إلـــــى مـــتـــى؟؟

[maleek]

شباب طيب عشان لا نظلم احد في الموضوع

انتو تعترفو انو كليتنا فيها شباب ما يعرفو شي عن الحاسب وداخلين التخصص كذا على باب الله

السؤال كم نسبتهم من مجموع الطلاب ونسبة الطلاب اللي يبغو يتعلمو؟؟؟

انا اعتقد انو خمسة في المية كثير على الشباب اللي يبغى يتعلم بالنسبة لبقية شباب الكلية

وبالنسبة للدورات وكيف نطور مستوى الكلية هذا شي الوكيل شغال عليه وأغلب الدكاترة

اسمحولي شباب اتكلم معاكم بصراحة الموضوع دا جا في بالي من يوم دخلت الكلية من اول مادة برمجة اكتشف انو دي المناهج ماراح ترضيني ابدا ولا راح تساعدني كان يدرسني المادة الدكتور الطلحي الآن هوا الوكيل وكنت اجتهد واحاول اني اقنعو بفكرة الدورات لكن الدكتور كان مشغول للاسف


وكنت اجري عند الدكاترة ادور واحد يتبنى فكرتي مالقيت اي اجابة الى ماقابلت الدكتور الحداد وكان دوبو جاي الكلية وكان برضو يشعر بنفس الفكرة انو المناهج ما تكفي انها تخرج طالب لا في الخطة القديمة ولا حتى الجديدة

جات فكرة نادي الحاسب وانا متأكد انكم سمعتو عنو كلكم وكانت بدايتو في هذا المنتدى الدكتور الحداد سعى لتحقيق هذا النادي وقعدنا الترم الماضي نجرب ونعد ونجهز انو نوفر دورات لشباب الكلية ما تكلفهم مبالغ كبيره ويقدمها مدربين معتمدين طبعا هادي الدورات مو لاي احد هادي بس للشباب اللي يبغى يتعلم ويبغى يستفيد مو عشان الشهادات ولا شي

الدكتور اقنع ادارة الكلية عميد او وكيل ودخل على مدير الجامعه حتى الاتفاق مع شركة كبيرة في الدورات المتخصصة في الحاسب الآلي واللي ابدت رغبتها في هذا الشي وطرحنا مجموعة من الدورات مفتوحة للجميع واعلنا عنها في الصيف وراح نبدأ ان شا الله من الترم هذا وهدفنا انو مافي طالب يحس انو ناقصو معلومه او شي

النادي ما سار الا بدعم من الوكيل والعميد عشان يحسنو مستوى الكلية والطلاب والعام كان في دورات برمجة للشباب عشان مشاريع التخرج

احنا صح عندنا دكاترة تعبانين بس لا تظلمو الادارة ولا تتكلمو عن الكلية لأنو اللي بيدهم بيحاولو يسووه

راح اجتهد ان شا الله اني انزلكم جدول الدورات او احد الشباب اللي معايا في النادي وان شا الله راح تسجلو فيها كلكم وتستفيدو

زي ما ذكرت اول دي الدورات فقط للشباب اللي يرغب فيها وعشان كذا تركنا الخيار للشباب في اختيار ثلاثه فقط منها

اتمنى انكم تفهمو انو المنهج اللي بندرسو منهج تقليدي ولازم ندرسو لأنو ضمن الدراسة الاكاديميه الكلية مو شرط تخرجك تقني حاسب الكلية تخرج انسان تعرف معلومات أساسية في الحاسب والتدريب مو من وظيفة الكلية

تحياتي الخاصة والجميع ونشوفكم ان شا الله السبت
أنس العمودي :)

[الكاتب]

هلا فيك أخوي واللي يبي يبدل دورته وش يسوي
متى موعد الدورات الظهر ولا العصر مبدئيا
وشكر لك

[مكسر الحاسبات]

على قولة المثل (( ومن يتأهب صعود الجبال يعش ابد الدهر بين الحفر ))
وايضا ً (( ما طارٌ طير وارتفع الا كما طار وقع ))

الموضوع وما فيه ليش ما فيه مساواه بين الطلاب !!
ليش الواسطات فوق كل شيء حتى في التعليم؟؟!!

طيب سؤال ليش الى الحين ما نزلوا اسماء الدكاتره للمواد وش الحكمه منها ؟؟؟؟؟؟؟؟؟
وفوق كذا تلاقي بعض الطلاب عندهم خبر باسماء الدكاتره اللي منزلين المواد كيف الله واعلم

وفي ملاحظه ثانيه على الدورات المقامه في الكليه ؟؟؟؟
حتى في الدورات فيه (( واو ))....
واللي يعطووون الدورات ناس مش ولا بد

تروح تبي تسجل في الدوره يقلك اكتفينا!!
وتتفاجأ بعد فتره انو في ناس دخلو الدوره وسجلوا بعد ما انتهى التسجيل !!!!
الكلية ما راح يزبط وضعها الا اذا كان في ناس من ادارة الكلية تخاف الله في الطلاب المظلومين وتاخذ لهم حقهم

واكبر دليل على سكوت الاداره عن الخطأ !! الاحداث والمشاكل اللي صارت في الفصل الصيفي واللخبطه اللي صارت في الشعب رغم علم الادراة المسؤلة عن الكليه بها عن طريق شكاوي من الطلاب ولكن وشو القرار اللي اتخذتو الكليه والمسؤلين عنها ؟؟!! لا شيء يذكر

ولكن ما اتمناه وما يتمناه كل طالب في هذي الكلية العدل والمساواة بين الطلاب وعدم التفرقه بينهم في المعامله $$$
ونتمنى ان الاحداث اللي صارت في الفصل الصيفي ما تصير في الفصل هذا !!!

(( انما الامم الخلاق ما بقيت فان هم ذهبت اخلاقهم ذهبوا ))

[عاشق البرمجة]

والله الكلااااااااااااااااااام كثير


حينما أعلم انه مفيد سانثره بين ايديكم لكني أؤمن بقول الشاعر:


لقد أسمعت حيا ولكن لا حياة لمن تنادي



الله يوفقكم والسبت موعدنا

[شخص]

كان الله في عون الجميع والخطأ إن كان يصب باتجاه معين فهو يصب باتجاه بعض أعضاء هيئة التدريس سعوديين أو متعاقدين
لكن الوكيل والعميد أشهد انهم متعاونين ويحسون ببعض مشاكلنا لكن العنصر الاهم هو هيئة التدرييييييييس تخيلوا أنه
في دكتور في مادة هامة عدد محاضراتها في الترم حول الاربعين ماحضر الا ستة بس اي منهج واي معلومة حياخذوها
الطلاب . وبعدين سوق العمل وما سوق العمل باذن الله هينة حتى لو كان معدلك 5 من 5 لازم اول ما يوظفوك تخضع لدورات تدريبية
عندهم وعلى الانظمة المستخدمة وهذا حاصل في الخطوط وارامكو وغيرها يتبقى وقتها اجتهادك الشخصي
وعموما انا من اول مريح راسي وحاط عشمي كله في ماجستير برا ان شاء الله لانه حسب ماقال الشباب دفعتنا 06 و 05
مانتوقع فرج أو تغير في الحال قبل تخرجنا والغلطة كانت من الأول حيث سمعتوا كلكم انه الاعداد اللي حولت للحاسب هائلة
(بعضهم معدله أقل من 2 لذلك تشوف بعض الطلاب الى الان ما يعرف يكتب جملة if صح وما أظن العيب في هذا عالدكتور)
ونتيجة هذي الاعداد ضيق الشعب وتبدا الواسطات تاخذ مجراها لذك الحل السليم (في وجهة نظرهم) التخلص من هذي الدفعة ثم بناء كلية قوية ورحنا إحنا الضحية والله يوفق الجميع وكل عام وانتم بخير.

[ملاك الظلمات]

اقسم بالله ان جاني الملل متى أتخرج وأفتك بس