قصيده رائعه

[go2]

ياليل خذني على سطح القمر دوره=وترك نجومك تحتنا مع لياليها
واتركني اغوص بين الشعر وبحوره=عندي قصيده ولا ادري وش قوافيها
قصيدتن ترمي الشاعر على زوره=تسعين ليله ولا يقدر يسويها
قصيدتن وسمها يا هاجسي نوره=لبا المسمى ولبا اللي مسميها
لعيونها الشعر والشاعر وجمهوره=تعاندو في رضاها من يراضيها
لكنها ماتلد العين مغروره=من حقها جعلهم فدوة مواطيها
ترفه وغنجا ومياسه وغندوره=وليا انتهى الزين منها جاك يبديها
لاجت تخطا شوي شوي معذوره= الارض من تحتها تحسب خطاويها
وان طبت الروض الاخضر طارت اطيوره= نصن يجي فوقها ونصن حواليها
بعيونها كني اقرا اول السوره=وبرموشها سورة الرحمن منهيها
وبخدودها الزعفران يجدد اجذوره=فديت هالزعفران اللي بخديها
وفي ثغرها الشهد ودّع زاهي ازهوره=مستوطن بثغرها معذور باغيها
وفي شعرها روح ليلن طال ديجوره=وجبينها شمس وازرى الليل يخفيها
اليا اضحكت صارت القيعان ممطوره=وليا بكت ردة السحب لمناشيها
والسانها كلمته بالنطق مكسوره=تجبر كسور الحكي للي يحاكيها
من عمرها عام واحد مقبلن دوره=العمر كلّه عسى ربي يعافيها
طفله شقيه ومقروده ومطيوره=وهذا اللذي عن جميع الناس محليها
في يدينها ماسكه لوحه وطبشوره=تكتب وتجهل وش اللي تكتب ايديها
تقولي لكبرت بتصير دكتوره=وقول يارب حقق لي امانيها
لاجيت مقبل تجي تظحك ومسروره=تقول (بابا) هلا وقوووووول لبيهاااا
مبطي غلاها بقلبي زارع ابذوره=محيي غلاها عسى ربي يحييها
لبيه نووووره ولابه غيرها نوره= احلى الاغاني وانا اول من يغنيها


والله حلوه القصيده
وللاسف مدري من هي له