][ هنا تُسلم تكاليف الدرس السابع من دورة اللغة الإنجليزية للمبتدئين ][

[Sara Hussain]

الحمد لله تتم

[LeLou]

انتهيت من التصحيح لكني حابة أسيب مجال للي ما سلم الواجب يسلمه..
لذلك ح أنزل مفتاح الإجابات غدًا صباحًا + الواجبات بعد التصحيح..

[باذنجانه]

[LeLou]

الآنسر كي :)

[LeLou]

طيب هنا تكاليفكم بعد التصحيح..
هي كانت متصححة ما عدا آخر واحد جاني و ما حبيت أني أنزل شي و شي..


بصراحة و باختصار دا أكثر واجب شفت فيه أنواع الإبداع..
و أسوأ درجات شفتها كانت هنا..

و أكثر تخبيص حصل كان في سؤال التعبير بجملة عن العبارة المعطاه..
لازم تتدربوا ع التعبير و صياغة الكلام،، هنا كان المطلوب جملة واحدة بس،، لو طُلب منكم قطعة أيش كنتوا ح تعملوا!

::

طيب أنا أبغى أنوه على حاجة مهمة..
أنا يمكن واجباتي مو مرة سهلة و فيها بعض التريكات أحيانًا لكن,,
أنا مو مجرمة لدرجة أني أجيب لكم سؤال حله مو من القاعدات اللي أديتكم هي في الدرس أو في دروس سابقة..
لذلك لا تستخدموا قاعدات أنا ما أديتكم هي..
اللي استخدموا القاعدة الشرطية الثالثة أنا ماني عارفة ليش!
أنا لا أديتكم هي و لا أديتكم المضارع التام أساسًا..
و بصراحة لو استخدمتوها بطريقة صحيحة كان أديتكم درجة السؤال لأنه دي الدورة مو أكاديمية..
لكن حتى استخدامكم لها كان غلط..
في أكثر من شخص سوى دي الحركة..
أنا أحيي فيكم صراحة أنكم تحاولوا تجتهدوا بس بليز حاولوا تتقيدوا باللي تدرسوه و إذا تبغوا تخرجوا اخرجوا لما تكونوا متأكدين..
و لو أبغى أصعب الدرس كان أديتكم القاعدة الثانية،، اتمكنوا من اللي بتدرسوه أول بعدين انتقلوا للأكبر..

::

ثاني شي المودال فيربز ..
يعني بصراحة كنت ح أبكي ..
ماني فاهمة انتوا مو عارفين تستخدموها و لا مو فاهمين معناها و لا أيش القصة..

ح أشرحها هنا ع السريع بالعامي يمكن تفهموا..

أول شي can & could::
اثتينهم يدلوا ع الاستطاعة أو إمكانية فعل الشي،، لكن الفرق بينهم أنه can في المضارع و could في الماضي..
يعني إذا كانت الجملة فيها أي عبارة تدل على زمن الماضي من العبارات المعروفة،، أو حتى فعل ماضي زي did نستخدم could..
النفي لهم بزيادة not و غلط أننا نقول can not..
cannot هي كلمة واحدة ما يصير نفصلها..
أهم شي هي تدل على أنه يا إما عندي القدرة أني أسوي الشي..
يا أنه الشي دا مسموح ليا أسويه أو في إمكانية بغض النظر عن القرار المتخذ..

//

should & ought to::
تستخدم لإعطاء النصائح أو في عشان نقول للواحد أفضل أنك تسوي كذا ممكن كاقتراح أنه الفكرة دي كويسة..
ما نستخدم ought to مع النفي..

//

must & have to:
الثنتين في حالة الإثبات يدلوا على أنه الشي دا إجباري أو واجب..
لكن الفرق أنه must تستخدم مع الشي إللي أنا أشوفه إجباري،، يعني ضروريات شخصية..
لكن have to تستخدم مع الضروريات و القواعد العامة اللي في رأي العامة لازم تنعمل..
و مو بالضروري أنه نستخدمها أثناء التحدث بهذا التشدد..
لكن,,
في حالة النفي!!!!!!!
must not تدل على أنه الشي دا ممنوع و غلط أننا نسويه..
بينما don't have to معناها خفيف أنه مو لازم تسوي الشي،، زي أني أقول لك انك غير مضطر،، لكن إذا تبغى تسوي الشي مافي مانع..
مثلاً:
You must not smoke in school.
You don't have to wait for me.

الأولى معناها أنه التدخين ممنوووع في المدرسة،، لازم ما تدخن..
بينما الثانية معناها مو لازم تنتطرني..
الأولى شي مافيه تلاعب،، بينما الثانية إذا تبغى تستنى أستنى لكن إذا مو حاب تقدر تمشي لأنه مو لازم و لا هو شي ضروري أنك تنتظرني..

طبعًا نعرف أنه في حالة النفي للمفرد الغائب (الشخص الثالث) نستخدم doesn't have to
و في الماضي لو بنحكي على شي حصل في الماضي نستخدم didn't have to..
و طبعًا نميز الماضي بأي كلمة في الجملة تدل على الزمن الماضي..

يعني هنا عندنا ارتباط بدرس الماضي البسيط..

::



ملحوظة مرة مهمة:/
بعد المودالز العفل دايمًا يجي في المصدر (الشكل المجرد) و ليس في المضارع البسيط..
يعني غلط غلط غلط أننا نقول:
He can swims!!!!!
لكن الصح:
He can swim.
//

أما في الجمل الشرطية:
احنا عندنا جزيئين للجملة الأولى if clause و الثانية main clause..
في الــ if clause نستخدم الأفعال في المضارع البسيط..
و في الــ main clause نستخدم المستقبل البسيط أو أحيانًا المودالز بدل will..
لكن نفس الشي سواء حطينا modal أو will الفعل بعدها لازم يكون مجرد..
يعني هنا دمج بين قاعدة المضارع البسيط و المستقبل البسيط..

مثال:/
If she finds her wallet, she will buy the dress.




::::



أتمنى يكون وضح لكم الدرس..
موفقين||~