نصائح لسنه التحضريه

[Jodah]

السلام عليكم
انا درست تحضيري والحمد لله دخلت صيدلة
طبعا انتو دحين اكيد مشيتوا شوية في الدراسة وعرفتوا طبيعة المواد وطريقة مزاكرتها
اللي ابغى اقوله انه دي السنة هي اللي تحدد اش مستقبلك يكون في اي كلية فخلوا هدفكم دائما انكم تجيبوا اعلى معدل تقدروا عليه عشين تدخلوا التخصص اللي تبغوه

التحضيري ماهي صعبة
ابدا ترا ماهي صعبة
يمكن يكون فيها ضغوط من ناحية انه الواحد يفكر في المعدل والدراسة جديدة بالانجليزي والواحد اعصابه ممكن تكون مشدودة شوية
بس كله ممكن يمشي حاله اذا الواحد قرر انه هو يبغى يتحدى نفسه

كلها ايام تعدي ان شاء الله وحتصير السنة التحضيري ذكريات و اذا كان معدلك حلو ودخلت الكلية اللي تبغاها حتصير التحضيري ذكرى حلوة بالنسبة لك لأنه هي اللي دخلتك الشي اللي تحبه

عشين كدا اضغطوا على نفسكم شوية بس شوية عشين تقدروا توصلوا للشي اللي تبغوه

وكمان في حاجة مررررة مهمة وهي اللي كتبت الكومنت عشينها انه خلو ثقتكم بربنا مرة قوية مهما زاكرت وتعبت دائما ثقتك بربنا هي اللي حتخليك تتوفق وتحل في الاختبار مو المزاكرة ولا اي شي تاني

انا لمن كنت تحضيري بصراحة تعبت وكنت ازاكر بذمة بس في الاختبارات ماكنت احل بالمستوى اللي زاكرت بيه يعني كنت اخبص شوية
بس والله عمري ما زعلت كنت اتضايق شوية اول ما اخرج من الاختبار بس على طول افكر انه دا من ربنا و اكيد هو الخير ليا
ولمن جا وقت التسكين كنت حاطه خياراتي اسنان -بشري -صيدلة
واستخرت مرة كتير الحمد لله
وبسبب انه معدلي ما كان مرة عالي انقبلت صيدلة
بس وقتها حسيت بفرح مع انه الرغبة التالتة سبحان الله حسيت برضا مرة وانه هو الشي اللي حكون فيه

وبعدين عرفت انه لو كان معدلي زايد بوينت واحد بس كنت حنقبل بشري على طول وابدا ما اظن انه حكون مبسوطة فيه زي ما انا دحين في الصيدلة

عشين كدا زااااكروا واعملوا اللي عليكم واذا لالاسمح الله خبصتوا شوية في الاختبار لا تتعبوا نفسيتكم بالعكس خلوه دافع لكم انه تجيبوا درجات احسن في الاختبارات الجاية

خخخخ معليش كترت في الهرج بس يمكن يفيدكم شوية دا الكلام
واذا اي احد عنده اي استفسر لا يتردد ممكن يرسلي على الخاص

والله يوفقكم يارب ويكتب لكم الخير دائما