ملتقى الاستفسارات عن الدكتورات ( plan A + B )

[رفّات حُلم]

أنا خُطة آ، السليمانيّة

* مهارات اتصال؛
درّستني د/ أميرة النّمر.. تجنّن ياربّ يسعدها،
مرّة تفهم، وكل شي بقصّة عشان ما ننساه! وقت المُزاكرة خلاص المُخ يسترجع كلامها
تعرفنا وحدة وحدة، ودرجاتنا، وكل شي .. جدًا مُهتمة، ومُلتزمة.. حتى لو محتجي ترسل رسالة لليدر من اليوم اللي قبله.
قبل الدوري والنّهائي عملت لنا مُراجعة للاختبار، وعادي انّه شعب تانية يحضُرو.
ما يحتاج تكتُبي الملاحظات اللي تقولها، بس أسمعيها وممكن لمّا ترجعي تدونّي المهم وحتفتكري بعد قراءة الدرس، مع انه ما يجي الا اللي في الكتاب!
باختصار؛ يا بختُه اللي يدرس عند د/ أميرة .

* حاسب؛
درّستني أ/ بسمة السلمي، طيبة جدًا، بس صُوتها واطي شويّا، المادّة عمومًا تعتمد عليكِ،
التواصل معاها جميل ومررررة سهل
بالابليكيشن حق الجامعة، دايمًا ترسلنا عليه سواء انها نزلت الدرجات ، او انها حتّى حطت أوقات العملي، وفين ووصف المكان، وتجاوب بسرعة.. الله يسعدها.
دايمًا الدرجات اللي تحت يدها العملي تنزلها ع موقعها بسُرعة، اما النظري مو منها من الوحدة، وأول ما تجيها تنزلها ع الموقع..
نحنا آخر شُعبة في اليوم ( 2-3 ) وكان عندنا. قبلها بريك ساعة، فازا اي وحدة تبا تحضر بدري، تحضّرها مع الشعبة اللي حضرت فيها وخلاص!
وحتّى شُعبتنا مرّات في العملي تتقسّم؛ فكانت تنزل شُعبتنا وتشوف أزا مُناسب او لا لنا، اهم شي عندها مصلحتنا ^^
إزا اعتزرت تقول من بدري.

* فيزيا،
أول أسبوع نزلت لي ( أماني السريحي )، ما عجبتني طريقتها .. تشغل سلايدات وتحل عليها وتقرأ، مررة ما استوعب انا كدا، الفيزيا عندي لازم كتابة ع السبورة!
ولله الحمد، تغيرت تاني أسبوع ع طول؛ صارت د/ سناء أباظه،
ياربّ يسعدها، تفهّم مررررررة كويس!، تكتب وتحل معانا وتعطينا فرصة في المشاركة في الحل، اساسًا تقرأ السؤال بعدين تشرحه، عشان اللي ما فهمه!
لازم تجي المحاضرة مُزاكرة، لانها تسأل مرات.. بس لمصلحتك وعشان تِزاكري أول بأول :)
بعد رُبع ساعة ما تدخل، ومرّات ممكن بس انه أشري لها واستني ردها..
تتنرفز من رنّة الجوال! طردت بنتين لما مسكو جوالاتهم في المحاضرة؛ فاللي يدرس عندها يحترم نفسه!
تعمل مُراجعة قبل الاختبارات،. والقاعة تسير مرررة زحمة! القاعات التانية يحضُرو لها كمان.
لو عصّبت من البنات، يتكلمُّو وهيا حاولت تهدأ البنات، ممكن تلم أشياءها وتروح.
بس لا تنرفزوها وهيّ مررررة كويسة
والأحلى تخلص المنهج بدري. وكل الكلام اللي تكتبو ع السبورة او تقولو مهم جدًا كمان.وتعطي أفكار عن الاختبار ويجي منها.

* رياضيّات؛
صراحةً دكاترتي كلهم كانو ممتازين وأكثر الا الرياضيات، كويسة بس مهي زي البقية!
درّستني أ/ غادة باسندوة، كشرح هيا صراحة تفهم، بس ما تعطي فِكرة عن الاختبار، والمشكلة ندخل الاختبار ننصدم
صراحةً درجاتي حق الرياضيات مو حلوة، بس انه النهائي كان حلو الحمدلله وكان فيه كيرڤ أب!
ما عندها مشكلة حضرتي، ما حضرتي، رحتي حمام، اي شي!
باردة شويّا، وانا ما افهم من الناس اللي كدا ،
طبعًا محاضرات السكشن حقها مهمة لانها تكملة درس او درس جديد، مو كل ورقة توزيع المنهج تحلها، فيه أشياء لازم انتي تحليها ولو واجهتك مُشكلة كلميها وتعاليلها في مكتبها
الأفضل بنظر الكل ( ليندا ألزبن ) لو صار عندك فرصة تحضير لها أحسن


وبس xD !