المدارس الأهلية, الرزق الجميل

[مطالبة]

السلام عليكم ورحمة الله

اللي شجعني افتح هذا الموضوع هو سؤال لواحدة من الأخوات عن العقود في المدارس الأهلية
وبحكم خبرتي فيها حابة نفتح موضوع نقاش وتعريف بالعمل في المدارس الأهلية, اللي تعرف عنها تكتب معانا عشان نوعي الغير واللي حابة تسأل برضو الموضوع مفتوح .

عن نفسي ومن خبرتي في المدارس الأهلية, اعتبر العمل فيها باب رزق جميل, على غرار تسمية شركة عبداللطيف جميل, ماننكر انه باب رزق لكن قد نختلف على لفظة جميل, اقولكم ليه جميل,
اولا لأن الرزق مو بقيمته بل ببركته وماحيصدق الا اللي جرب ان 50 ريال تسعدك و1000ريال ممكن تورطك في مشكلة, ان 50 ريال تفك ضيقتك و1000 ريال تفتح لك باب ضيق, طبعا مانخالف المنطق ونقول ان الخمسين افضل من الألف لا طبعا, الأالف تجيب اكثر مما تجيب 50 لكن ماحد يدري البركة فين!!لذلك لاتستقلي المال.

ثانيا العمل في المدارس الأهلية فيه قيمة مضافة, يعني تدخليها وانتي لسا خريجة حيلتك وثيقتك, وتخرجي بعد عام واحد بوثيقتك وخبرة سنة ودورات مجانية تبع الوزارة بالإضافة انك اكتسبتي كم خلق ماحتلاقيها الا بالعمل وهيه الصبر واحترام العمل وفن التعامل مع الأخرين, طيب كل الوضايف تعطيك قيمة مضافة, لكن الأهلية ماتستنزفك, يعني الأهلية تترك لك باقي اليوم ملكك, تمارسي حياتك عادي, تبدئي حياتك الزوجية لو توك عروسة, تفكري بحمل لأن الضروف مريحة تدرسي لو مخططة ماستر تتدربي كثير تقدري تسويه من بعد الساعة2 الين 12 الليل

ثالثا وضيفة مناسبة للجميع بنت او متزوجة , اهلك او زوجك مشددين برضو ماحيقولو شي على العمل في مدرسة

رابعا طبيعة عمل مشابهه للأنظمة العالمية, من حيث البحث عن الكفاءة والخبرة والتميز(بعدين حنتكلم بالتفصيل)

خامسا طلباتهم المبدئية هينة وثيقة بكلوريوس فقط لاغير, كل شي اخر هو زيادة للمفاضلة يعني كل واحدة تقدرر تشتغل في مدرسة خاصة

حنتابع الموضوع ونكتب الكثير عن المدارس الأهلية
في دعوة لتغيير نظرة الباحثات عن وظائف للعمل في مدارس خاصة

تحياتي للجميع

[مطالبة]

على فكرة نزل تعميم من كم سنة
بالفرق بين المدارس الأهلية والمدارس الخاصة
مدرسة اهلية يعني تمويلها من قبل الأهالي
مدرسة خاصة يعني تهتم بذوي الإحتياجات الخاصة

عشان أكلمك بجدية عن المدارس الخاصة
لازم اقولكم سيرتي الذاتية
انا خريجة ماجستير تربوي
خبرة 9سنوات تربوية كمعلمة في المدارس الأهلية بمدينة جدة (شمال جدة تحديدا)
بدايتي كانت براتب 1200ريال
اخر مدرسة اشتغلت فيها كان راتبي 3000ريال الا 50
حصيلة دوراتي التدريبية في المدارس الأهلية كانت 10دورات تدريبية
بالإضافة لدورات كثير كنت اخذها بدون شهادات, وللأسف مااتذكر اسمائها كنت في بداياتي واهتم بس بالشهادات
8سنوات كان تقديري ممتاز اول سنة فقط جيدجدا, وكنت معلمة متميزة بشهادة ادارات المدارس اللي عملت فيها, وبشهادة الأهالي اللي كانو يدورا يدخلو بناتهم فصلي, لأني كنت معلمة صف ثالث ابتدائي كل المواد

الحمد لله هذا من فضل ربي
لذلك واتباعا لقول الله تعالى( واما بنعمة ربك فحدث) حنقل لكم خلاصة تجربتي تباعا هنا واتمنى مشاركة الجميع بالإضافة او السؤال

تحياتي

[حفيده الرسول]

كلامك أكثر من رائع و الله يوفقك يا رب
أما انا عن نفسى مقتنعه بكلامك و بأن الخبره مهمه
و كنت اتمنى القى وظيفه فى اى مدرسه خاصه او أهليه بس اللهم لك الحمد على كل حال

[مطالبة]

خاطة النجاح في العمل في القطاع الخاص عامة
والعمل في المدارس الأهلية خاصة

( انا ملاحظة ان عندي اخطاء املائية ياليت تتجاوزا عنها بسبب سرعتي, المعذرة)

المدارس الأهلية فيها خير كثير
وتحسي نفسك تشتغلي صح
لنهم يهتموا بالتميز
والدورات والنشاط
انا درست في 4 مدارس
وانا اللي كل مرة اترك واروح لمدرسة ارقى تتفق مع طموحاتي

الخلطة السرية للنجاح دايما:
النشاط( مو خارجة من بيتك, خلاص اتوكلي على الله واشتغلي كل مدة العمل الأجانب كل 8ساعات بريك نص ساعة والمدارس الخاصة نظامها اقرب لنظام العمل برى من نظام العمل الحكومي هنا يعني لا تطالعي في الحكومي وتتحسري على سفر الفطور الجماعي وكأبة المعلمات)


التنمية الذاتية(دربي نفسك بالدورات المعتمدة او بالدورات عن بعد او بقراءة كتاب وتلخيص فكرته وعرضها على مديرتك, واستفيدي فعلا يعني حضرتي دورة القراءة السريعة مثلا روحي لمديرتك بشهادتك واعرضي فكرة انك تدربي زميلاتك او تدربي قروب بنات مختار وطبعا لازم لازم البنات اللي تكوني تدرسيهم ياخذو نصيبهم من دورتك, اجل ادربتي ليش؟؟)

بالنسبة للدورات
شوفي مركز مهارتي
http://www.maharty.com/
دوراتهم جدا رائعة
وسعرها فقط100 ريال
بس انصحكم لاتجمعي شهادات بدون ماتكوني دربتي نفسك كويس
لأنه حيبان
من اول اسبوع يبان اللي اخذت تدريب واللي مااخذت وقتها ماتنفعك شهاداتك
والتدريب عن بعد يعتمد على التعلم الذاتي يعني دربي نفسك بنفسك
وهم مو اغبياء
او ماتشوفك ماخذة دورتين لهم نفس التاريخ تشك فيك وفي جدارتك ساعتها حتى لو انبهرت بكثرة شهاداتك تعرف انك مزورتها( حتى لو ماخذتها من اكاديمية محترمة هيه تشوف اللي قدامها ولهم نظرتهم الفاحصة من كثر مايقابلو كل يوم متقدمات لوظايف)

كمان http://www.707077.com/index.php
برضو عندهم كم دورة حلوة

لكن اتقوا الله
لاتكذبي فتجازي بمحق البركة اولا وبالعسر دائما



القدرة على العمل ضمن فريق عمل
ويسموها العمل ضمن مجموعة
او ادارة فرق العمل
ممكن تاخذيها دورة
لكن مهم جدا تعرفي كل مهارة من مهاراتها وتبدئي تطبقيها وانتي في بيتك


السعي نحو التميز
لاحظي قلنا العمل ضمن مجموعة
بس مو لدرجة تضيع هويتك
لازم تسعي لتميز فردي يميزك
وهذا مو انانية
بالعكس الغرق ضمن العمل الجماعي يخليك فاشلة حتى في العمل الجماعي
اذكر مرة قالت لي دكتورة
العمل الجماعي مو نمسك الكاسة سوى ,ونشرب سوى
لكن واحدة تعبي الكاسة واحدة توصلها واحدة تنظفها وكل واحدة تعمل مهمتها بأعلى جودة
يعني فيه عمل فردي ضمن المجموعة
وفيه عمل فردي بقصد التميز الشخصي
والثنتين بنفس الأهمية
المدارس ماتبغى معلمات طبق الأصل
يبغى اختلاف يبعث المنافسة ويضيف للمدرسة
ايام عملي
كانت بعض المدارس تتميز لأن عندهم(ابلة فلانة) شوفو كيف التميز حتى على مستوى المدارس

على فكرة المدارس تتميز بمعلماتها وبمنتجهم اللي هم الطالبات
لكم ماتتميز عشان ادارتها او مبانيها
ثقي بنفسك وكوني الأفضل

يدي تعبت حاخذ راحة وارجع اكمل في حال كان الموضوع له اهمية

تحياتي
ودعواتكم

[مطالبة]

المشاركة الأصلية كتبت بواسطة حفيده الرسول كلامك أكثر من رائع و الله يوفقك يا رب أما انا عن نفسى مقتنعه بكلامك و بأن الخبره مهمه و كنت اتمنى القى وظيفه فى اى مدرسه خاصه او أهليه بس اللهم لك الحمد على كل حال

احتاج دعائك
ربي يوفقك
شوفي
تعالي قدمي في المدارس شمال جدة
في الحي الواحد مو اقل من 5مدارس
ولو ماعندك دورات وخبرات
ابدئي بالمادرس الصغيرة
اقبلي اي راتب
المهم تبدئي
تحياتي

ربي ييسر امرك

[حفيده الرسول]

ممكن ترسليلى عالخاص اسماء او عناوين المدارس اللى تقولى عليها و انا مستعده اتوظف مهما كان الراتب

[مطالبة]

عشان الفايدة تكون عامة
حكتب اسماء مجموعة مدارس هنا
خذي سيرتك الذاتية حطيها في جيب بلاستيك وكل مدرسة حطي سيرتك

اتفضلي

مدارس في حي النعيم
ذات النطاقين
الشعلة
الدلال

مدارس حي النهضة
انجال البساتين
زهرة الربيع
الصديق
المسيرة

مدارس حي الزهراء
دار الحنان
دار الهدى
الكوثر

مدارس حي الشاطي
الرواد

مدارس حي السلامة
المعرفة
الرسالة

كمان فيه في حي المرجان
الثريا


وفيه اكثر بس مو حافظة
لو تذكرت شي رجعت كتبته


المدارس الكبيرة ماتقفل في الصيف
لكن اللي ماعنده خبرة ودورات لايأمل في الكبيرة
يروح للصغيرة كمان
وبما انها غالبا مقفولة
كل مدرسة توصلين عندها
اكتبي اسمها وكل الأرقام الموجودة(في دفتر البحث عن وظيفة ولاتستهوني بهذا الدفتر حيخدمك كثير)
وكلمي الحارس ممكن يديك كرت مديرة المدرسة
قولي ابغى مديرة المدرسة بيعطيك رقمها
مو تقولي بقدم وظيفة لأن الشيء هذا قد ماهو مهم لك مو مهم له, هو اهم شي عنده يخدم المديرة واي شي له صلة بالمديرة بيسويه

الله يوفق الجميع

[رقة الورد]

شكرا لك..ننتظر منك المزيد

[عفت]

مشكورة يا اخت مطالبة موضوعك جدا مفيد

بالتوفيق للجميع

[شعاع الاماكن]

الله يسعدك كلامكم مرررة مفيد طبعاً انا توني خريجة وحابة اقدم على المدارس الاهلية وان شاء الله استفيد منكم ومن الاخوات,,,,,,,,,,,,,