وشحـآل قلبي دآم هذي عـآدتكـ في كل صيف .. تسـآفر اوروبـآ وانـآ مـآني بحمل الانتظـآر

[د.كيــف]

لا ضاق بي صدري تعيني على الرجم المنيف
اللي شموخه متعب العقبان وفروخ الحرار

ماحدني له كود فرقا واحد (ن) ماله وصيف
من يوم سافر والضلوع مكسره وتشب نار

فلا بكيته ماعلي من حد حبي له شريف
والبعد عن من تعشقه فترة تعايش واختبار

خايف على دمعي اليا هليته يقولو ضعيف
والا الضعف ماهو بصوبي بس للدمع انحدار

اللي طيوفه ذابحتني كل ابيها طيف طيف
واتضيع احوالي ولا ادري ليل انا ولا نهار

ويلاه ياترف الصبا يامالك القلب النضيف
تقول قررت السفر واقول ياصعب القرار

وشحال قلبي دام هاذي عادتك في كل صيف
اتسافر اوروبا وانا ماني بحمل الانتظار

مابين (بون) وماحواليها وباريس وجنيف
والا انا حدي دبي اولحمدي وعين دار

ياليتني في الطايره لا قدك بتسافر مضيف
على الاقل ابقى معك من المطار اليا المطار

ابطعمك من كفي اليمنى واقطع لك رغيف
واكلك من كل حاجه مثل تأكيل الصغار

تكفون ياهل( فرآنكفورت) انا مولع في وليف
ميت بحبه واعشقه واعشق ثناياه الصغار

ماحاز به عني سوى الاقدار والوقت السخيف
اللي خذا قلبي مع في الطايره واقفى وطار

وامشي ولا مني مشيت امشي مثل مشي الكفيف
ياصاحبي نفسي بعد ماغبت عافت كل دار

ماقد هقيت ان اترك العالم ولا اسولف واعيف
واجلس على اخر زاويه واعنز بضهري جدار

حزين مدري حالتي حاله وافكر كيف كيف
ابي اتطمن كيفك انت بخير ولا ويش صار

مستانس وتضحك او انك تبكي وقلبك رهيف
الحين بالفندق او انك رايح بوسط القطار

بـآقي على ذآكـ الامل .. لو مجمل الوآقع مخيف
رآفع لك الهـآمه .. وانـآ اشعر من فرآقكـ بانكسـآر

في ذمتي اني فااقدك وابيك والخاطر كسيف
لكنني مغصوب في بعدك وانا مالي خيار

ياصااحبي تبغي الحقيقه اخذها من دون زيف
اما تقبلها (غلا) ولا تقبلها (مرار)

عز الله ان البعد كنه ضارب (ن) صدري بسيف
يـآ مت منه منقتل !! يـآعشت بضلوعي كسـآر


لـ / حمد البريدي