قصة رجل في وقت السيل (( ومازال البحث جاري))

[جنون انسانة]

موضوع قريته وعجبني رغم انو ابكاني لانو المني بقوة

الموضوع منقول نصا ::

الحمدلله الذي أنجاني وأرجعني إلى أهلي سالما معافاً

بدأت القصة ..

يوم الأربعاء بتاريخ 8-12-1430هـ

كنت متواجد بالدوام في الشركة وجالسين نسمع حكاوي الامطار في الشمال .. ( لسه الجنوب ماجاهـ شيء ) ..

فطرنا وعينا بالخير مع بداية هطول الامطار وجلسنا نتفرج على المطر من خارج مكاتبنا ،،

بعدها المدير قال لنا ( توكلوا على الله .. وإجازة سعيدة ) ..

طبعا عزمت على زميلي أن يخرج معي بالسيارة حقي ( جيب ) بحكم ان سيارته صغيرة ومنخفضة وممكن الامطار تأثر فيها ..

المهم خرجنا من الشركة ..

ووصلنا إلى منطقة الكارثة ( بلدية أم السلم ) رايح أنزل زميلي لبيته ..

شاء القدر أن أكون ثالث أو رابع سيارة في الاشارة ، لكن توقف السير لوجود حادث لأول سيارتين أمامي ..

بعد في غمضة عين ( جاء السيل من ك14 ) محمل بالسيارات ..

وأرتفع منسوب الماء إلى منتصف باب السيارة حقي ، وأصبحت السيارات ترجع على بعض ..

ومع إختلال توازن السيارات وتراجعها على بعض ..

قرر زميلي أن نخرج من السيارة ..

فرفضت عرضه وقلت له : أترك السيارة ؟؟ طيب خليني على الاقل ألاقي لها مكان آمن ..

لكن زميلي رفض وجرني من الشباك اللي جنبه وطلعنا فوق سقف الجيب ..

تركنا جوالاتنا ومحافظنا وأوراقنا ونفذنا بجلدنا ...

المكان كله محاط بالماء وسيارات جنبنا في عوائل تصيح وأطفال يبكون ورجال يطلبون أغاثة

والمشكلة أن السيارات تتحرك والسيل يلعب فيها من مكان لمكان ،،

وفجأة ومن عند الله يظهر ( فلبيني ) معاههـ ( دركتر ) وزميلي يناديه ونطلع معاهـ على ( السكينة الامامية ) ..

بعدها الفلبيني قام ينقذ الناس سيارة ورا سيارة ..

أحد السيارات كان صاحبها ( مصري ) يتكس بيها ومعاهـ في الخلف ( إمراة كبيرة وولدها ) ..

المشكلة ( الولد والسواق خرجوا من النافذة وطلعوا معنا .. والمرأة ما قدرت تخرج من الشباك الخلفي لأنه مايفتح إلا نصفه .. أحد الشباب دخل السيارة وخرجها من الشباك الامامي ..

مشهد اخر ..

سيارة فيها اب وأم وطفلة .. خرجنا الام والطفلة .. ولما جينا نقول للأب هيا أطلع .. أشر لنا بيدهـ

وقال : روحوا خلاص حطوا عيالي في مكان آمن ولو قدرتوا ترجعولي أرجعوا ..

عارفين قال كذا ليش : عشان طلع معاق وكان خايف يتأخر في الطلوع من شباك سيارته ويتسبب في شيء لنا ولعائلته ..

الفلبيني رفض إلا أن ينقذهـ وبالفعل تم إنقاذهـ ..

بكاني من كل قلبي دا الرجال
نرجع لموضوع سيارتي ..

بعد ما أوصلنا الفلبيني لمكان آمن .. استمر على انقاذ الناس من الساعة العاشرة والنصف وحتى الساعة الثانية ظهراً ..

كل ذا وانا أتابع سيارتي وأقول : يالله مايجيها شيء ..

فجأة وفي لمح البصر ( اختفت السيارة ) ..

جرفها السيل وطاحت في ( حفرة ) عمقها ( 15متر ) تابعة ( شركة الراشد لمشروع مواسير الشعيبة ) ..

بعد طاحت سيارة فيها عائلة مكونة من ( رجل ووالدته وأخته وطفلته ) ..

نجا الرجل ( وباقي العائلة ماتوا ) ولم تظهر جثتهم إلا في الساعات الولى من اليوم الثاني ..

:
:

تخيلوا من يوم الاربعاء إلى تاريخ كتابتي لهذه السطور اليوم فجر السبت لم يتم العثور على سيارتي

من داخل الحفرة ..

طلعت سيارات كثيرة وجثث وموتى ومازالت سيارات وجثث وموتى بالداخل كثيرة ..




ومازال البحث جاري عن سيارتي .............




الحمدلله الذي أنجاني وأرجعني إلى ..

اهلي وناسي وحبايبي ،،،