الف مبروكـ بالدكاترهـ الجدد ,, وأي إستفسار؟؟

[pharm.D]

السلام عليكم

يا أهلا وسهلا


ألف ألف ألف مبروك , تستاهلو

أنا متخرج من كلية الصيدلة ,

واحب اقلكم انكم بصراحة محضوضين بكلية الصيدلة .. وتستاهلوها ان شاءالله

بالنسبة للي كان نفسهم بالطب أو الأسنان .. إحنا الدفعات الأولى ولا واحد فينا كانت رغبته صيدلة ,, كلنا كنا نبغى أسنان وطب .. بس حاليا مقتنعين اقتناع تام بالصيدلة

مالكم ومال هم التشريح في الطب . والتركيز على الأسنان في الأسنان

الصيدلة تخصص لزيز .. بتكون معلوماتكم جيده في الأمراض . واكتر من طلاب الطب في الأدويه .. يعني فيها شموليه

طبعا عارفين انو مسماكم بيكون دكتور صيدلي إلي هيه فارم دي , ولا تخرجتو أبشركم مجالاتكم كثير , وزارة الصحة , المستشفيات الخاصة , الشركات , أو معيدين في الجامعات للي يحب يكمل ماستر ودكتوراه او ريزدنسي .

طبعا دوركم بيكون كبير في المستشفيات , الى الان دورنا ما تفعل بالشكل المطلوب , بس ان شاءالله لا تخرجتو بتكون النظره تغيرت
حاليا بتسمعو بأخطاء الأطباء الكثيره في الأدويه , واحنا الصيادله بإذن الله بنخفف من هذه الأغلاط لانو هذا تخصصنا , بعكس الأطباء الي تكون معلوماتهم غير دقيقه


في سنه ثانيه أهم المواد الي بتدرسوها الصيدلانيات ( بتستمر معاكم لخامسه) والفيسيولوجي والبايوكميستري والاناتومي , الكيمياء التحليلية والكيمياء العضوية .

أصعب ماده كانت مادة البايوكميستري وكان فيها الرسوب كثير ,, شدو حيلكم فيها , ماده طويلة يبغالها مذاكره أول بأول

عموما سنه ثانيه أسهل سنه بتقابلكم في الصيدلة أو أفل سنه من ناحية الدوام

ثالثه ورابعة بتدخلو في الجد , وهي أصعب السنوات من ناحية الدوام , في ثالثه أهم المواد الفارما كولوجي والثيرابيوتيكس
وأصعب المواد أو إلي فيها رسوب كثير كانت المايكرو << أول بأول

خامسه خلاص صرتو دكاترة مين قدكم , دوام خفيف والتركيز كلو على الثيرابيوتيكس .

بالنسبة لسادسة , خلاص بيكون عملكم في المستشفيات كدكاترة في عدة أقسام إجبارية وقسم أو اثنين انتو تختاروها


الصيدلة تخصص جدا ممتاز وبتنبسطو فيه وقت الدراسة ولا تخرجتو ,

عموما الي عنده أي إستفسار أو سؤال , من عيوني ما راح أقصر معاه .


شدو حيلكم ,, و إن شاء الله أنا معاكم لين تتخرجو وتصيرو دكاترة ,,

[حابه # اتخصص]

يااااااااااااااااي حماااااااااااااس
شكرااااا مرررة كثير على هذي المعلومات ان شاء الله راح نستفيد منها >> واخيرا احد عبرنا

بس انت قلت اننا راح ندرس اناتومي يعني تشريح >> لا لا تقول

يعني هذي المادة راح نشرح فيه اوادم وكذاا

[soma al7elwa]

اهلا وسهلا

الله يبارك فيك يارب

واخييييييييييييييييرا لقينا احد متخرج يعبرنا

مررررا شكرا عالنبذة التوضيحية دي

نورت المنتدى بوجودك يادكتور

^_^

حابة اتخصص

هههههههههههههههه

هدي اعصابك

ان شا الله نتعود على التشريح وكدا

لا تخافي كلنا لها :q

[$$د.عباادي$$]

أول شي ألف شكر لك ياعزيزي على تفاعلك معانا واهتمامك بالموضوع

وبالنسبة للسنة الثانية كيف حيكون دوامها فيها بريكات ولا بريك الصلاة بس؟؟

كم عدد ساعاتها تقريبا ؟؟؟

ايش الماده اللي عدد ساعاتها اكثر(اللي تفرق في المعدل)؟؟

اللبس الرسمي ايش تلبسوا ولا ما في شي معين؟؟؟

يعطيك العافية

[طيور الأمل]

مشكوووور يا دكتور الله يعطيك العافيه

بجد كنا محتاجين موضوع زي كدا

..

طيب بغيت أسألك الحين احنا كمبتدئين تونا راح ندخل عالتخصص
اي كتاب تنصحنا نقراه في هالفتره قبل لا تبدأ الدراسه

:)

[Jodah]

مرة شكرا والله

من جد حسيت اني ارتحت لمن قرأت الموضوع لأنه في اشياء كانت متلخبطة عليا

عندي سؤال وهو في السنة الاخيرة من الدراسة اللي هي سنة التدريب حيكون دوامنا في المستشفىى فيه شفتات في الليل زي دوام طلاب البشري ولا لأ؟؟

وشكرا مرة تانية و الله يوقفك

[pharm.D]

يعافيكم ربي ,

حابه اتخصص

لازم نعبركم , لانو احنا ما لقينا الي يعبرنا , ولا كنا نعرف شي عن حاجه اسمها صيدله , دخلنا على عماها لين تخرجنا

بالنسبه للتشريح , لا طبعا اخف من طلاب الطب بكتير , حتاخدو فكره عامه عن أسامي الأعضاء كلها , وحتجيكم جثه حتشوفو عليها الأشياء الي تعلمتوها , اما انكم تشرحو جثه لا


سوما

النور نورك , يسلمو



عبادي

تستاهلو التفاعل والاهتمام وربي يوفقكم

في البدايه لازم تتعودو على دوام محاضرات من 8 - 12 الظهر .. هذا شي اساسي في كلية الصيدله اربعه محاضرات ورا بعض .. الي يفرق المعمل الي بيكون من 1 - 4 , في ايام ما راح يكون في معامل فذي الأيام تعتبر الأيام الفله

وقلتلكم انا سنه ثانيه يمكن تكون اسهل سنه من ناحية الدوام , يعني ممكن يكون جدولكم في بعض الأيام في ساعه مافيها شي في الصباح ,

مافي لبس رسمي , بس في سنه سادسه بيكون في لبس رسمي الي هوا بدله رسميه وكرافيته ,


المواد الي عليها اعلى الدرجات في ثانيه , بتكون على حسب عدد المحاضرات , اعتقد البايوكميستري والفارماسيوتيكس

طبعا كلية الصيدله تعتبر سنوات مهي اترام او ساعات , يعني معدلك يكون بالنسبه , يعني اخر السنه بتلاقي نسبتك مثلا 95%
وكل سنه لها نسبه معينه من النسبه النهائيه حقت الست سنوات

يعني مثلا سنه اولى عليها 5 بالميه من النسبه الكليه للسنوات الست , وسنه ثانثه عليه 15بالميه وثالثه عليها 15 بالميه ورابعه عليها 15 بالميه وخامسه عليها 20بالميه وسادسه عليها 30 بالميه ,, هذا على أيامنا بس حاليا النسب تغيرت وبصراحه ما أذكر التغير . وحيكون في اختبار نهائي في نهاية سنه سادسه

فقبل لا تدخلو الكليه اسألو عن النسبه لكل سنه


كان في نيه انها تصير اترام بس الى الان ما اعتقد صار شي


طيور الأمل

طبعا انتي تسالي عن كتب تنفعك في سنه ثانيه , اشفلك بالضبط ايش الجدول الجديد الي حينزلكم في سنه ثانيه , واعطيكي اسامي الكتب



جوده

لا مافي شفتات في اليل , الدوام كلو صباحي ,

حتتجزء السنه الى 8 اقسام , 6 اجباريه تختارها ليكي الكليه في 6 اقسام في مستشفى وحده او اثنين , والاثنين الباقيه تختاريها انتي في اي مكان تبغيه

كل قسم اربعه اسابيع تقريبا


وبالتوفيق

[Jodah]

مرة شكرا و الله يوقفك و يسعدك يارب

[حابه # اتخصص]

الحمد لله طمنتني الله يطمن قلبك ويوفقك ويوقف في وشك عيال الحلال يا رب

ومعليش اذا كنا راح ناخذ من وقت شويه
بس عندي سؤال دحين في الخطة بعض المواد تتكرر مرتين هذي يعني اننا راح ناخذها في الترمين بما انوا النظام بالسنين

ثانيا بالنسبة للجدول هل في مواد تنصحنا ناخذها مع بعض

[pharm.D]

حابه اتخصص

ويوفقك ربي ونشوفك دكتوره ,, خدي راحتك في الاساله

بالنسبه للجدول , الجدول ينزل من الاداره ثابت لكل الطلاب , ما يمديكي تغيري او تضيفي
هذا حسب النضام الي كان ماشي علينا والي اتوقع انه ما تغير الا ادا تغير نضام الكليه لاترام << هذه كانت خطه بس ما اعتقد تنفذت

تتكرر مرتين ؟؟

في مواد حتاخديها على ترمين , تكون معاكي الترم الأول والثاني

وفي مواد زي الثيرابيوتيكس , حتكون ثرابيوتيكس 1 تاخديها في ثالثه و 2 و 3 تاخديها في رابعه و4 تاخديها في خامسه

نزلكم جدول ؟؟


يوفقك ربي