ذوات القدرات الخــــاصة + الحوامل

[.,.نيــــــــــــــــــــران.,.]

بسم الله الرحمن الرحيم

الحمد لله ان ديننا الاسلامي دين رفق ورحمة

الاسبوع اللي فات وانا ماشية في عز الشمس لقيت بنت من اللي ربي كتب لهم الاعاقة الجسدية جاية من مبنى بعيــــــد وتسرع بعربيتها اليدوية على محاضرتها
طبعا المنظر لا يوصف :(

احنا اللي ربي عافانا في ابداننا نتعب نمشي من الجوهرة ل 13 (مع ان المسافة نسبيا قريبة) ونطلع سيارة
وهذي مسكينة تحرك العربية من مكان بعيد
طيب ليش مايكون في قولف كار خاص بالفئة الغالية ذي؟!

ثانيا : الحامل اللي تشيل نفسها وتشيل ثقل ثاني غير الكروب والالام اللي تجيها ، بدل ماتكون الاولوية للموظفة القديرة انه محجوز المكان اللي قدام لها
يحجزون المكان هذا للحامل واذا مافيه اوكي تركب البنت

واحيانا يكون البنت خلاص قيدها ركبت ، مايجوز ان الواحد يقوم أحد من مكانه لكن ذوقيا ومن الرحمة والأخوة المفروض البنت ترحم حالها وتقوم

عشان كذه من قاصرها السائقة تتأكد ان مافي حامل تحتاج الركوب وبعدين تسمح للبنات يطلعوا جنبها


أتمنى أن يصل الصوت هذا للمسئول

وبالله التوفيق

[Barah]

يعطيك الف عافيه يارب...
صح كلامك وياريت يوصل للمسئوله ...
وعلى فكره مكتب سائقات القولف كار في المبنى الثامن جنب الكفتريا تقدري تروحي وتكلميهم وهما يقترحو على مسئولتهم...
ربي يوفقك دنيا واخره يارب..

[جلكسي]

من جد معاكي حقك في كلامك الله يجزاك خير .......
ولازم كلامك إن شاء الله يوصل لا نو نشوف مناظر في الجامعة
من جد عيب مهما كان احنا مسلمات واخوات لازم نتساعد من قبل الكل لانو مافي احد احسن من التاني
الله يعطيك العافية ويوفقك يارب على طرحك لكلامك الحلو

[ام عبد الرحيم]

معاكم في هالفكرة..... لأنهم من جد يعانون ... وحتى بعض الأستاذات مايراعون ضروفهم .....

[روووني]

ياحلوه مره في وحده حامل جات تبغا تطلع في القولف كار وكان في لها مكان تقوم تجيكي وحده تدفها بكتفها وتجلس

مكانها!!!!هيا بلاهي عليكي هدي ايش تسميها قله ادب ولا قله حيا ولاقله زوق ولاحتى قله رحمه

ياناس فين الرحمه راحت والله انا حتى لو كنت راكبه قبلها وشفت وحده حامل جايه من بعيد حاقوم واخليها تجلس

يعني عيب مرره وحرام بس ايش تقولي بنات مو شايفين خيرفكيف تبغي الاستازات والدكتورات يرحموا البنات والبنات

اصلا مو راحمين بعضهم!!!

قرار اتمنى انو يتطبق فعلا لانو احنا نفر واحد ونتعب كيف هما اللي اتنين في واحد

[ღ ريم الفلآ ღ]

كلآمك صحيح بقوهـ ..

مآفي تعآون وكل وحده يالله نفسي ..

من نآحيتي آحزن لمـآ آشوف حآمل تمشي بالحر هذآ والسيآرآت تكون مليآنه ومآفي مكآن لهـآ

ربي يكون في عونهم ..

وإن شآء الله تصحى الجآمعه وتنظم كل شي فيه ظلم ..

[Mo0oNE]

الله يجزاك الخيير يالغلآ

بس اتمنى احد يسمع ويحس سيبي المسؤوليين انا بقوول كم ناحية البنات

الله يهديهم بس

[shada_Ak]

انا معاكم

اتمنى يوصل الكلام دا للكبار واتمنى كمان البنات يكون عندهم شويه دم ويحسو باللي لهم وضع خاص

[تخصص 13]

في وحده الله يجزاها الخير من حقون القولف كده مره نسلت بنت عشان تركب وحده من ذوات القدرات الخاصة

بس ياليت الكل يطبقها

[ضــــي القمر]

.

من جد ياليت يكون للحامل وذوي الإحتياجات الخاصة أولوية في ركوب القولف كار

كم مرررهـ أشووف مواقف تقهر صراحه ..!

واسلوب البنات سيء في ركوبها لدرجه إن الحامل ماتقدر تدخل بين البنات

.

الله يعيـــن

.
.
!