ليش جامعتنا كده !!

[loletaaaaa]

السلام عليكم
كيفكم

حبدا فالموضوع على طول امكن مو وقتو والناس الفتره دي بتسال عالاختبارات والاسئله بس برضو لايمنع انو الواحد يقول الي فنفسو


اليوم كنت فالجامعه فكليتي وانا ماره شفت دكتوره من الدكتورات تناقش الطالبه فبحس التخرج

عارفين كيف الدكتوره قاعده !!
والله العظيم لافه الكرسي الدوار عالناحيه التانيه مو من ضهرها لا من الجنب وشبه مسدوحه

وماسكه الورقه من طرف يدها كانها قرفانه والبنت مسكينه قاعده على طرف الكرسي حقها وخايفه باين عليها

دي مو اول مره اشوف الموقف ده وخصوصا من دي الدكتوره ودايما صحباتي يشتكو من هرجه بحس التخرج

ومواقف كتير تانيه
زي صحبتي اليوم تقولي انها دخلت على دكتوره تقولها يدكتوره الي قالتها معليش لو سمحتي اتفضلي برا

ده مو وقت ساعاتي المكتبيه:s

طيب مني فاهمه البنت كلو سوال وخارجه ليش تطردها

يالله احنا طلبه علم ومكاننا كبير عند ربنا اول شي لانو الي يسلك طريق للعلم ربنا يسهل لي طريق للجنه
حديس حفظونها هوا من سنه اولى ابتدائي وماعرفو يعاملو الناس كويس وهما ماشالله حاصلين على شهادات دكتوراه وماستر من هارفرد وامريكا وكل العالم

ولا هو مكان الانسان بس بشهاداتو

واصلا دايما لمن الواحد يقدم على وظيفه يقولولو نبا في الكوميومنيكيشن دورات في مهارات الاتصال وفن التعامل مع الاخرين
طيب الدكتورات ليش مايعرفو يطبقوها علينا ودايما المهانه والمزله دي
والله العظيم الموضوع مره قهرني كانو فيا لانو اتخيلت نفسي الترم الي جاي وانا اكرف فبحسي وماانام وقلق وفالاخير تمسكو من طرف يدها وماهي محترماني

والمشكله انو اكترهم كبار فالسن يعني المفروض يعرفو التعامل وانو الدين هو التعامل والاخلاق ودي عباده

يالله
وحطيت موضوعي فكليتنا بالزات لانو الكليات التانيه احسن لمن اخد سقافه او ماده حره من الاداب مره تعاملهم جيد وطيبين ويحترمو الطالبه وحتى الاقتصاد المنزلي في صحباتي هناك يقولو تحسي انو الدكتوره صاحبتك
وخلاص مافي شي بدي اضيفو :(

[عبود الفهلاوي]

ظاهرة العنف الأسري ... أمتدت الى العنف التعليمي ..
القضية ليست في أسلوب الخطاب فقط ... ولكن هناك اشياء أخري يتقدها المدرس لممارسة دورة ..
ولذالك أعتقد أنه زعلان ..؟ مع الزيادة وخلافة ...المفروض الامور أحسن...
الغريبة أنة هناك نوعيات من ما أشرتي له وهناك على النقيض آخرين أكثر حرصا على الطالب..
موضوع أساسا التعامل الانساني أولا...
عبود

[loletaaaaa]

المشاركة الأصلية كتبت بواسطة عبود الفهلاوي ظاهرة العنف الأسري ... أمتدت الى العنف التعليمي .. القضية ليست في أسلوب الخطاب فقط ... ولكن هناك اشياء أخري يتقدها المدرس لممارسة دورة .. ولذالك أعتقد أنه زعلان ..؟ مع الزيادة وخلافة ...المفروض الامور أحسن... الغريبة أنة هناك نوعيات من ما أشرتي له وهناك على النقيض آخرين أكثر حرصا على الطالب.. موضوع أساسا التعامل الانساني أولا... عبود

صح كلامك ميه لميه والله انها صارت قضيه والمفروض تتناقش فعيشو معنا ولا فام بي سي اف ام ولا اي برنامج يشوفو المجتمع كتير

امكن يحسو انو الي بيساوو غلط ولازم يراجعو نفسهم

مافي انسان مابيتعرض لمشاكل او ظروف بس حمدلله عارفين نفصل حياتنا الشخصيه عن حياتنا العمليه والجامعه

واحيان الواحد مايقدر صح من كتر الضغط عليه ويخرج حرتو فالي قدامو بس مره مرتين تلاته بالكتيير
مو دايما التعامل ده الين مايتعود انو يطالع للناس النظره الدونيه دي

[دلوعة الجامعه]

ماهي جديده

اهوه انا مترمطة في بحث تخرجي

وياليت في مساعده او اخطه تمشين عليها


كل شوي تغيري لين يعجبها

طيب لازم تكون هنالك مسؤله لطالبات البحث


لكن للاسف


اقعدي بالكلية من 9 لين 2

لين ياحمار تطلع لك قرنين

[loletaaaaa]

المشاركة الأصلية كتبت بواسطة دلوعة الجامعه ماهي جديده اهوه انا مترمطة في بحث تخرجي وياليت في مساعده او اخطه تمشين عليها كل شوي تغيري لين يعجبها طيب لازم تكون هنالك مسؤله لطالبات البحث لكن للاسف اقعدي بالكلية من 9 لين 2 لين ياحمار تطلع لك قرنين

وطبعا هيا تغير وتطلب اشياء جديده وانتي تكون اسبوع حايسه وتعبانه في وهيا بكل برود تقولك غيري

غير انو عندك مواد تانيه امكن البحس ده ياسر عليها

يالله الله يكون في عون الجميع ومايضيعلك تعب ياااااارب

[سما ليل]

طيب انا الاسبوع الماضي سلمت بحث للاستاذه قامت تطالع في شكلي بدل ما تطالع في البحث
وحطت لي 7 من 10
هي كذا بكيفها يعني
حسبي الله ونعم الوكيل
اني يوم القيامة ما راح يمروا من ايدي على طول

[loletaaaaa]

المشاركة الأصلية كتبت بواسطة سما ليل طيب انا الاسبوع الماضي سلمت بحث للاستاذه قامت تطالع في شكلي بدل ما تطالع في البحث وحطت لي 7 من 10 هي كذا بكيفها يعني حسبي الله ونعم الوكيل اني يوم القيامة ما راح يمروا من ايدي على طول

هوا ده الي مصبرنا ياسما انو في يوم قيامه وفي حساب ومحد ينظلم وقتها احيان الواحد يقول يلا يسيب شي لبعدين بلاشي ياخد كل شي دحين فالدنيا

وعلى حكايه الشكل والله كانت في استازه زي كده تدرسني لمن تشوف البنت ماركات ومدلعه وغنج تديها امتياز
والبنت الي عايدي ماتديها وعلى لسان قريبتها قالتلي ومنجد لاحظت ده الشي

وفي ناس على شكل البنت زي ماانتي قلتي
الله يعين بس

[علي العسيري]

والله على كلامكم هذا ماتستاهل تكون دكتوره ,, الشغاله الي عندنا البيت تعاملها مع الناس ارقى وافضل من هذه الصوره ,,


سبحان الله , لله في خلقه شؤن ,,

[loletaaaaa]

المشاركة الأصلية كتبت بواسطة علي العسيري والله على كلامكم هذا ماتستاهل تكون دكتوره ,, الشغاله الي عندنا البيت تعاملها مع الناس ارقى وافضل من هذه الصوره ,, سبحان الله , لله في خلقه شؤن ,,

ومع الاسف ده مثال واحد قلنا ولو قعدنا نكتب مواقفنا فالجامعه دي حتستصيبو:s

[noran.o.k]

الحمد لله اني ما مريت بموقف زي دا لأني ممكن ألوشها باللي فيدي
عشن انا ما بشحت منها انا جايبة مجهودي وتعبي
بس ما حزيد شي عن اللي قلتوه
حسبي الله ونعم الوكيل