محاضرتي .. تنميه مهارات التفكير.. ومهارات اتصال . ليوم الاحد 11-11 ..... بنات :)

[لـــــودا]

السلام عليكم ورحمه الله و بركاته ...

ويامرحبا بالجميع ...كيفكم ؟؟؟ ... أتمنى إنكم بخير ... وصحة وعافيه ..
والجامعة تسلم عليكم هههه

حبايب قلبي أنا وعدت كثير انزل أول بأول اللي حناخده ...

للأسف انقطع النت عندي ليومين ... وعشان كدا ما قدرت انزل اللي خدناه يوم السبت ..

أنا شوفت مواضيع .. تتكلم عن يوم السبت ومحاضراتها .. فقلت بلاشي انزل ونكتر كلام ..

ونضيعكم ..

المهم حبايب قلبي ... من يوم ورايح حجي من الجامعة ع طول انزل اللي اخدته ...

اليوم الأحد ... من الأسبوع الأول بتاريخ 11 - 11 .... كانت عندنا محاضرتين ..

طبعا ياحلوين مافي اختلاف بين الشعب في دراسه المنهج ... الاختلاف بس في الدكاترة والاساتزه ...

هما متفقين على منهج واحد ... لا يزيد ولا ينقص ...

اشوف بنات يبغو يتعرفو على بنات من نفس الشعبه ...

اقولكم ... مافي فرق بين الشعب ... ابدا ..

خطه وحده وماشين عليها كل اساتزه المواد ..



واللي عرفتو كمان ... والمهم انكو تعرفوه ... هو ... انو في ساعات مكتبه ...

حتبدا قبل الاختبارات ... مااعطونا التاريخ بالزبط ... لانه لسى ماحددو...

وقت مايحددو ... اكيد راح اخبركم .. قبل نفسي كمان ^_*

طولت عليكم ... لكن والله ما ابغى انسى كلمه تفيدكم ...

ودحين ... حبدأ في المحاضرات ...




الاولى ... تنميه مهارات التفكير ...

الماده حلوه كولنا نعرفها ... سهله وبسيطه ...تفكير ماتفكير ...

المنهج كوله معانا معادا ... باب مهارات التسلسل محذوف ... وراح تخبرنا برضو الدكتوره وقتها بالزبط ايش المحذوف ...

واتفاق الدكاتره على الاسئله لحد الان ... على لسان دكتورتنا الدكتوره عزه ...

يعني احتمال تتغير ... وحقولكم كل شي اول بأول

اتفقو ان الاسئله حتكون ... في دي الماده ..(((. صلي .. صح وخطأ .. واختياري )))

طبعا ماكتبا شي معاها ... كلو تشرح ... بسيط وكلام معروف ...

مافي شي مهم اكتبو لكم ... راح توضح الصوره بالمحاضره التانيه ان شاءالله ...

بالنسبه للساعات المكتبه للدكتوره عزه .... تقدري تروحيلها اذا مو فاهمه شي ... توضحلك اللي تبغيه
مكانها .. مبنى 8 ... غرفه 839 ....
يوم الاحد والثلاثاء ... من الساعه 11 الى 12 ونص
ويوم السبت والاثنين والاربعاء .. من الساعه 12 .الى 1 ....
وطول الايام ... من 8 الى 9 ...
حتكون موجوده بمكتبها عشاننا :)
وتقدرو تتصلو كمان ... بس تديكم المهم عالتلفون ... مو زي لما تجلسي معاها وتشرحلك طبعا
رقم مكتبها ((( تحويله 62918 )))
هادي التحويله .... رقم الجامعه والله معرفه ... اللي يعرفه ينزلو واللي يخليكم :)





المحاضره التانيه ... كانت مهارات الاتصال ....

شي مو طبيعي جد حلو ...

دكتورتنا افنان قطب ... اعسل منها مااافي ...واللي اخذناه ..هو

تعريف الاتصال ..متى يبدأ الاتصال .. ومتى يكتمل .... انشطه الاتصال ... عناصر الاتصال .. انواع الاتصال ..نماذج الاتصال .. اهميه النماذج .. خصائص الاتصال ... مفاهيم خاطئه عن الاتصال ... كفائه الاتصال تعتمد على ماذا ؟؟؟

هذي اختااارص لساعتين ... طبعا شرحت الكل .. وعددت ... حتلاقو كل شي في الكتاب ...

اليوم مامعايه الكتاب ولا كان حددت كل شي بالصفحه ... اعذروني عالتقصير ...

والاسئله برضو قالت ... لحد الان ... صح وخطا واختياري ...

ووضحتلنا شغله ...

عند الاختياري ... ممكن يجوبو الخيارات صعبه ... يعني ... 2 خطا و2 صح ... بس في شي اصح من الثنتين الصح..

اي وحده من الخيارات ... صح ميه ميه ...

اذا اعطتنا امثله حكتبها اكيد ...

المهم عند المذاكره تفرقو زبط بين التعداد وتعاريفها ..

مثلا ... عند عناصر الاتصال ...
عندنا (((( المرسل .. والمستلم .. والرساله ..والوسيله ... ورجع الصدى ... والبيئه... والتشويش ))))

احفظوا وافهمو كل عنصر واللي تحته من تعريف وايش يتضمن ... وفرقو بينهم ..

عشان تسهل عليكم ... اعملو شجره ... فهمتوني ... راسها عناصر الاتصال ...

ونزلو فروووع .... وكدا ... ياريت تكونو فهمتوني ...


بالاخير ... اسفه اذا.. مو موضحه زين ... لانو حتى احنا لسى الصوره الكامله ماوضحت لينا ...

انا حبيت اديكم بداااايه ... من بكره باذن الله حوضح اكتر وحكتب بالزبط ايش قالت وايش قولنا :).

اتمنى من البنات اللي حضرو معايه ... يزيدو اذا في شي غاب عني ... لا تبخلو بليز ..

الله بيساعدنا ان شاءالله زي مابنساعد حبايبنا اللي خارج جده ومايقدرو يحضرو الجامعه ...


اعذروني اذا خانني التعبير ... والاسلوب ...

اي سؤال انا موجوده ...

تحياتي ليكم ... وانتظروني بالحلقه الجايه :)

في النهايه ... لو تبغوني اكمل حكمل ... وعلى حسب الردود ...
اذا ماعجبكم اسلوبي او شي كدا او كدا ... لاتردو ....عشان ابطل :)
اصلو تعب والله ودوام من 3 الي 10 و . و .. بس خليها على الله .. و لعيونكم يهون ...
اختكم لودا