الى طالبات كليه الاقتصاد المنزلي فينكم؟؟

[الدافوره]

انا طالبه جديده حكايتي باختصاراني جبت نسبه كويسه في الثانويه وكنت ابغى ادخل طب ودخلت الاختبار وما قبلوني المهم انا كلهم قالولي ادخلي علوم وانا بصراحه ما عجبني قلت مالي مستقبل غير في التدريس وانا ما احب التدريس طبعا مافي هندسه للبنات واداره واقتصاد بصراحه كل البنات الي نسبهم واطيه يدخلوه وفرص عمله للاولاد بس لانو مين البنت الي ح تشتغل في شركه او بنك وابوها او زوجها ح يرضولها طبعا لا ففي كتير نصحوني بكليه الاقتصاد المنزلي لانو اقسامها تفيد البنت في حياتها وحتى لو ما اشتغلت ح تستفيد انا القسم الي ابغاه غذاء وتغذيه سنتين ونص عام فيه طبخ وديكور وكروشيه وعلم نفس وكيمياءواحياء ودراسه الطفوله والسنتين ونص التانيه تخصص وادرس تغذيه مرضى وكيمياء حيويه احياء واسس تغذيه والتدريب طبعا في المستشفيات ولمن اتخرج اصير اخصائيه تغذيه فانا شفتو حلو وعلى فكره السنه الجيه اول سنه ليه وانا كل الي قلتو من المعلومات الي جمعتها من البنات الي اتخرجو او بيدرسوا اوكي انا مقتنعه بالكلام دا كلو بس كلو مو كلامي زي ما قلت فلو في احد عنده كلام تاني او نصيحه يقولي على فكره انا جديده ع المنتدى ليش مافي منتدى لكليه اقتصاد منزلي؟ ومن جد فينكم يابنات الاقتصاد المنزلي

[white angel]

هاي ياعسل انا من كلية الاقتصاد المنزلي
بس على فكره نص بنات الاقتصاد نسبهم عاليه لاكن الدنيا كدا كل واحد ياخذ نصيبه يعني انا نسبتي كانت 92% وقبلوني الترم التاني كمان وعديته والحمد لله يعني السنه الجايه إن شاء الله حاكون في الترم التاني بالنسبه ليا (فهمتيني )على العموم صاحبتي كمان متخرجه معايا لاكنه سجلت السنه دي يعني زيك ونسبتها كانت 97%
مواد الترم الاول حتكون امومه وطفوله , احياء عملي ونظري , علم نفس , ادارة منزل , عربي , 5مواد والدراسه 5 سنين واذا تبغي اي معلومات تانيه عادي اسالي احنا اخوات

[tola77]

السلام عليكم
أنا واحدة من طالبات كلية اقتصاد منزلي وتخصصي دراسات طفولة ، وبصراحة الكلية أكثر من رااااااااائعة ، صح فيها شغل وكرف بس والله ممتع ، وأنصحك انك ماتترددي والله يوفقك.
وذا احتجتي أي شئ قولي عادي..

[الدافوره]

تسلموا حبايبي ع الرد انا كان نفسي احد يشجعني ومن جدشجعتوني وحمستوني لدا القسم هو ترا قسم مو اي احد يعرفوا انا ما عرفتوا الي بعد ما اتخرجت من الثانويه من موقع الجامعه ومن البنات الي اعرفهم فيه وترى كل الناس يحسبوا بس طبيخ ومره سهل بس هو بالعكس دي السنه قفلوا التسجيل فيه للبنات الادبي على 93% وللمهني91% وللعلمي88% تعتبر نسب عاليه يعني مو قسم اي كلام (مدري ليه بادافع عنه مع اني ما دخلته) بس ان شاء الله حلو والله يوفقنا كلنا

[white angel]

اهلين ببنات الاقتصاد المنزلي الحلوين
بس نسيت اقلك انه اذا تحتاجي كتب الترم الاول ممكن اكلملك صحباتي اذا كان عندهم كتبهم لانه انا كتبي اعطيتها لصحبتي للي قلتلك عليها يللا ممكن تطلعو في شعبه وحده

[الدافوره]

تسلمي يا عسل وان شاء الله نكون في شعبه وحده
وعلى فكره ابسالك علشان اطلع بطاقه الجامعه لازم الكشف الطبي ولا لا وكيف اجيبه

[white angel]

طيب ياحلوه شوفي معايا اول حاجه تنزلي الخطوات من موقع الجامعه وخدي كل اوراقك المهمه بعدين روحي الجامعه حتلاقي عياده جنب كلية العلوم داخل الجامعه هما حيعملولك الكشف الطبي وبعدين روحي عمادة القبول والتسجيل او مكان ماسجلت هناك حيعملولك البطاقه حيصوروكي اول بس لا تضحكي على الصوره (حتفهمي كلامي لمن تشوفي الصوره)
يللا نشوفك ان شاء الله في الجامعه

[الدافوره]

لا يعني ما ينفع اجيب صوره معايا لازم هما يصوروني خساااااااااااااااااااااااااااااااااره
بس ان شاء الله تطلع حلوه
ع العموم شكرا يا عسل

[white angel]

ياحلوه ترى نزلت جداولنا اذا تحب تعرفي حاجه عن الجداول او اسماء بعض المواد غامضه اسير قوليلي طيب


اشوفك في الجامعه ان شاء الله

[KING OF BIO]

ولله تره يا دافوره احسن شئ سويتيه انك ما دخلتي طب تره يبغالو نفس طويل يعني تدرسي سبعه سنين بعدين تتخصصي لربع سنين تانيه ليييييييييش فين احنا عايشين وبعدين رواتبهم مو ديك القوه انا عمي دكتور وحالو حال والبنت الي تتخصص طب نادرا تلاقي زوج يتزوجها في مجتمعنا بس انا انصحك في كلية العلوم تره حلوه وتخصص الاحياء والكيمياء الحيويه حلو يميدك تشتغلي في المختبرات الطبيه انا متخصص احياء دقيقه وباقيلي سنتين ومجالاته مرررره حلوه بس قبل ما تدخلي اسألي وفكري انا هذا رايي