الماستر عن بعد ؟؟؟؟؟؟

[فندام]

بدي أضيف على كلام الأستاذ/ عماد انو لو فاتك التسجيل يامشمشة جامعية باختبار كفيات الي بتاريخ 29/12/1431 تقدري تسجلي بالاختبار الي حيكون بتاريخ 20/4/1432 وبالنبة لاختبار القدرات لازم تسحلي بالاختبار الي حيعقد بتاريخ 19/4/1432 وازم يكو بعلمك انو تقييم المتقدم للماجستير يكون كالتالي
40% على نتيجة اختبار القدرات العامة للجامعيين
10% على نتيجة اختبار كفايات اللغة الانجليزية
30% على المعدل التراكمي بشهادة البكالريوس
20% على الدورات والخبرات وبما انو برنامج ماجستير الترجمة المهنية مو مشترط خبرات فحتكون نسبة ال20% كلها على الدورات
وبكدا يكون امامك اختبارين هامين عليهم نسبة 50% من درجة التقييم
وكمان نسبة ال 20% تبع الدورات
فشدي حيلك واحرصي انك تحصلي على نصيب الأسد من نسبة ال 70%
وبالنسبة لاختبار القدرات العامة الي عليه 40% فانصحك بشيئين هامين لتحقيق درجة عالية بالاختبار
أول شي انك تشتري كتاب اختبار القدرات العامة للجامعيين للمؤلف محمد حسن طيب هدا الكتاب مفيد جدا ويحتوي على شرح مفصل لكل جوانب الاختبار مع حالات وامثلة متنوعة لكل اجزاء الاختبار الكتاب موجود بمكتبات جرير والعبيكان ولو ما وجدتي الكتاب عندهم ممكن تراسلي مؤلف الكتاب نفسه وهو حيرسلك الكتاب عن طريق الdhl المؤلف لو موقع بالنت حطي اسمو بقوقل وحتوصلي للموقع تبعو وهناك حتلقي طريقه الحصول على الكتاب من المؤلف
الشي الثاني هو انو قبل الاختبار بفترة وجيزة بتعقد دورات تدريبية خاصة باختبار القدرات للجامعيين وممكن توصليلها عن طريق النت بس ماادري هل الطالبات لهم دورات خاصة بيهم ولا لا طبعا الافضل لو كان في مجال للطالبات بذي الدورات انك تلتحقي بيها لأنها حتهياك للاختبار الفعلي بشكل جيد جدا
ولاحظي هنا انا نصحتك اول شي تشتري الكتاب الخاص باختبار القدرات العامة من باب الاحتياط لانو ممكن يكون مفي دورات خاصة باختبار القدرات بالنسبة للطابات وانا هنا بقول احتمال وكمان عشان لما تلتحقي بالدورة التدريبية تكون عندك خلفيه جيدة تساعدك على الفهم والاستيعاب بشكل افضل هدا في حالة انو كان في دورات خاصة بالطابات

اما بانسبة لاختبار كفايات اللغة الانجليزية فاعتقد بما انو تخصصك لغة انجليزية فهدا حيساعدك على اجتياز الاختبار بنتيجة جيدة جدا وهنا زي ماذكر الأستاذ/ عماد احرصي على الحصول على دورات تدريبية في اللغة الانجليزية عشان تدعمي السي في تبعك وتعززي فرصتك للقبول ببرنامج ماجستير الترجمة المهنية
وبالتوفيق يا اختي