ردا على تساؤلات الاخوان بخصوص الاعفاء وطريقة ارسال الاوراق دون الحضور

[Super Linux]

بسم الله الرحمن الرحيم

السلام عليكم ورحمة الله وبركاته

طبعا محدثكم قبل نص ساعه كان في عمادة خدمة المجتمع

والحمد لله الامور زينه والعماده فاضيه مدري وش السالفه الناس ماتبي تقدم ولا وشو اتوقع الي وصلت لهم رسائل عددهم قليل جدا

طبعا انا كما وعدتكم امس اني بجيب لكم جواب لااكثر الاسئله التي تدور حول الاعفاء

اولا اليوم سارلي موقف خلاني شوي وامسك الموظف وارفع فيه وربي يقهر والمشكله قحطاني مع اني اشك في هذه الملامح تقول غير ذلك

ثانيا محدثكم فتح بوابة الجامعه اليوم هههههههههههههه على بالي زحمه اول من ووصل لعماده انا
مافي احد لاموظفين ولاطلاب اعفاء لاني لقيت ثلاث كلهم جاين لغير الاعفاء

وطبعا وصلت 8 ونص على الدوام قلت ماشاء الله الموظفين مايقصرون يجون قبل الدوام ب 5 دقائق هههههه

طبعا خاب ظني فيهم لان الشعب السعودي معروف لو ماتأخر عن الدوام نص ساعه تجيه نفسيه الا من رحم ربي

المهم وصل الموظف الي هو القحطاني وانا اكره على فكره ^_^ سارلي موقف معه اليوم وزاد كرهي له

وصل وقمنا طبعا وصلو طالبين او ثلاث معي سئلنا جاتكم رسائل على الجوال قلنا ايه وصلت ولله الحمد

قال استريحو 5 دقائق طبعا عندنا ال5 دقائق يعني ربع ساعه خخخخخخخخ
المهم قال اول واحد يجي واقوم انا بكل ثقه والابتسامه لاتفارقني ^_^

عاصم : سلام عليكم
الموظف : جاتك رساله << طبعا مارد السلام
عاصم : هالله هالله
الموظف: اسمك
عاصم : عطيته اسمي كامل وجالس اتلفت يمين وشمال << طبعا هذه حركات الواثقين هع
الموظف: متأكد جاتك رساله
عاصم: ايه سلمك الله << انعدمة الثقه والدمعة على وشك الهطول ههههههههههههههههههه
الموظف : معاك رقم الطلب
عاصم : لا
الموظف : استريح شوي
عاصم : وش الي استريح تبي رقم الطلب الان اجيب لكم موقع الجامعه بكبره واطلع لك رقم الطلب ههههه

اتصلت على اخوي طبعا نايم من جد مو وقته وروحت النشاط الطلاب فيه نت بس الموقع مو شغال الحظ لاعكس خلاص انسى ان امورك تتسلك ههههه

والله رجعت الحمد لله مالقيت الموظف القحطاني فيه موظف ثاني توه جاي روحت له عطيته اسمي ماشاء الله تبارك الله على طول عطاني رقم الطلب

قلت وانا اشهد انك كفو

المهم اخذ الاوراق وكتب عليها تمت المطابقه وهو ماشاف الاصل موظف فله صح
طبعا انا سطيت عليه قلت راح انبرش له بكم سؤال
______________________________________
السؤال الاول : سلمك الله الي مايقدر يحضر عشان يقدم الاوراق وش يسوي
الجواب: يرسلها dhl
______________________________________
السؤال الثاني : طيب ياطويل العمر الي سدد وجاته رساله
الجواب : عادي يجي يقدم الاوراق والاعفاء يبدء له من الترم الجاي اوتوماتيك
______________________________________
السؤال الثالث: طيب الاعفاء لترم واحد ولا الين اتخرج
الجواب : طبعا الين تتخرج بشرط المعدل ماينزل تحت 2.75
______________________________________
السؤال الرابع : الي ظروفه صعبه وماجاته رساله وش يسوي
الجواب : مااقدر افيدك انا جديد
______________________________________
السؤال الخامس: متى تظهر نتيجة الاعفاء
الجواب : نهاية الشهر
______________________________________
السؤال السادس : الي جاته رساله
الجواب : يسدد الله لايهينه
______________________________________

بالنسبه للاخوان الي يسئلون عن الاوراق المطلوبه
1- اثبات عقد الايجار
2- اثبات براتب ولي لامر من مقر عمله او راتب التقاعد
3- اثبات معدل الجامعب من الادوس
4- صوره من الهويه الشخصيه للطالب او الطالبه
5- صوره من هويه ولي الامر سواء اب زوج اخ اذ كان الاب متوفي احضار شهادةالوفاه
6- صوره من هويه المرافقين معكم في المنزل
7- اذا كانت الطالبه مطلقه او ارمله عليها اثبات ذلك بصك الطلاق او شهاده الوفاه
8- تقديم مايثبت من اوراق اذا لديك اي التزامات ماليه
9- تقديم تقرير طبي في حاله المرض لاسمح الله
مع احضار الاصول للمطابقه
-----------------------------------------------------------------
مع العلم اني سلمت غير الاوراق المطلوبه

اهم شي تثبت انك ماتقدر تسدد وان دخلك قليل عدد افراد الاسره كثير والدخل قليل زي كذا مثلا

لاتعتمدون على ورق معين الله يجزاكم خير شيل اي شي قدامك
<< قدم 10 ورقات هههههههه

اخر شي قالي لا أشوف وجهك ياوبصت طبعا مايعرفون معناها الى الحروب الصبوح هع

المهم انا ورايه طلاب ماني معبرهم << يستغل الفرص والحياه فرص ههههه

اخر شي اقول للي ماوصلت له رساله الله يعوضك خير وشد حيلك لان الي معدله عالي يقدر ينعفي حتى ولو ظروفه تمام
الجامعه مستحيل يجيها واحد معدله 4.50 او اعلى و يقولون له لا

هذا توقعاتي على حسب خبرتي < ههه ^_^

هذا وصلى الله على نبينا محمد وعلى اله وصحبه اجمعين

ادعولي انقبل في الاعفاء الله يرحم والديكم

محدثكم عاصم الحربي

[bandar_r]

الف مبروك اخوي

تتوقع فيه دفعة جديدة حيرسلوا لهم مسجات ولا اكتفوا باللي رسلوا لهم امس؟؟؟

[Super Linux]

المشاركة الأصلية كتبت بواسطة bandar_r الف مبروك اخوي تتوقع فيه دفعة جديدة حيرسلوا لهم مسجات ولا اكتفوا باللي رسلوا لهم امس؟؟؟

الله يبارك بعمرك وعقبالك ان شاء الله

ياشيخ وينك من اول والله سؤلك مهم جدا جدا جدا

والله مدري مااقدر افيدك لكن ماعليك اعرف ناس راح يطلعون بكره ان شاء الله يشوفون لنا السالفه

وربك ييسر الامور

[bandar_r]

ياليت والله ...

الله يجزاكم خير ...

[نجمة الليل]

انا معدلي 4.5 وما اقبلوني
ولا ارسلولي رسالة

[afoOoOna]

الصراحه هههههههههههههههههههههههه ضحكتني قصتك عموماالف مبروك يعني اروح اقدم اوراقي لانوجاتني المسج بس انا والدي متوفي واخوي يشتغل لازم احط تعريف براتب اخويا ولا اكتفي بشهاده الوفاه والمرافقين معايا في عقد الايجار

[لاحول ولاقوه الابالله]

بالتوفيق للجميع بس قهر ماقبلوني والله شغله الحين من وين اجيب لي 6000 انا واختي والمشكله ابوي راتبه 3000 عن جد غريبين الله يعين

[Super Linux]

المشاركة الأصلية كتبت بواسطة نجمة الليل انا معدلي 4.5 وما اقبلوني ولا ارسلولي رسالة

غريبه

لكن الافضل لك انك تراجعين العماده

هم يبيلهم واحد يدوشهم

والله يوفقك

[Super Linux]

المشاركة الأصلية كتبت بواسطة bandar_r ياليت والله ... الله يجزاكم خير ...

ابشر بعزك

والله يسهل امرك

[Super Linux]

المشاركة الأصلية كتبت بواسطة afoooona الصراحه هههههههههههههههههههههههه ضحكتني قصتك عموماالف مبروك يعني اروح اقدم اوراقي لانوجاتني المسج بس انا والدي متوفي واخوي يشتغل لازم احط تعريف براتب اخويا ولا اكتفي بشهاده الوفاه والمرافقين معايا في عقد الايجار

^_^ دوم هالضحكه

طبعا قدمي وش تستنين

انا نفس حالتك الوالد متوفي الله يرحمه جبت لهم شهادة الوفاه

بالنسبه بتعريف راتب اخوك جيبيه عادي

على فكره هم مايطلبون اوراقه معينه جيبي الي تجيبنه

اللهم طلب حاجه وحده قالي معاك كرت العائله وبس

والله يسهل امرك