السفينة (( لا تفوتكم ))

[i7ssas]

هذي قصيدة للشاعر المتألق حامد زيد بعنوان السفينه كنت وعدت قبل كذه اني راح اكتبها لكم اتمنى تعجبكم ..!!!


السفينه


ضاقت وساع الفيافي والوعد متن السفينة
للطريق اللي دعاني بعد أمان الله وأمانه

لا تناديني وصوني قلبك الله لا يهينه
لا يراهن في رجوعي لجل ما يخسر رهانه

ليه ما ارحل عن غرامك بعد ما ذقت الغبينه
اذكري لي شي واحد يستحق اقعد عشانه

قلب ما حن لوصالي ماني بحاجة لحنينه
واشهد انه ما يعزر بالرفيع إلا هوانه

الهوى الغدار حد الله ما بيني وبينه
والرجل لا خير فيه إن ما حفظ قدره وصانه

واحد مثلي لين ما حدته عوجا سنينه
ما شكا لأقرب بن ادم لو هو أغلى من إخوانه

يوم قلبي ما عصاك وما قدرتي تذبحينه
ليه خنتي فيه و أنتي معه من نفس الديانة

كان ذبحي بأيدك ارحم لي من اللي تفعلينه
وان طلبتك تذبحيني ما ذبحتيني لعانة

كل جرح من جروحي تذكرينه تنكرينه
كن مالك في نزيفه يد خانت بالأمانة

ينزف الخافق تواضع لين لطختي جبينه
و إلا أنا ما كنت أبيها توصل لحد الاهانه

قلت من باب الميانه صاحبك وتعذبينه
لعنبوك أرخي معي شوي ما صارت ميانه

طعت عقلك يوم قالوا إن العقل بالبنت زينه
لكن الشرهة علي يوم كنت أحسبك اتكانه

من بعد ما كنتي أنتي في حشاي أغلى سجينه
بوعدك باطلق سراحك واتهمني بالادانه

وين رايح ؟ لأي درب ما يرجع للمدينة
ليه رايح ؟ لان قلبك ما ترك قلبي وشأنه

كيف بأنسى ؟ ربي اللي ملهم القلب السكينة
مثل ما عانى بقربك لا نوى فرقاك عانه

كان قاسي يجرح أطراف السكاكين السنينه
ما يطيح و بنت مثلك حبها هزت كيانه

و إلا أنا خابر خفوقي ما يمد إلا الثمينة
وان بغى يغيض الثريا قعد القمره وزانه

مزعل لأجلك هنوف رجت عقول رزينة
وان تهادت بالطريق الجرهدي تزهر جنانه

جادل كن الجمال قبالها كتف أيدينه
و القمر لو شاورت له ينزح وتقعد مكانه

كانت أول من تحكم في فروع الياسمينة
وان تعدتهن تفنن خيزرانه خيزرانه

بعتها لأجلك وصارت لأصغر أطرافك رهينة
و إلا هي لفتة هدبها تغمرك ثقل ورزانة

والخفوق اللي تغذى من معزة والدينه
مشكلته انه تعلق في زمن ما هو زمانه

كل ما زادت جراحه واكتشف غلطة ظنينه
صدقيه إن قال ما به شخص يستاهل حنانه

يوم نادى يا فلانة ما رضيتي تسمعينه
لين صوت يا فلانة يا فلانة يا فلانة

كنت أشوفك زعفرانة تقرض الورد وتدينه
يمكن إني ما قطفتك بس أشوفك زعفرانة

كنت أهاب البعد عنك و أطلبك لا تذكرينه
كان خوف من الفراق وخطوة الفرقى جبانة

ما اقتنعت إن الخيانة للرجل تلوي يمينه
لين ما ربي بعثك وذقت من طعم الخيانة


اسمحيلي ما بقا فيني مكان تطعنينه
واقبلي من جوف قلبي كل عطفه وامتنانه

والله الله في عذابك بتركك عينك بعينه
دلليه ولا يرده عن شقاك إلا لسانه

وإلا أنا قررت أسافر وامتطي ظهر السفينة
لأنه ما به شي واحد يستحق اقعد عشانه



وسلامتكم