افتتاح موقع بالقصيم للاختبارات للسنة التحضيرية

[الـمـقـاول]

دكتور شلونك طال عمرك ؟ يارب تقرا رسالتي وانت في اتم الصحه والعافيه الله يحييك


دكتور .. انا الان من القصيم .. ومااعرف احد في جده .. وحالتي الماديه اكذب عليك لو اقول سيئه .. واكذب عليك لو اقول كويسه .. حالتي الماديه عاديه بس مااعرف شي بجده ومااعرف كم اسعار الشقق الي بترتفع بعد الي صار (( والله يرحم من مات )) اضافة لذلك احنا بندور الرخص ومابندور الغلا فبالتالي يادكتور ليه ماتحطون مركز دائم بالقصيم وليكن في بريده مثلا او اي مكان في القصيم ترونه مناسب وللعلم يادكتور ترا التعليم عن بعد في جامعة الامام في الرياض حطو مركز دائهم لهم في القصيم وفي بريده تحديدا في مقر المعهد العلمي ولكافة التخصصات من اول مستوى لاخر مستوى رغم ان الرياض مو بعيده عن القصيم لكن سبحان الله يبحثون عن راحة الطلاب وعدم سفرهم بسبب اخطار طريق واسعار شقق بالرياض وخلافه فياليت يادكتور تناظرون في أمرنا بدال مانسافر ونتغرب عن اهلنا والمذاكره ماراح يكون التركيز فيها مثلما يكون التركيز جنب أهلنا ففي النهايه حنا نبحث عن العلم وخدمة البلد عن طريق جامعتكم العظيمه والي خدمتنا بوضع برنامج الانتساب لتنقذ الاف الطلاب الي ماتوفقو مثلي في الانتظام او الغير قادرين على الدراسه انتظام وخلافهم فبالتالي بندعي لك كل يوم وكل ليله بس اعرض هالامر على ادارة الجامعه وحاول فيه عشان مو بس حنا الي ندعي لك برضو امهاتنا وابوهاتنا بيدعون لك وبتنتفح لك ابواب الدنيا والرزق بسبب دعاوي العجايز والشيبان لانك خليت ابناءهم يختبرون بجانبهم وماخليتهم يسافرو فأرجوك ابحث هذا الامر مع المسؤولين واجعله على ارض الواقع ولك منا كل الدعاء لك ولاولادك وام اولادك بس ارجوك ساعدنا .. وبارك الله بك وباخوانك الدكاتره لما يحبه ويرضاه