الوجه الاخر لجده .. صور خاصه بمنتدى جامعه الملك عبد العزيز

[نضال]

اليوم .. صباح الخميس ..

كان لي موعد جديد مع الحياة .. درس جديد اتعلمته في الوجه الاخر لجدة ...

وجه يختبي خلف حياتنا المرفهه .. خلف شارع التحلية و الكورنيش ..

خلف اسواقنا و قصورنا .. خلف اعيادنا و مهرجاناتنا ...

اخطار تهددنا .. و احنا غافلين عنها في ملاهينا و نقاشاتنا و منتدياتنا ..


مجتمعات من نوع اخر تحيط بنا ... ملاصقه لنا ... تعرفنا تمام المعرفة .. لكننا ما نعرف عنها شي ...


دي المجتمعات تعرف عننا كل شي .. و السبب ببساطه .. لانها تعيش على مخلفاتنا !!

لا تستغربوا ..

بالفعل تعيش على مخالفاتنا ..

حيث التالف عندنا يعني لهم شيء كثير ..

حيث الفاسد من الطعام عندنا يعني لهم غنيمه !!!!


المكان اللي شفت فيه البسمه تصنع من لا شيء !


احد الاشخاص قبل ما انزل موضوعي في المنتدى .. على الماسنجر سالني .. انت شفتهم؟؟؟

جاوبته .. انا كنت وسطهم ..

دخلنا المكان في غمرة انشغالهم في نبش النفايات ... لان وحدة من شاحنات دلة لجمع النفايات كانت دوبها داخلة ...

ما انتبه لنا احد الا قلة ..

فترة و لقيت نفسي محاط بيهم ..

اخفيت كاميرا جوالي و كاميرا الفيديو .. اعتقدت انهم حيهجموا علينا ...

لكن اكتشفت انه نظرتهم مجرد فضول ... " غرباء عن المكان ؟!"

اتطمنت للوضع و طلعت كاميرا جوالي و كاميرا الفيديو و بدات اصور

اتجه لنا واحد منهم و الابتسامه تملاء عينه و شفتيه و هو يقول .." مافي فلوس ؟!!!"

يشتكي فقره .. و هو في وسط النفايات ينبش فيها على اللي يستر عورته و اللي يقدر يستخدمه في بناء بيته .. كل دا و هوا يضحك !!!

يضحك و يقول " مافي فلوس ؟!"

الواحد فينا لو دخل سوق و شاف شغله عجبته و ما قدر يشتريها يتكدر خاطره و يحس ان الله ما اعطاه زي ما اعطى غيره .. و دا يشتكي كفر الفقر و هوا يضحك؟!

يالله .. اي نعيم اللي انا عايش فيه ؟!

اي كفر بنعمتك اللي انا اكفر فيه ؟!!

ياللله اسألك لا تاخذنا بكفرنا ..


شفت بعيني .. ( انسان ) ينبش في منطقة مخصصة للماكولات المنتهية الصلاحيه ..

شي فيه القليل من البكتيريا .. و قليل من العفن .. لا يضر ...

يكفي انه يسد جوعه !!

وصفي ما ينتهي للمأساة اللي شفتها ...

الصور وحدها بتوصل قليل من اللي شفته ...





هنا تظهر محل سكنهم عباره عن اكواخ من المواد اللي يحصلوا عليها في جمع النفايات




و دا جانب من من الاشياء اللي بيفرزوها

[mooon_14]

يالله الحمد لله على النعمة اللي نحنا فيها ..
والله مساكين مو معقول شوفو فين عايشين يناس ؟
..لا حول ولاقوة الا بالله ..
وأعدادهم مي قليلة والله..
الله يرفع عنهم ..
(الحمدلله اللهم لك الحمد ولك الشكر حمداً مباركاً.
اللهم ارفع عنهم بلائهم ..)

شكراً نضال
على الوقائع هادي من جد أول مرا أشوف زي كدا ؟؟
وما صدقت إنها في جدة ؟؟

[نضال]

مرحبا مون ..

افضل تعليق ممكن يعلق بيه الواحد انه يقول الحمد لله على النعمه الكريمه ...

الحمد لله

اما بالنسبه للعدد ... فاعتقد انه يزيد عن الـ 500 شخص

[قلب المحيط]

الحمد لله اللي انعم علينا والله يرزقنا شكر هذه النعمه ويحفظها من الزوال

[نضال]

آمين ..

شكرا قلب المحيط على التعليق

[bent mankoosha]

السلام عليكم

آسفة على التأخير في الرد

موضوع رائع و قيم

بجد شي يقطع القلب
و زي ما قلتوا أفضل قول هو الحمد لله

لما الانسان يطالع في غيره يلاقي انه احس من ناس كتير و انه الله منعم عليه بنعم كتيرة
الاسلام الصحة الأسرة التعليم و كلها اشياء قلما بنتامل فيها و نشكر ربنا عليها

انا مو قصدي شي

بس الناس دي ليه ما تشتغل؟
يعني في شاب في وحدة من الصور باين عليه بصحته و عافيته

ممكن يدور على شغل حتى لو كان بسيط يكفي بيه نفسه

مدري انا ماعندي خبرة في زي كدا مواضيع بس هو استفسار

مشكور مرة تانية على موضوعك نضال

[نضال]

منكوشة ..

اشكرك على الرد القيم ..

لكن الموضوع تدخل فيه امور ثانيه غير الامور الانسانيه .. فهدولا الاشخاص وضعهم في البلد غير نظامي ..

لا اقائمات ولا جوزات سفر ..

و حسب القوانين .. ما يقدروا يشتغلوا بهذا الوضع الغير نظامي ..

[NeMo]

الحمدلله على العافية يارب



شكرا نضال



مش عارفة ارد




الحمدلله تكفي من جد

[x_bioc]

بس الناس دي ليه ما تشتغل؟ يعني في شاب في وحدة من الصور باين عليه بصحته و عافيته ممكن يدور على شغل حتى لو كان بسيط يكفي بيه نفسه

منكوشه انا شايف انو كوللو بيشتغل و اكيد محا يشتغل بلاش ........... و احسن برضو من الشحته



و حسب علمي ان الزبايل وراها ملاييين ............... و فلوس


يا ريت يا نضال تبحثلنا عن

سعر الطن من علب الببسي .... و المعلبات

و سعر الطن من الكراتين

وسعر الطن من البلاستيك



اعتقد ان أسعارها فوق ما نتصور



شكرا يا نضال عالموضوع ........... والحمد لله عالنعمة اللي احنا فيها

[The Sniper]

اول شي

الحمدلله على النعمه الي احنا فيها

الواحد ما يحس باللي عنده الا اذا شاف اشياء زي كذا

ثاني شي

هذولي هم اللي اختاروا العيشه هذي

داخلين البلد وبطريقه غير نظاميه

فين الجوازات عنهم

تدرون ان وزارة التجاره لما بتلقى اكل فاسد ومعلبات منتهيه صلاحيتها

ترميها في مرمى النفايات

وهذولي ما يقصروا ياخذونها ويبيعونها للتجار ضعاف النفوس بعد كذا يبيعونها مره ثانيه للمستهلك

اظن ان هذا جزاء من يسوي كذا

ونفس الوقت اتحدى لو كان بين هذولي كلهم سعودي واحد

لأنه ما يرضى بانه يعيش هذه العيشه

وهذا هو رأي فيهم

سلام