يا أيها الذين كتب الله لهم القبول في الطب .. هلموا

[د.فهد جراد]

<<>>

[fofomoon]

السنة التحضيرية كانت اعاده للي اخذناه بالثانوي بس باللغة الانجليزية
مادة الانجليزي صعبوتها كانت ان كل يوم طلعوا لنا قرار جديد وتوزيع جديد للدرجات واذا انت لغتك النجليزيه كويسه تقدر تعدي الاختبار حتى بدون مذاكره بس مو معناه انك تطنش وما تذاكر

[Dr~NanoOok]

السلام عليكم ورحمة الله

اهلا بيك أخي.. وأحيي فيك الروح والاجتهاد الواضح فيك
ربي يوفقك دنيا وآخرة.. ويختارلك الخير آمين

وماشالله اللي أخوتي اللي قبلي ما قصرّوا و كلموك عن السنة التحضيرية

لكني ما عشت السنة التحضيرية ولا جربتها (كنا آخر دفعة قبل نظام التحضيري)

وكانت أول سنة جامعية.. على طول أولى بالتخصص !
و لك أن تتخيل كيف الوضع "^^


عالم جديد.. وتجربة جديدة..
دراسة بالانجليزي.. و دكاترة ومحاضرات وكل شي

وكانت هناك منافسة كبيرة ماشالله بين الطالبات في الدراسة
و تعرف لما تكون بالمدرسة.. هناك تفاوت في مستوى الطلبة
ما بين ممتاز ومتوسط وضعيف

لكن هنا بالكليات الصحية.. النخبة من الطلبة هم فيها
و فعلا حسيت بالفرق
ولكنه كان في صالحنا.. لأنه خلانا كلنا نتحمس ونجتهد و نعمل أفضل ما عندنا

غير ان الأغلبية كان حاب يحوّل من القسم
( كنت بسنة أولى في العلوم الطبية التطبيقية.. بعدها حولّت على ثانية طب أسنان)
والكل يبغى يجيب معدلات عالية للتحويل
<< نفس الشي عندكم بالتحضيري عشان التسكين


بالنسبة للمواد.. كنا تقريبا ناخد نفس المواد حقت التحضيري
إلا اننا نتوسع بشكل أكبر في المجال الصحي.. يعني بناخد كيمياء طبية وما يتعلق بها
وفيزياء طبية وهكذا.. والأحياء كان مكثف عن جسم الانسان

وكنا ناخد مادة المصطلحات الطبية .. فالدكاترة على طول بيطبقوا في المواد الأخرى عليها
وخاصة في الأحياء

<< طبعا في البداية كان صعب علينا.. أول مره ندرس بالانجليزي ولا اتعرفنا على أجهزة الجسم مثلا باسمها الانجليزي
وكمان نحفظها باللاتيني والنصطلح الطبي حقها "^^
لكنه ربي يسرها وصارت من أسهل الأمور الحمدلله مع التعود والمزاكرة


واللغة أبدا مو عائق .. ولا تعتبرها كده
بالبداية حتاخد وقت.. لكن بعدين حيسهل كتيييييييييير
وبدل ما تترجم تلات ارباع الصفحة .. حتترجم كم كلمة فقط منها !
وهذا انجاز كبير الصراحة

وصدقني مع الوقت.. حتشوف ان المزاكرة بالانجليزي جدا أسهل من العربي
حتى لما كانت عندنا مادة بالعربي في الترم الثاني من سنة أولى << لاحظ انها مدة لا تعتبر طويلة

صرنا نترجم بعض الكلمات من عربي الى انجليزي لسهولة حفظها "^^
ايوا والله عملنا كده !

وكان الانجلش عندنا مره مكثف.. تقريبا كل يوم 4-5 ساعات انجليزي
وما كانت فيه نظام المستويات في الانجلش
يعني اذا مستواك كويس أو ضعيف حتدرس كل دي الساعات حتدرس

إلا اللي عندهم شهادة التوفل أو ما يعادلها

لكنه أفادني كثير الصراحة.. واكتشفت ان اللغة الانجليزية فيها الكثير انا ما اكتشفته
وخاصة في القواعد grammer .. تقريبا بالمدرسة قالولنا ان اغلب القواعد اخدناها خلاص
وحتى صاروا يعيدوا ويزيدوا فيها في منهج ثالث ثانوي وكان مره سهل

لكن في مستويات أعلى.. وأشياء متقدمة أخرى
والحمدلله اني قدرت أدرسها واستفيد منها

واذكر كمان مادة من ضمن الانجليزي.. اسمها reading in medicine
نقرأ فيها حالات و نكتب التاريخ المرضي وحاجات زي كده
كان مررره صعب علينا وقتها.. لكنها سهلت علينا كثير في ثانية وثالثة طب

~

وكثيرين حيقولولك ان سنة اولى مره سهههههههلة
وخاصة بعد ما جربوا الدراسة بسنة ثانية
<< وهنا يبدأ دراسة الطب الفعلي

وهو أكثر شي يحمس ^^
وفعلا بتدرس شي بتحبه وتقدر تبدع فيه

وبرضو هنا يبدأ الجد والاجتهاد

~

حبيت أشاركك بعض من تجربتي.. وإن شاء الله لك الفائدة منها

و بالتوفيق لك

[د.فهد جراد]

الله يبارك فيكم جميعا ويسعدكم ويشرح صدوركم

fofomoon و dr~nano0ok تحياتي لكم وتقديري

حقا هناك عينات طيبة

تحياتي
د.فهد جراد

[S A L M A N]

حياك الله أخوي فهد وإن شاء الله نشوفك معانا في الكلية

السنة التحضيرية جدا سهلة دام إنك ملحق على المواد وعارف أيش المطلوب منك وتتجهز للاختبارات تجهيز كويس(طبعا فترة وطريقة المذاكرة تعتمد عليك في ناس قبل الاختبار بأسبوعين يذاكروا من الكتاب والملخصات والمحاضرات وناس يذاكروا ليلة الاختبار من مصدر واحد فقط وفي النهاية يجيبوا نفس الدرجة)

دامك لسا حتبدا ثالثة ثانوي أنصحك تفل وتنبسط على الآخر السنتين الجاية في حياتك لأنه بعدها حياتك حتصير مضغوطة (طبعا لو إنت حاب الطب حتكون مبسوط بس برضو مكروف لآخر رمق)

آخر حاجة ناس كتير تهملها هي إنك تتعود على الكلام في بيئة طبية (مثلا اقرأ مواضيع صحية عامة منها تزيد ثقافتك وقدرتك على التعبير الطبي، ممكن تتفرج مسلسل House M.Dو ER تتعشان تتعود على سماع كلمات ونطقها بشكل سليم)

في كتاب جدا رائع دام إنك طموح ومجتهد أنصحك تبدأ فيه من الحين هو The language of medicine الكتاب يكون لك قاعدة قوية في الطب من ناحية المصطلحات والمعلومات الأساسية المبسطة وبعض المواضيع السريرية والأمراض والعمليات والكتاب مشوق ومليان تمارين وصور؛حتلاحظ الفرق بنفسك بينك وبين زملاءك مع بداية الدراسة في تانية طب

أخوك

S A L M A N

[د.فهد جراد]

الله يسعدك يا شيخ سلمان

الصراحة إنت تخاطبني وكأني داخل الطب وكأنك متأكد من هالشيء .. وهذا والله من دواعي سروري وفرحي وسعادتي .. الله يفرح قلبك ويشرح صدرك ويملي حياتك كلها إيمان .. أنا الحين أعتبر نفسي من طلاب كلية الطب وبكل ثقة .. بالنسبة للكتب فصدقت .. شيء مهم إن الواحد تكون عنده خلفية عن الشيء اللي يحبه ورايح يبدع فيه بإذن واحد أحد جل جلاله .. والله ما راح أنسى وقفتكم معي في كل ما طلبته منكم .. أنتم قدوة لي يا دكاترة المستقبل .. ما أقدر أعبر عن حبي لكم وعن مشاعري اتجاهكم .. ولكن أوكل الله بارضائكم بما تستحقون .. انتظروا الطبيب القادم وبقوة بإذن الله .. وكل عام وأنت بكل خير

تحياتي
د.فهد جراد

[dr-wolf]

انا في انتضارك في الكلية

[Dr.Shaikhah]

بصرآحه استفدت كتير من ردود الأعضآء

مرآ شكرآ , ربي يوفقكم

[d.tooty]

رااااااااااااااائع جدا
احيي فيك هالحماس >>>> تذكرني بنفسي
الحين انا تحضيري والله ييسرها وادخل طب
لاني اعشششششششق هالقسم وزي ماقلت مهنه انسانيه شريفه
ومشكوريين على الردود يادكاتره افدتونا كثييييير

[د.فهد جراد]

الله يعطيكم العافية ويجزاكم خير

بالأمس قابلت أحد طلاب الصيدلة من عندكم .. تحمست جدا جدا جدا للطب .. وإن كان قسمه لا يعني الطب البشري مباشرة .. إلا أنه يحمسني مجال ((( المهمة الإنسانية ))) .. كلما دخلت أي مستشفى في الدنيا يهتز جسمي ويرتجف قلبي ويبتسم وجهي وينشرح صدري حماسة وشوقا إلى العمل في هذا المكان .. أسأل الله أن يحقق الآمال .. آمييييييييين

شكرا لكم جميعا

تحياتي
د.فهد جراد