجتمعنا السعودي كله ولكنها تحصل في أغلبه

وهناك إضافه مهمه :
وهي انه في بعض المحلات خصووصا الماركات يكون اللي يبيع فيها اجنبي سوري او لبناني او مصري
لو طلبت منه البنت غرض بيقول كرمال عيونك او على راسي من فووق او من عيوني البنت هنا وش بتسوي اكيد بتسكت او تبتسم
طيب تخيلو ان اللي يبيع سعوودي وقال من عيووني يالغاليه او انتي تامرين امر
اش بتكوون ردة فعل البنت ؟؟


أتمنى أشوف آرآئكم بصرآحة ..

منقول بتصرف

[منال عبد الغني]

اوافقك الرأي بحكاية تغطي يابنت هذا رجل سعودي بجد واقع مرير يحاكي حال مجتمعنا وكأن الامر الرباني خاص بالشعب السعودي صرنا نمشي على قوانين وضعية ونلتزم بيها اعرف عيلة عاشت وتربت في السعودية لما الوحدة فيهم تطلع تغطي غطا كامل مع كامل الاحترام ومع جماعتهم اختلاط باجتماعتهم وافراحهم ورقص وسواليف ما في اي اشكال قمة التناقض وش نقول كلا بعقله يعيش اما بالنسبة لحكاية محلات الماركات اختلف معاك شوي بالرأي لان العامل الاجنبي وخصوصا اللبناني والسوري فغالبيتهم يتكلمو بطبيعتهم وبأحترام بغض النظر الجنس سواء كان (زلمة او وحدة ست) حتى بتعاملهم مع عيلتهم يكون هذا وضعهم الطبيعي عاد العامل السعودي لو شاف وحدة حالتها حالة ما راح يطل فيها اصلا ولو وحدة متبرجة وكاشفه هل وجه اكيد المعاملة راح تختلف لامحالة شوفي الواحد فيهم كيف يعامل اخته شتان بالمعاملة بين هذا وذاك و عن نفسي افضل العامل البناني والسوري الوحدة تقدر تاخذ راحتها بالكلام من غير مايفهمو الموقف غلط بس مو لدرجة اني اضحك واسولف مع هذا وذاك ناسية او متناسيا انه بالنهاية من معشر الرجال تحياتي لك

[m u l a n]

فعلاً .. مشاهد صرنا نشوفها بكثرهـ

عندنا بالسعوديه الأغلبيه متخذين الحجاب عادهـ وليس عبادهـ ..

آكبر دليل لما الوحده تسافر بره الحجاب ماتعرفه الا في الطيارهـ ..

ليه بس في الطيارهـ ؟؟..((لأن آحتمال يكون فيها سعوديين))

والقاعده تقول "يابنت غطي أذا قدامك سعودي..!!"

وكأن أبناء الجنسيات الآخرى محارمها !!..

نسأل الله الستر والسلامه

دمتي بخير آختي فااقدهـ

[ستأتي أيامي]

استغفر الله العظيم ..
صح كلامك ..
كثيـــــــــــــــــر مواقف تصير قدامنا ..
مره من المرات ركبت معايا وحده من صاحباتي في السيارة وجالسة تتكلم وتضحك وتنكت
أقولها يابت إيشبك ؟؟ صوتك مره عالي !!
تقول ، مو هندي ؟؟ خلاص ماعليكي !!
وشويا فتحت الطرحه وجالسة تعدل الطرحه ووجهها باين وحالتها حالها..
المشكلة إنو تهاونهم في الحجاب خلاهم يتهاونوا في أشياء أكثر

الله يهدينا ويهديهم ..

تشكراتي الجزيلة ..

[Oxsgen]

وكمان العكس صحيح ..

اذا الواحد دخل بنك ولا مستشفى يقعد يتناقش ويضحك مع البنت اللي في الريسبشن ولمن يدخلوا ناس سعوديين .. يعدل نفسه ويغير كلامه ويصير رسمي اكثر ..

وبعدين فى الاول والاخر هى حره تكشف تغطى هذا شىء راجع لها

هل كشفها او تغطيتها تفيدك او تضرك بشىء ؟

اتوقع لأ
القصة هي مبدأ وقناعه مو عادات وتقاليد ..

لو كانت مقتنعة من قلب راح تلاقيها تغطي بكل مكاان ..

[الكريم ابن الكرام]

وعليكم السلام ورحمة الله وبركاته

إذا لم تستحي فاصنع ما شئت

الحياء في كل مكان وليس أمام السعودي بس

دمتم كراماً

شكراً وشكراً لك

[مجنوون جده]

اوافقك الراي
كلام دايما يصير

[مصره على قراري]

الظاهره هذه متشره
ولا اعلم ما السبب
هل هي ثقافه سائده في البلد ام ماذا؟
واخيرا
اقول الرجل رجل مهما كان اصله
وتحريم الكشف امام الرجال الاجانب
يضم كل الرجال دون النظر الى
الجنسيه
وشكرا على الطرح

[never hide]

^
^
^

بل هو غباء سائد و تفكير اعوج للأسف

و الله صرنا نشوف و نسمع حاجات غريبة تدل على هشاشة المبادئ اللي تربو عليها

هذا اذا كان فيه مباديء اصلا

اعتقد ان تفكيرهم كالتالي :

أن السعودي ذكر

الجنسيات الأخرى : مالها تصنيف

الحجاب : فريضة داخل السعودية ... أما برا السعودية فيها رأي آخر و تخضع للمزاج و حسب ما تقتضيه تقاليد البلاد

و اللي تفكر كدا أصلا ما عندها منطق و اغلب الظن انها معتبره الحجاب عادة مو عبادة

هذول اللي ياخدو الدين بمزاجهم ترى مالهم حل

و ما ينفع معاهم الا العصا

الله يرحم ايام زمان ايام الحياء العذري الوحده لو شافها أحد لو بالغلط تلاقيها تحمر و تصفر و تصير ألوان

أيام كانو الرجال رجال و الحريم حريم

الحين عادي انك تشوف الرجال يطلع مع مرته متزينة و تناقش فلان و علتان

صرنا نشوف عبايات ألوان و اشكال غريبة عجيبة

نشوف البنات في الكفيهات تدخلو بالطرحة و إذا شافت المحل ما فيه غير الويترز تفك الطرحة و لا كأنو الويترز رجال

الحين كل شي اختلف

لا و ما يبو أحد ينتقدهم و يقلهم عينكم ف راسكم

الله يهدي الجميع

[المستشار الاداري]

كلامك واقعي وصحيح
والسبب من وجهة نظري ان بعض السعوديين لايحترمون المرأة السعودية ......