نصائح لطلاب السنة الأولى في الهندسة(المستجدين و المستجدات)

[Eng.Ashraf]

+ نصائح لترتيب الجدول :

أ- ترتيب المواد بين الترمين / المواد اللي بتتعامل معاها في أول سنة تنقسم لقسمين :
مواد من كلية الهندسة :
مواد من كل قسم تقريبامن كليات الهندسة( مافي نووية و تعدين و الخ)
و هيا اللي بتعطيك فكرة عن طبيعة الدراسة في القسم- بس مو كلها بتعطيك انطباع كامل عن القسم-
و هيا الأهم و الأولى إنك تخلصها أول بأول -مع مواد الماث أكيد- و أحاول احصرها هنا :
IE200 / IE255 /IE201 /EE201 /Meng102 /

مواد عامة :
وهيا اللي تكون من كلية العلوم أو عامة على كل طلاب الجامعة من ضمنها
الماث Math202 / 203 و كمان فيزياء كهربائية (معاها معمل Phys202 (
والمادة ذي تديك انطباع عن قسم الكهربا بشكل عام
و معمل فيزياء ميكانيكية و معمل كيمياء وكمان المواد العامة عربي و ثقافة .

كلها مع بعض :
IE200*IE201*IE255*EE201*Meng102*Math202*Math203*
Phys202*Pyhs281*Che281*Arab101*Isls 101

ولو نعدها تقريبا 12 مادة عندك تحتاج هذي المواد انها تتقسم على الترمين الأولى من دراستك
في الهندسة على قد ما تقدر و في الغالب فيه مادة او بعض الاحيان مادتين تبقا معاك
للسنة الجاية لأسباب الضغط أو التنظيم ماكان مناسب و هذا عادي اهم شئ تحاول
تخلصها كلها لو ما تقدر تخلي مادة وحدة لو مرة حصلك ظرووف تخلي مادتين
للسنة الجاية.ترتيبها مهم جدا و حاول بقد ما تقدر انك تخلي في كل ترم
تشكيلة من المواد الهندسية و الماث و المواد العامة
مثال ( مجرد مثال سريع ) :

الترم الأول : IE200 + Phys202+ EE201+ +Math202 +arab101+ Che281

الترم الثاني : IE201 + IE255 + Meng102 + Math203 + Phys281+ Isls101

امثلة للمواد اللي ممكن وحدة منها تتأجل للسنة الجاية :
Phys202 Or Math203 Or IE255

ب- اوقات الاختبارات : معلومة مهمة و هيا انه في المواد اللي ارقامها زي بعض
او قريبة من بعض اوقات اختباراتها تكون متقاربة زي لو منزل عربي و ثقافة
في نفس الترم اختباراتها النصفية و النهائية حتكون في نفس اليوم و يفصل بين الاختبارين
ربع ساعة فقط ( وهو شئ عادي بالنسبة للمادتين ذي لأنها سهالات لأغلبية الطلاب )

كمان Phys202 و Math202 تجي في يومين ورا بعض في الغالب
فحاول و انتا بنتزل المواد أو بتعدلها في اول اسبوع حق الحذف و الاضافة
انك تسأل عن مواعيد الاختبارات من بدري عشان لو الموضوع يهمك ترتبها بطريقة ثانية.

+ إختيار دكتور كويس :

موضوع مهم و يشكل فارق ... في الفترة قبل الحذف و الاضافة و اثناءها و في اول اسبوع
من بداية الترم عندك مجال انك تسأل عن الدكاترة اللي عندك في الجدول
أو تسأل عن أفضل دكتور و تحوّل عنده أو تسأل عن الدكتور اللي لازم تبعد عنه
لأنه يا إخواني و للأسف الشديد الظلم موجود فالواحد يآخذ باله و يدور لنفسه الأفضل من بدري.

+ تعاملك مع المواد :

انسى السنة التحضيرية و تخيل نفسك كنت بيضة فيها و دحين لازم تكبر
و تتعلم الطيران و صيد الفرائس.
حتواجهك صعوبات و ممكن سنيروهات عجيبة مثلا في
مشروع IE201 كان الترم اللي راح كل المشاريع لازم تكون لذوي الاحتياجات الخاصة
و الافكار في المجال دا محصورة فتخيل نفسك واقع مع تيم او فريق تعبان
و نصهم ما يبغى يشتغل و اللي يبغا يطلع من الجامعة كلها
وعندك اختبار Math202 بعد كم يوم فموقفك بيكون جدا صعب و محطم من البداية .

أحرص على العمل المستمر و موشرط يكون روتين بس على الأقل لا تخلي اسبوع كذا يروح بدون ما أتقنت مهارة في أحد موادك و لا تنسى زيارة دكتورك في المكتب و المشاركة معاه لأنه دا الشئ يخليه يتعرف عليك و يميزك و يحفظ اسمك و يساعد لا شعوريا في الدرجات.

+ الكلام و النصائح من أي أحد :

نصائح و كلام الطلاب/الطالبات في الجامعة او المنتدى ماهو صحيح 100%
و يعتمد على تجربة الشخص نفسه لا تنجرف ورا نصائح من اشخاص ما تعرفهم
لأنه كل شخص اسلوبه مختلف و ممكن مختلف تماما عنك
فلازم تكون عارف نفسك كويس و عارف طبيعتك و عارف مجهودك كيف
و ماعليك من نصائح تجيك من اسماء مجهولة لأنه في ناس تحب الدكتور
اللي يدف درجات و خلاص و في ناس تحب الدكتور اللي يشرح فلو جيت سألتهم
مين احسن دكتور؟ كل مجموعة بتقولك اسم غير .
اسئلتك كل ماكانت دقيقة كل ما حصلت على نصائح صحيحة.


و في الأخير اتمنالكم سنة حلوة و درجات حلوة و تجربة حلوة
و ان شاء الله كل واحد بعد ما يخلص يروح التخصص المناسب له أكثر شئ .