الطيارة وجريدة عرب نيوز ...

[الفتى]

السلام عليكم ورحمة الله وبركاته


من يوم سجلت بالمنتدى هذا وأغلب الأعضاء ينصحوني بقراءة الجرايد الأنجليزية

بهدف تطوير مستوى القراءة وتحصيل كم هائل من الكلمات اللي من خلالها تستطيع

أن تطور نفسك بالكتابة ..

الترم هذا خلصت اختباراتي وجلست يومين بجدة افرفش شوي بعد تعب الاختبارات

المووووووهم جاء وقت السفر للعودة الى مدينة الأهل والبيت . رحت المطار أنا وشنيطاتي

واعلنو موعد اقلاع الطيارة وركبنا الطيارة , وانا اجلس بالمقعد المخصص لي ويجلس جنبي

ذاك الجنتل مان "باين من شكله " جت المضيفه وتقول جرايد اللي جالس جنبي طلب منها جريدة

الجزيرة , أنا تهورت وطلبت منها عرب نيوز هههههههههه

اللي جنبي سمعني قلت عرب نيوز بغا يرقمني من كثر اعجابه فيني . بيني وبينكم انا حسيت اني

محترف أجنبي او فنان مشهور , لأن اللي جنبي ما نزلت عينه عني بس جالس يناظرني !

أنا اخذت الجريدة وجلست اناظر للصور الا مقلوبة واقوم اعدل الجريدة , وقلت بيني وبين نفسي

لازم يا فت فت << يدلع روحه ههههه لازم تحاول من اللحظة هذي تطور من مستواك

لأن الجاي أصعب من اللي فات وأنتهى وقت الخمبقه والهمبقه .. المووووووهم وأنا جالس اقراء

فيه كلمات كثيرة مادري وش معناها بس اعديها واقول بيني وبين نفسي لا تدقق احاول بس تخلص

المقال ما همني افهم او ما افهم , واللي جالس جنبي شوي يقراء جريدته وشوي

يناظر فيني ! وتجي الطامه الكبرى , وكأنه يدري اني من جنبها بالأنجليزي !

قال بالله وش كاتبين تحت الصورة هذي , بيني وبينكم انا بديت اصب صب عرق هههههههههه

قلت له هذي صورة اثنين واقفين , وقمت اشرح له وضع الصورة . قال ياخي ابي وش مكتوب

تحت الصورة , المشكلة ان الكلام اللي مكتوب تحت الصورة مادري وش معناه .

قلت له أنت يوم انك مبقق عويناتك بالجريدة اللي معي والجريدة اللي معك ما خلصتها وش تبي ؟

بيني وبينكم قلت مالها الا ناطح الصياح بالصياح تسلم .. قال خلاص يابن الحلال سئلنا سؤال

والحين نقول يا سؤال ارجع بس انا حبيت اشوف انت تترجم صح والا غلط .

قلت له ليش انت تعرف تترجم . قال انا اخذت الماجستير من امريكا , قلت ماشألله اجل دافور

بالأنجليزي ضحك وقال اي دافور بس اشوف لك نص ساعة وانت على الصفحة الأولى

عرفت انك مبتدئ , قلت له بيني وبينك انا تخصصي انجليزي وابتلشت بعمري بالتخصص هذا

وكثير ناس قالو لي حاول انك تقراء انجليزي كثير . قال صح القراءة هي اساس تعلم اللغة ..

والحين كل يوم وابو الشباب معي بالماسنجر يعطيني دروس تقوية مجانية ههههههههههههه

جبت لكم سالفتي هذي بس عشان ماحد يطب بالمطب اللي انا طبيت فيه هههههههههه

اذا بغيتو تقرون احسن شي بالسرير قبل النومه اقل شي ماحد يجلس جنبك وان جلس احد جنبك

تلقاه يموووون وبقوووووة بعد هههههههههههه



لكم مني اجمل تحية وتقدير ,,, اخوكم الفتى