أي استفسار عن إدراة وتنظيم موارد بشريه هنا على طووووول بدون تردد :)

[frfosha hanem]

السلام عليكم ...

انا دخلت هنا صدفه ، بس من جد كنت حايسه وابغا احد يدلني ويكون مجرب وفاهم ، وماشاء الله حاسه كدا انو انا ان شاء الله لقيت اللي يدلني ويفهمني الجزء اللي فاقدتو

انا في السمستر السادس ان شاء الله ، وتخصصي موارد بشرية ، انتساب

تقدري تقولي كنت ماشيه تمام في الخطه بس على السمسترين اللي راحو عكيت يعني اداره اعمال بالانجليزي مااخذتها في وقتها ماحبيتها خصوصا انو البنات اخدهوها وخوفوني منها انو مو حلوه واستاذتهم مادري ايش فيها واستبعدتها ... الماده دي من السمستر الرابع

ومن السمستر الخامس ، مااخذت من الخطة تخطيط وتنمية موارد بشرية و استثمار

وكمان انا ترم من الاترام حملت معايا ماده تخليل كمي 2 << ماادري ايش اللي حصل كانت سهله بس الحمدلله هههه ،،،، عارفه بحكيلك قصه حياتي !

وانا حقولك مواد السمستر دا ان شاء الله اللي نزلتها وحنزلها ...

1- بحوث عمليات << مع آمل تركستاني
2- ادارة استراتيجية << بثينة جمجوم
3- مالية دولية << سحر مهران ( مادة اختياريه )
4ـ ثقافة 3
5- مادة حره << مااعرف ايش اخد ، ياريت تقليلي مواد سهله واستاذات

اممم احاول اخد اداره اعمال بالانجليزي مانفع ، وكمان احاول اخذ استثمار مانفع ، وكمان تخطيط مانفع مادري ايش فيه الحذف والاضافه كل ماحطيت ماده مافيه مكان الشعبه معبيه ماشاء الله بس من جد طفشت وسرت احط اي شي فتحلي شعبه دراسات ادارية معاصره بس ماحبيت دحين اخدها ماادري ليه وكمان فتحت معايا النوع الاجتماعي دا ابو ساعه ماحبيت اخذها دحين !!!

انا ح اضيف ماده ماليه دوليه يوم اروح الجامعه بعد بكره ان شاء الله وبكذا اخذت اول ماده اختياريه من الخطة وكمان ابغا اضيف ماده حره بس مااعرف ايش ويسير 5 مواد ( مادتين علميه واحب العلمي - 3 مواد نظري )

وان شاء الله السمستر اللي بعدو السابع اخد 6 مواد ،، ايوه نسيت اقلك انو اكيد حيزدلي ترم بس ماعندي مشاكل ولا اكون مضغوطه وحيزدلي ترم محترم امكن حق 4 مواد اذا مو 5

ايش رايك في جدولي وماادري كيف ماشيه من جد حاسه اني حايسه وان شاء الله اكون صح لاني دخت من كتر ماافكر ولانو ورايا سفر بعد 3 ايام ابغا امور الجامعه تنحل وارتاح

معدلي 3،13 عارفه انو قليل ومو عاجبني ،، بس الحمدلله
انا نفسي ارفعو باذن الله .

ادري طولت سامحيني بس عشان تعرفي كل شي خخخخخ << تحسي اني ماصدقت لقيتك وفكيت السبحه ههههههههه

الله يعطيكي العافيه قوليلي رايك وعن الاستاذات بما انو انا انتساب واستاذاتنا غير عن الانتظام مو كلهم يدرسو انتساب

ومشكووووووووره مره تانيه