تجربتي مع المطابقة - ماجستير ادارة الاعمال التنفيذي

[Brainiac]

السلام عليكم...

اولاً : أحب اشكر الموظفين بالقبول هناك على سعة صدرهم وتعاملهم الجميل مع الجميع...بصراحة يعطيهم ألف عافية.


انا وصلت تقريباً الساعة 10 للمبنى.... بس دخلت حرم الجامعة الساعة 9 الصبح... والسبب أني ضعت ... وخفت على نفسي انخطف بس ربكم ستر.

طبعاً الموضوع بالنسبة لسكان جدة بشكل عام.. وخريجي جامعة الملك عبدالعزيز بشكل خاص.. جداً سهل...... بس بالنسبة لي وأشكالي جداً صعب لاني ما اعرف حاجه بجنوب جدة... وبرضو ما فيه لوحات كافية داخل الحرم الجامعي.......... طبعاً شهادتي مجروحة بموظفي الامن... شكلهم كلهم كانوا اجازات اليوم .

للي ما يعرف ... ادخل للحرم الجامعي من خلال البوابة رقم (6) ... ( سألت واحد وقالي بوابة سته... قلت له : مكتوب عليها رقم 6؟... قالي: لا بس معروفة انها رقم 6... قلت : طيب ان شاء الله ربي يلهمني) ....... بس كويس طلع مكتوب عليها رقم 6... وفيه قدام المدخل مجسم لمجموعة كتب فوق بعض.

المهم ، لما تدخل من البوابة... حيجيك اول دوار.... اعمل U Turn وارجع...حتشوف فيه مباني على اليمين ... تسمى هناك "المباني القديمة" .... المبنى اللي فيه المطابقة اسمه "عمادة البحث العلمي"... ادخل المبنى... بعدين خذ اول ممر يمين... بعدين أول ممر يسار ( انا اعطيكم التفاصيل هذي لان ما راح تحصلوا أحد تسألوه).

تدخل تاخذ رقم وتستنى... واصلاً ما كان فيه زحمه... المطابقة سريعة جداً... بس تستنى ربع ساعة عشان تاخذ البطاقة الجامعية .... وبرضو لازم توقع على تعهد بأن لو المكرمة الغوها ، حتدفع من جيبك.

برضو كثر الكلام عن النسبة الموزونة ... أقل نسبة موزونة للمقبولين في ماجستير ادارة الاعمال التنفيذي ( مضاف لها الخبرة ) كانت 79.4% ... طبعاً هما ما قالوا الكلام هذا.... بس انا ملقوف

برضو يبدو انهم مرة متشددين بخصوص مواعيد المطابقة .... يمكن يعملوا استثناءات لانهم صراحة مره وسيعين صدر وأخلاق ....بس لما سألت بخصوص تمديد مواعيد المطابقة ، قالوا ما فيه.


موفقين جميعاً