طريقة الاخلاء المفجعة !!

[osa_1]

5-1-1431هــــــ/الثلاثـــــاء

يوم امس كان عندي اختبار مادة مبادئ تسويق

وكان اختباري الساعة وحدة فقلت خلاص اروح الجامعة الساعة 12
وخليني استفيد من الوقت واذاكر في البيت.

وفي الطريق قلت للسواق تعال الساعة 3 عشان عندي اجتماع بحثي

بعد الاختبار مع الدكتورة فاطمة .

المهم وصلت جامعة الملك عبدالعزيز وفوراً رحت المبنى الرابع مكان

اختباري وجلست مع قروبي وشوية كدا بنطالع من الشباك الجو كان

وقتها حلو بمعنى الكلمة بس الجو هذا يفكرنا بكارثة جدة

بصراحة قلقنا شوية بس تفكيرنا مشغول بالأختبار.

حان وقت الاختبار وتوزعت الاوراق وبعد نصف ساعة تقريباًا او

اقل صرنا نسمع اصوات خارج الغرفة ونسمع كلمة اخلاء للمبنى

دخلت وحدة من المشرفات في المبنى وقالت للدكتورة خرجيهم اخلاء للصيانة .

الدكتورة قالت :مدام السالفة صيانة خليهم يخلصو الاختبار طيب

خرجت المشرفة وبعد دقايق تجي وحدة تانية تقول سيول على حي

الجامعة <<<<حالة رعب!!

البنات في الكلاس بيصرخو وانا رفعت راسي اطالع في الدكتورة

بفيس يقول : ايش نسوي؟؟

قالت كملو الاختبار رجعت للورقة والله العظيم صرت اشوف

الكلام اللي مكتوب شيء تاني ..

ابغى اجاوب واشوف كلمة سيل سيل وصرت افكر بأهلي ونفسي

وسواقي اللي قلت له تأخر اليوم .

ماادري ايش سويت وقلت سلمي الورقة خلاص والبنات كانو بجد

يقلقو الواحد اللي تجري واللي طاحت انا قلت شكلو السيل جاء

ودخل الجامعة ومايبغو يخوفونا

خرجت جلست مع القروب اللي متضايقين من الوضع والاختبار

فدقيت على سواقي وكان بعيد عليا فقلت لاتجي انا حروح مع صحبتي نورا
واتصلت على مامتي وطمنتها وقلت لها انا مش جاية البيت انا رايحة

مع نورا لبيتها.

كان نفسي اروح بيتنا واكون مع اهلي بس والله خفت على نورا

واخوها يوصلوني البيت ويصير شيء لاسمح الله فقلت اروح

معاها احسن <<<نورا اروع فرند عندي

وبجدربي يسعدها رحت معاها وجلست عندها وجلسنا نهرج انا

وهيا عن طريقة الاخلاء في الجامعة .

طريقة غبية جداً ومفجعة ولو اراد الله وجاء سيل في الجامعة مش

حتعيش ولاطالبة !!

ماقلت موظفات لانهم اخلو الموظفات من قبلنا بساعة عشان

خايفين عليهم من الزحمة ,كأنهم هم اللي بشر وبنات ناس واحناء

لا!!

بجد شيء مقلق في الطريق الشوارع مزحومة من السيارات

والمحلات مقفلة والله وضع موحلو .

إللي خلاني اكتب اليوم هو قهري من طريقة الاخلاء الغبية

بصراحة والزحمة اللي صارت واختبار التسويق اللي اضطرينا

نكملو واحناء موفايقين.

[جنات حياتك]

يالله بس اهم حاجة رجعتو بالسلامة
والحمد لله ع سلامتكم

[امونة المزيونة]

منجد الحمدالله ع السلااااااااامة
وبجد نحتااااااج لتوعية عشن نتصرف وقت الازماات..
موفقة يالغلاا..

[DNA..~]

حمدًا لله على السلامة..~

بصراحة بغض النظر عن النظام - مافي أخلاق - انا خرجت قبل الإخلاء لكن سمعت كلام من البنات عن المسؤولات و طريقة الأسلوب شيء سيء جدًا

ما علينا..

شيء مؤلم انكم تكملوا الاختبار في اوضاع زي كذا..

قلق..

يا رب ارحمنا برحمتك..

[بنت انشتاين]

والله جداا غبيــه طريقة اخلااءهم ..

انا كان عندي محاضرة كيمياء في 32 ومااا احد جانا وقال اخلوا المبنى ولا شئ ..

والعالم براا هاربه .. بس فجــاءه الجوالات كلها ترن في القاعه الاهالي يتصلوا على بنااتهم ..يقولوا اطلعوا من الجامعه
الدكتوره طبعاا مستمرره ..وبعدين خاافت من السؤوليه وقالت اطلعوا ما ابغى اتحمل مسوؤلية احد <<<<<<شوفووا ايش هامهاا في الموضوع والاروااح طزززززز يعني ..؟؟
الله ستر عليناااا من الحواادث اطريق مره كان زحمــــــــــــــــــــــــــــــــــه

[عماد الحسن]

لا حول ولا قوة إلا بالله والله يعينكم أخواتي على الجامعة وهمومها.

قصص غريبة جداً ، ومن حكمة الله تعالى إن سيول 8 الحج جات وقت الإجازة لأنها لو كانت وقت الدراسة كان صارت كارثة في الجامعة بالذات ... نحمد الله على كل حال والله يحمينا ويحمي كل بلاد المسلمين.

[دنيا جديده]

اللي صار يوم 8 خلى الناس كلها تخاف بشكل مو طبيعي
بس هذا مو أسلوب قال سيل قال وعلى الجامعه كمان
اساسا وقتها كان بس غيم ومامطرت الا العشاء
يعني الحمدالله ماخلونا احنا الانتساب نداوم
لاني المفروض اخرج الساعه 9 ونص
فالحمد الله ع كل حال
ويارب يحمينا ويرحمنا برحمته

[جنا السهلي]

الحمد لله على سلامتك واهم شي خرجت من الجامعة و انت بخير

[اه من الجامعه]

انا ابغى افهم لو جا سيل واحنـآ برى وشالنآآ ومتنـآآ ’

ليش مايخلونـآ بالمباني الا يطلعوونـآ فوق السطح احسن من انوو نطلع برى ,’

يعني زي يوم الثلاثاء والاخلاء اللي سوووه من جد كان فضييييع,’

الله يستترر بس,’وهاذي ايام اختبارات دوريهـ,’ وقلق ,’اه بس ~

[دنيا جديده]

المشاركة الأصلية كتبت بواسطة اه من الجامعه انا ابغى افهم لو جا سيل واحنـآ برى وشالنآآ ومتنـآآ ’ ليش مايخلونـآ بالمباني الا يطلعوونـآ فوق السطح احسن من انوو نطلع برى ,’ يعني زي يوم الثلاثاء والاخلاء اللي سوووه من جد كان فضييييع,’ الله يستترر بس,’وهاذي ايام اختبارات دوريهـ,’ وقلق ,’اه بس ~

صدقتي ياعسل وهذا اللي اللي مفروض يصير
يعني مو كل البنات بيوتهم جنب الجامعه
بس هذا اسمه اخلاء مسؤوليه
يعني بالعاميه بستين داهيه