"تجربتي" في السنة التحضيرية،، المسار العلمي ض1

[Ma3QoLa!]

السلام عليكم ورحمة الله وبركاته

صباح \ مسساء الخير،، ع العزوزيين والعزوزيات الجدد

اول شيء كل عام وانتو بخير،، بعد الزحمه

،،،

اتوقع البعض بيقول دوبك تنزل الموضوع؟

بس انا اخترت دا الوقت لانو اتوقع الاغلب راح يكونو متواجدين وراح تكون الفايدة اكبر ان شاء الله

،،،

قبل ما ابدأ،، فيه كم نقطة احب انوه عليها

اول شيء،، زي مو مكتوب في العنوان،، "تجربتي" يعني الشيء اللي انا مريت فيه وطريقة تعاملي معاه

يعني ممكن الاقي احد يختلف معايا مثلاً في الدكاتره او طريقة المذاكرة او في سهولة المادة

لكن الشيء اللي باكتبو هوا اللي مريت فيه بالضبط ووجهة نظري فيه

--

ثاني شيء،، راح يكون تقسم الموضوع كالتالي

اول شيء راح اتكلم عن المادة بشكل عام،، بعدين راح اتكلم عن طريقة المذاكرة،، وبعدين عن الدكاتره اللي درسوني او الدكاتره اللي اعرفهم كويسين،، واخر شيء تقسيم الدرجات

--

ثالث شيء،، الانجلش راح اتكلم عنو في اخر الموضوع

،،،

بسم الله نبدأ

اول شيء نبدأ بالترم الاول،، انا بدأت بخطة أ


1- الماث:

-عن المادة-

المادة كانت اسهل مادة علمية في السنة التحضيرية،، مرررررررررره مويه وبصراحه حرررام تضيع الـ a+ فيها

كانت تتكلم عن الاعداد (الطبيعية، الصحيحه، الكلية ...إلخ)،، والمجموعات والعمليات عليها،، والمعادلات وتحليلها ومعادلات الخط المستقيم،، والدوال ورسمها،، والاشتقاق

هذا اللي فاكرو مادري اذا نسيت شيء ولا لا


-طريقة المذاكرة-

كان منسق المادة البروف حمزه ابو جبل الله يحفظو يارب ويجزاه خير ع كل شيء عملو معانا

بس للاسف شالوه دحين،، اتوقع صار في رابغ بس مو في قسم الرياضيات

كان ينزل لنا حاجه اسمها وورك شوب،، اسئلة وعليها 4 اختيارات،، المذاكرة كانت تقريباً منها

بس طبعاً مو نحفظ السؤال ويجي نفسو في الاختبار،، لا

تفهم فكرة الحل،، حتى اتذكر اول شيء نزلوها لنا مو محلوله وكنا نحلها

يجي في الاختبار اسئلة مشابهه،، يعني يغير لك المعطيات او يغير لك المطلوب وزي كدا

واصلاً يعني حتى لو مافي وورك شوب،، مستحيل افكار الاسئلة تخرج عنها،، يعني كان شامل لكل افكار المنهج

وكمان البروف كان يسوي لنا مراجعات قبل الاختبارات

يعني انا كنت اعتمد على الوورك شوب + المراجعات

لكن لو شالو الوورك شوب عنكم

اشوف الكتاب + شرح الدكتور + اسئلة اختبارات قديمه،، كافية

لكن لو ما فهمت مع دكتورك او احتجت شرح اكثر،، انصح بملخصات جمال السعدي

واهممم شيء،، اسئلة الاختبارات القديمه،، تتدرب عليها


-الدكاترة-

اول شيء درسني دكتور اسمو فؤاد ملاوي،، الاسبوعين الاولى

بعدين جانا الدكتور وليد الحمدان

فؤاد ملاوي،، مررررره انسان فلللله وشرحو بطل وتعاملو ابطل

وليد الحمدان،، كمان شرحو ممتاز،، لكن مرررره شديد في التحضير والمحاضرات وكدا

يعني لازم تكون انسان منتظم عندو


-تقسيم الدرجات-

30 دوري اول + 30 دوري ثاني + 40 فاينل


\\


2- الفيزياء:

-عن المادة-

بالنسبة ليا،، تجي في السهولة بعد الماث

بس يبغالها فهم اككثر،، وشده اكثر في المذاكرة،، وقوانينها تحفظها اول بأول

تتكلم عن قوانين نيوتن،، والمتجهات،، ووحدات القياس،، والحركة في خط مستقيم والحركة في مستوى

وحاجات ثانيه ناسيها


-طريقة المذاكرة-

المادة هذي للاسف ما معاك الا ملخصات

انصح بملخصات العربي ممتاز،،

وفيه كمان طلعت سالم وفيه اشرف بركات

بالنسبة لطلعت واشرف،، اذا بتشتري واحد منهم انا اشوف تشتري الثاني معاه لازم

لانو طلعت يهتم بالشرح اكثر من الامثله،، اما اشرف يككككرفك امثله من بداية الملخص لنهايتو

العربي اشوفو موازن بين الاثنين وهوا الافضل من وجهة نظري

وطبعاً ما انسى الاختبارات القديمة،، ع القليل تحل 3 اختبارات قديمة عشان تشوف فكرة الاسئلة وكدا


-الدكاترة-

بكل امانه،، ما سمعت عن دكتور صاحي في الفيزياء

كان يدرسني بروف اسمو محمد الحربي،، بصراحه كنت متهيء انا واتابع معاه الشرح

بس اخر شيء شفت اني اضيع وقتي وربي،،

يعني اشوف افضل شيء الملخصات


-تقسيم الدرجات-

30 دوري اول + 30 دوري ثاني + 40 فاينل


\\


3- مهارات الاتصال:

-عن المادة-

مادة سهللللللللللللللللللله جداً،، وترفع المعدل

تتكلم عن تعاملك مع الناس وتعاملك في العمل،، والتحدث والاستماع ومدري ايش

الحاجات هذي يعني

الموهيم انها مويييييييا،، حرام تضيع الـ a+ فيها


-طريقة المذاكرة-

ما يحتاج لها طريقة

انا كنت قبل الاختبار بيومين او يوم،، اقرأ المادة 4 او 3 مرات ،، بس بتركككيز

وبس


-الدكاترة-

ماقيد سمعت احد يشتكي من دكتورو صراحه،، مادري يعني هما كلهم كويسين ولا ايش

لكن انا درسني الدكتور سعيد نجيدة،، الله يسعدو يارررب

تعامل عسسسسسسسل،، ويساعد الطلاب بالدرجات،، طبعاً في تقسيم الدرجات في المادة هذي فيه 30 درجة بيد الدكتور

شعبتنا،، ادانا كلنا 30 اذا ما خانتني الذاكرة،، او ممكن كان فيه طالب او طالبين اخذو اقل بدرجة


-تقسيم الدرجات-

30 دوري ثاني + 40 فاينل

طبعاً مافيه دوري اول،، راح يطلبو منكم تكليف بدالو

نحنا طلب منا نعمل سيرة ذاتيه + عرض بور بوينت

وعمل لنا اختبار قراءة واستماع بسسسسيط مره من 5 درجات اتوقع

وهذي كلها عليها 30 درجة بدل الدوري الاول،، وهيا بيد الدكتور


\\


4- الحاسب:

-عن المادة-

نفس ما قلت عن مهارات الاتصال راح اقولو عن الحاسب،، مادة لرفع المعدل

جججججججججداً جداً جداً سهله،، يعني المفروض المادتين هذي تضمن فيها الـ a+

راح تدرسو اول شيء عن نظم التشغيل ،، بعدين الاوفيس (الوورد - الاكسس - الاكسل - البور بوينت) ،، وراح تدرسو عن الانترنت ومتصفح الاكسبلورر،، وكمان عن البريد الالكتروني والاوت لوك،، وبعدين جزء نظري عن التعليم عن بعد والتعليم الالكتروني


-طريقة المذاكرة-

بالنسبة للجزء العملي،، تطبق في البيت مرتين يعني كافيه،، الا اذا ماكنت فاهم حاول تطبق اكثر من مره
وكمان ركز مع الاستاذ حقك،، احياناً يذكرو حاجات مو موجوده في الكتاب ويمكن تجيك في العملي

اما الجزء النظري،، نفس فكرة مهارات الاتصال،، قبل الاختبار بيوم او يومين اقرأها 4 او 3 مرات بتركيز


-الدكاترة-

انا درست عند الاستاذ زكي الصبحي،، مرررره استاذ في قمة الاخلاق والتواضع

بكل امانه من افضل اللي درسوني في التحضيري

بس اهم شيء لا تستفل كثير عليه

ويساعد في درجات الاختبارات العملية،، اتذكر اقل واحد اخذ 24 او 23 من 25 في الاختبار

وممكن يعيد الاختبار للي درجاتهم نازله

الموهيم انو يوقف مع الطالب ويساعد باكثر شيء يقدر عليه

الله يجزاه خير ع كل شيء عملو معانا


-تقسم الدرجات-

25 عملي اول + 10 دروي اول + 25 عملي ثاني + 10 دوري ثاني + 30 فاينل

طبعاً انبه ع شيء،، الجزء اللي تختبروه خلاص ما ترجعو له،، هذا اطلق شيء في الحاسب

يعني اللي اختبرتوه في الدوري الاول والدوري الثاني ما يدخل معاكم في الفاينل



،،،

وبكدا اكون خلصت الترم الاول

ان شاء الله الرد الجاي عن الترم الثاني

[Ma3QoLa!]

بسم الله ،، نبدأ دحين مع الترم الثاني

بنفس تقسيم الرد الاول


،،،


1- الاحياء:

-عن المادة-

انا هذي المادة اعلن براءتي امام الله منها

بيني وبينها مشاكل من ايام الثانوي،، لذلك ما راح اكثر كلام فيها

بصراحه العن مادة بالنسبة ليا

لكن مو يعني انها صعبة جداً،، اعرف ناس جابو الـ a+ فيها


-طريقة المذاكرة-

السلايدات والسلايدات والسلايدات فقققققققط

لحد يقول لكم تست بانك،، ولا مني عارف ايه

حتى منسق المادة نفسو لا تصدقوه،، خليكم ع السلايدات

الا اذا تغير شيء رسمي،، اما بس كلام لا تصدقو احد وخليكم ع السلايدات

ولازم مذاكرة يومية،، ولا صدقني راح تتعب في مذاكرتها


-الدكاترة-

انا درست عند الدكتور محمد ابو السعود

من ناحية شرح،، يشرح تمام وبذمة وضمير

يكره الجوالات

وتعاملو كويس يعني مع الطلاب

ويسوي مراجعات قبل الاختبارات،، بس للامانه حضرت مراجعة الدوري الاول بس


-تقسيم الدرجات-

30 دوري اول + 30 دوري ثاني + 40 فاينل


\\


2- الكيمياء:

-عن المادة-

اممممممممممم،، يعني مادة مش بطالة

مو سهلة ولا صعبة

بس يبغالها مذاكككره وفهم

لانو يجيبو لك كم سؤال في الاختبار يبغالو تكون فاهم صحح

راح تدرسو عن الوحدات والقياسات،، والروابط الكيميائية،، والجدول الدوري،، ومقدمة عن الكيمياء العضوية ،، ومقدمة عن الكيمياء الحيوية

يمكن نسيت شيء مادري،، بس هذا الابرز


-طريقة المذاكرة-

بصراحه انا اعتمدت ع الملخصات،، ماحضرت الا 3 محاضرات في الترم دا بس

لانو الدكتور اللي درسني كان شرحو مش ولابد،، وكمان ما يحضر،، يعني ما شفت فايدة من حضوري

الدوري الاول،، اخذت ملخصات سيد + يوسف زويل،، لانو فيه اشياء واضحه في الاول ومو واضحه عند الثاني والعكس

الدوري الثاني والفاينل،، كان فيه شروحات فيديوات في موقع زويل ،، اشتركت عندو وذاكرت منها بس

لكن لو حبيت تاخذ ملخصات،، اشوف انو تاخذ الاثنين يوسف زويل وسيد،، يعني في حالة كان فيه شيء واضح عند واحد ومو واضح عند الثاني او العكس،، تكون ماخذ احتياطك

وطبعاً مع المذاكرة،، لاززززززززم لازززم تحل اختبارات قديمة

ولا ما راح تفيدك مذاكرتك


-الدكاترة-

اللي درسني اسمو مجدي عبدالعال،، احسن شيء عندو انو ما يحضر

اما شرح صراحه مرررره ما ناسبني،، حتى زي ما قلت لكم ما صرت احضر عندو

فيه الدكتور العنقري شرحو تممممام مره

هذا اللي اعرفو


-تقسيم الدرجات-

30 دوري اول + 30 دوري ثاني + 40 فاينل


\\


3- الاحصاء:

-عن المادة-

اطلللللق واححححلى مادة في الترم الثاني

جد جد كنت استمتع في محاضراتها،، صح انو مو سهلة مره ويبغالها فهم ،، بس مادة ممتعة في مذاكرتها

راح تدرسو اول شيء مقدمة عن الاحصاء واقسامه،، وبعدين عن البيانات وعرضها وجمعها،، وراح تدرسو مقاييس التشتت (المدى - الانحراف المعياري) وكمان مقاييس النزعه المركزية (الوسط الحسابي والوسيط والمنوال)،، وكمان الاحتمالات

وحاجات ثانيه نسيتها


-طريقة المذاكرة-

شرح الدكتور + ملخص السعدي

مع حل تمارين + اختبارات قديمة

كافية انك تجيب الـ a+ فيها ان شاء الله

بس اهم شيء انك تفهم السؤال وطريقة حله،، انتبه تحفظ الاسئلة


-الدكاترة-

انا درست عند الدكتور حسن عكاشة ،، مررررررره دكتور بطل

شرحو بطل + فله،، بصراحه اغلب محاضرتو تروح ضحك

مع انو اعرف ناس ما اعجبهم،، لكن بالنسبة ليا كنت افهم معاه وانبسط في محاضرتو

وفيه كمان الدكتور احمد العم،، هذا افضل دكتور احصاء على شهادة اللي درسو عندو،، انا حاولت انقل عندو بس ربي ما كتب،، والحمدلله



،،،

وبكدا اكون خلصت الترم الاول والثاني،، ويبقى الانجلش

،،،



- الانجلش:

انا ما درست الا المستوى الرابع،، يعني كل كلامي راح يكون عنو

تقريباً اللي درسناه في الثانوي بس بتوسع اكثر،، ويمكن فيه كم موضوع زايد

يتكلم عن الافعال المساعدة والاسئلة والازمنة المستمرة،، والازمنة التامة،، والمبني للمجهول والمبني للمعلوم،، وافعال المودلز

اممممم هذا اللي فاكرو،، لاني درستو في اخر الترم الاول

امممممم،، اللي اقدر اقولو عن المستوى الرابع

انو يعتمد ع الممارسة،، يعني يدرسوك عشان تمارس،، مو عشان تحل في الاختبار بس

وراح تلاحظ دا الشيء من خلال المحاضرات واختبار السبيكنق والرايتنق

يعني امممممممممممم،، تقريباً هذا اللي باقولو عن الانجلش



،،،

وبكدا الحمدلله اكون خلصت الكلام عن كل المواد

وان شاء الله الرد الجاي راح اكتب شوية نصايح يمكن تفيدكم

[Ma3QoLa!]

قبل ما اختم الموضوع،، شوية نقاط ونصائح حبيت اقولها لكم

- الموضوع زي ما قلت في البداية،، هو تجربتي انا،، يعني مو شيء مسلم به،، لازم تطبقوه،، لا هو مجد شيء مريت فيه في التحضيري،، وكتبت عنه من وجهة نظري،، ممكن الاقي ناس تختلف معايا مثلاً في سهولة المواد اللي شفتها سهله او العكس،، لكن في الاخير هيا وجهة نظري والطريقة اللي تعاملت انا فيها.


- مذاكرتي كانت عموماً،، شبه يومية،، (ماعدا مهارات الاتصال والحاسب)،، يعني ممكن احياناً ما اذاكر يومين ثلاثه،، بس بعدين ارجع اعوض الوقت اللي ضيعتو،، ماعدا الاحياء كانت يومية بالضببببط،، ونصيحة لو ما ذاكرت الاحياء يومياً راح تتعب والله،، لانو الكلام شويا كثير فيها

- اهممممم حاجه بعد المذاكرة،، انك تحل اسئلة اختبارات قديمة،، لازم لازم لازم تحل اسئلة اختبارات قديمة،، ع القليل 3 او 4 نماذج مختلفة

- في الجامعة،، محد راح يدور عليك،، انتا ونفسك،، اعتمادك ع نفسك 100%،، مثلاً غبت ترا محد بيدري عنك بس الفرق لو كان دكتورك يغيب راح يغيبك،، ولا راح يجي يسألك ليش تغيب،، يمكن لو عديت العدد المسموح بيه من الغيابات تاخذ حرمان محترم ،، عشان كدا لازم تنتبه ع نفسك ولا تغرك انو فيه حرية اكثر من المدرسة


- بتسمع ككككككككككثير هرجة "يقولو،، سمعت انو" ،، لا تسمع كلام احد ولا تاخذ الكلام الا من مصدر رسسسمي،، واسئلو اللي اخذو احياء الترم الاول السنة اللي فاتت كيف ضيعتهم هرجة "يقولو"


- في الاخير،، يمكن كثير بيسأل عن نتيجة التجربة،، انا الحمدلله بالتجربة هذي طلعت بمعدل عالي وكان يدخلني اي تخصص ابغاه الحمدلله

،،،

اتمنى اكون نقلت لكم الصورة واضحه

واسئل الله لكم التوفيق

اي سؤال او استفسار انا حاضر

سلااااااامو

[جنبك دروبي]

ربي يعطيك العافيه ي الغلا ..


والله صراحه انا كنت متخوف كثير من الجامعه , كثير يقولون انها صعبه ..

لاكن بعد ماقريت موضوعك حمسني كثير اني اجيب الفل مآرك بجميع الموآد ومآفي شي اسمه مستحيل ..

ربي يعطيك على قد نيتك ي الغالي , وبس عندي استفسآر بسيط ..

هل أحتآج اللاب توب بالجامعه أو لا ؟

وهل جميع المواد دراستهآ انجلش .!

وهل الدكآتره يتكلمون انجلش على طول الفتره ؟؟

وسلآمتك ي الغلا واكرر شكري لك ..

[كوروبا كايتو]

ماقصرت كفيت ووفيت وافدت
شـــــ
ـــكــــ
ــــر ا

[نص الملعب]

جزاك الله خيراً

[آمممآني]

مممممممممممممممممممممممششششككككور , الله يوفقققك بتخصصك يآرب
وشكرآ مرة ثآنية ع اهتمآمك انك توصل لنآ الكلآم ذا .
+ سؤال
السلايدات والآختبارات القديمة وين ألقاها ؟

[البـرنـس]

يعني الآن مهآرآت الاتصال


يقعد يسألك ويخليك تقرأ ويقيمك ع القرآءة ..؟
معليش بس مافهمت القرآءة والاستماع

[Ma3QoLa!]

المشاركة الأصلية كتبت بواسطة جنبك دروبي ربي يعطيك العافيه ي الغلا .. والله صراحه انا كنت متخوف كثير من الجامعه , كثير يقولون انها صعبه .. لاكن بعد ماقريت موضوعك حمسني كثير اني اجيب الفل مآرك بجميع الموآد ومآفي شي اسمه مستحيل .. ربي يعطيك على قد نيتك ي الغالي , وبس عندي استفسآر بسيط .. هل أحتآج اللاب توب بالجامعه أو لا ؟ وهل جميع المواد دراستهآ انجلش .! وهل الدكآتره يتكلمون انجلش على طول الفتره ؟؟ وسلآمتك ي الغلا واكرر شكري لك ..

ربي يعافيكك

لا ابداً مو صعبة،، بالعكس انا صراحه يمكن شفت انو الدراسة اسهل من الثانوي :

يمديك بالرررررراحه تجيب الفل مارك،، مو بس الـ a+

يعني قصدك تجيبو معاك الجامعة؟

لا ما يحتاج تجيبو معاك

اما لو قصدك يعني مثلاً لازم يكون عندك لاب توب،، ايوا اكيد لازم يكون معاك كمبيوتر

لانو احياناً بتلاقي مثلاً هنا شروحات او ملخصات او اسئلة او اي شيء،، وممكن تحتاج شيء من موقع الجامعة

بالنسبة للمسار العلمي،، يب كلها انجلش ماعدا مهارات الاتصال والحاسب

لالا الدكاتره يشرحو عربي،، الا اذا كان الدكتور ما يتكلم عربي

باستثناء الانجلش،، اكيد بالانجليزي

حياك ربي ^^

المشاركة الأصلية كتبت بواسطة كوروبا كايتو ماقصرت كفيت ووفيت وافدت شـــــ ـــكــــ ــــر ا

المشاركة الأصلية كتبت بواسطة نص الملعب جزاك الله خيراً

حياكم ربي،، وياكم يارب

المشاركة الأصلية كتبت بواسطة آمممآني مممممممممممممممممممممممششششككككور , الله يوفقققك بتخصصك يآرب وشكرآ مرة ثآنية ع اهتمآمك انك توصل لنآ الكلآم ذا . + سؤال السلايدات والآختبارات القديمة وين ألقاها ؟

العفوو،، وياكك ياررب

ولو،، واجبي

السلايدات من موقع كلية العلوم قسم الاحياء،، هذا الرابط حقها

http://bio.kau.edu.sa/Pages-%D8%A7%D...%8A%D8%A9.aspx

هذا لو حبيتي تطبعيها بنفسك،، او ممكن تشتريها من المكتبات اللي في الجامعة

عندك خوارزم والشقري ومكتبة 2000 ،، وغيرها

الاختبارات كمان من المكتبات،، او ممكن تلاقي في المنتدى،، بس انا كنت اخذها من المكتبات

المشاركة الأصلية كتبت بواسطة البـرنـس يعني الآن مهآرآت الاتصال يقعد يسألك ويخليك تقرأ ويقيمك ع القرآءة ..؟ معليش بس مافهمت القرآءة والاستماع

القراءة،، يديك ورقة فيها قطعة تقراها 5 دقايق بعدين يسحبها منك ويديك ورقة ثانية فيها اسئلة ع اللي قرأتو

والاستماع،، يشغل لك مقطع فيديو ع اللاب توب،، وبعدين يديك ورقة فيها اسئلة ع الشيء اللي جا في الفيديو

بس لا تخاف مررره سهالة،، واتوقع انو بس كدا حاجه روتينية،، يعني الجميع راح ياخذ درجتها كامله

[Sara Hussain]

-


جزاكك الله ككل خخير :))
ومشكوور <3
الله يوفقك :)