مشكلة في حياتي ، واحتاج مساعدتكم

[دافئ الإحساس]

اول شي احب اقلك هوا ولازم تعرفيه كويس

انو اي انسان في الدنيا لمن يحس بضيقه

معناتو هادا بعيد نوعا ما من الله سبحانو

((ع حسب كلام الشيخ ناسي اسمو واسم برنامجو))

يعني كلي ما تشوفي نفسك مضايقة اقري صفحة او صفحتين من القرآن

او قومي صليلك ركعتين

.........

زي ما قالو الاغلبية انو هادا شي طبيعي جدا

حقلك بشئ فيا

ايام الثنوي كنت وحداني بمعنى الكلمة وماحب اتكلم مع كتيرين

ممكن تسمى بإنطوائية او اي شي من هادا القبيل

حالي في حال نفسي

واقاربي وقريباتي كانو ينقهرو مني من دا الشي

طبعا انا باسوي كده لنفس سببك

وكانو يفهموني ويعلموني انو اختلط بالناس واللي بأسويه غلط

وانا كنت مستمر بالشي دا

لكن النتيجة انو لقيت نفسي لوحدي مررره

ومحد يعبرني ومحد يسأل عني

فقلت بيني وبين نفسي الحياة مره وحده نعيشها لي ما انبسط فيها واسال عن الكل

واكون اجتماعي مع الجميع

وفعلا

اول شي قويت علاقتي مع ربي

وتاني شي اول ما دخلت الجامعه كلللل شي اتغير

وسرت جدا غير عن اول

واتفاجو اصلن مني اخرج واضحك واتكلم وافرفش مع الجميع

هادا مع الاقارب بس

اما الاصحاب ماعندي الا اتنين بس

ماحب اتعرف كتير وحتى لو اتعرفت كتير حتكون المعاملة سطحية وبس

اما الاتنين دولا معاملتهم غير طبعا

.......

ببساطة

قصدي من دا الكلام كلو

قوي علاقتك مع الله سبحانو

وابدأ شوفي اش الاشياء اللي لازم تتغير فيكي حبه حبه

ولا تتغيري مره وحده عشين لا ترجعي بسرعه مره وحده

غيري فيكي حاجه حاجه

وحاولي حتى لو كلموكي عن همومهم انك تسمعي من هنا وتطيري من الادن التانية

واهم حاجه

لا تفكري في كلي شي بقلبك

فكري بعقلك وبس

طول ما انتي حساسة زيادة عن اللزوم وتفكري بعقلك بس

أعدائك ممكن يغدورو بيكي هادا لنك بتفكري بقلبك بس

وممكن تلاقيهم يقهروكي باي شي

العقل فوق كلي شي فكري بعقلك حتشوفي انك مبسوطة في حياتك إن شاء الله

وفي حاجه بازكرك هيا

البعيد عن العين بعيد عن القلب

انتي نرضي تكوني بعيدة عن قلب اللي يحبوكي كلهم ؟؟!!

طبعا لا ومستحيل

فالحل انك تكوني ع صلة بيناتهم كلهم

ومافي احلى من صلة الرحم

شوفي الدليل دا

{ وَاعْبُدُواْ اللّهَ وَلاَ تُشْرِكُواْ بِهِ شَيْئاً وَبِالْوَالِدَيْنِ إِحْسَاناً وَبِذِي الْقُرْبَى } البقرة 36

والحديث دا

عن أبي هريرة رضي الله عنه قال: سمعت النبي صلى الله عليه وسلم يقول: « إن أعمال بني آدم تعرض على الله تبارك وتعالى عشية كل خميس ليلة الجمعة فلا يقبل عمل قاطع رحم» رواه أحمد ورجاله ثقات وحسنه الألباني في صحيح الترغيب والترهيب.

............

اسف ع الاطالة

إن شاء الله اكون افدتك في من جميع الجوانب

موفقة يارب