طريقك نحو التميز (خطة أ )

[M!SS Lara]

السلام عليكم ورحمة الله وبركاته



~~~~~~




تكملة للموضوع الي نزله الاخ جزاه الله خير A.Y.J في نصائحة لخطة ب الجدد ..
فأنا حبيت انو انزل موضوع لخطة ألف الجدد وبإذن الله الي يطبقة حيضمن الـa+ في كل المواد ..


وأخذت طريقتي من واحد كان العام تحضيري وكان جايب بمعظم موادهa+ ماشاء الله فاحتذيت طريقه والحمدلله الحين معظم موادي a+


بالبداية ..
انصحكم انكم منجد تنتهزو هذه الخطة لأنو الـa+ ماهو صعب ابدا فيها لكن يحتاج لشوية شغل..


بسم الله


(((( الماث ))))

مادة سهله لكنها طويلة ، من المهم جدا انكم تحضرو لدكتور يفهم ، ولو دكتورك مايفهم ، فأحضرو لتانيين المهم اتصرفو :)

والماث زي ماقلت طويلة ، فالي يدرسه يومالاختبار حيضيع ، لكن الي يدرسة اول باول فحيشوفه سهل جدا .
وانصحكم فيه بملخص السعدي .
(ادرسوه كويس وحلو التمارين الي فيه لأنو تجي من نفس افكاره كثيير بالاختبار)


ملاحظة مهمه :-
بالنسبة للأولاد ففي عندهم ابو جبل مدلعهم آخر دلع وينزل لهم اسأله يحلوها و تجي منها نسخ لصق مع تغيير الارقام (اسمه وورك شوب).

بس احنا البنات فما في ده الدلع ، بس في حل اسمه (ملخصات السعدي)



(((الفيزياء)))
ماده ماهي طويلة ، وكلها قوانين وتطبيق ، لكن الفهم برضو مهم لانو تجي اسأله فهم ..
الماده يحتاج لها برضو دراسه اول بأول والي ماتفهمه راجعه حتى تحس انك هاضمه .

وانصحكم فيه بملخص يوسف زويل جدا رهيب
وبدي الماده مايحتاج الكتاب ابدا ، ومافي حاجه للسكاشن وصداعها



(((الحاسب)))
ماده جيدة يتكلم عن (وندوز وعن وورد وبور بوينت واكسس واكسل وعن الانترنت والتعليم عن بعد ) وتنقسم لنظري ، ولعملي .

النظري اختباره ألكتروني ، والاختبار سهل واحيانا متوسط بس تدرسوه كويس جدا وقريب للحفظ .

العملي.. سهل وحيكون بـ دوريين
العلمي الدوري الأول حيكون في ((وورد))
العملي الدوري التاني حيكون في ((اكسل واكسس))

وبوربيونت عشانه سهل فأختباره حيكون مع النظري مش مع العملي .




((مهارات الاتصال))
ماده اختبارها برضو حيكون الكتروني ودي الماده الكل بيجيب فيها a+ لسهولتها ، وانا بنفسي انصحكم انكم تحضروه من اجل الاستفاده لأنو بدي الماده تعلمكم عن تطوير الذات وفن الحوار والاقناع ..
يعني منجد ماده مفيده بالحياه
.



وفيها تكاليف تعملوها وعليها درجات ، خطاب تقديم لوظيفة ، سيرة ذاتية ، نقد كتاب او مقالة او برنامج ،التقدم على وظيفة .
وفيها انشطة تانية عليها برضو درجات زي انكم حتعملو قروب وحتعملو عرض وتعرضو ، وكمان حتعملو مناظرة :)
وكلها انشطة لطيفة وتطبيق للي درسوه :)



وبالنسبة لدراستها فتكفي قرأئه بتركيز شديد .

ومهارات الاتصال مافيها إلا دوري واحد وفاينال وبس .

بالدوري الأول افتكر اني صميته صم وسهرت عشانه وراجعته باليوم الثاني بس حسيت بعدين اني بالغت جدا فيه ..

ففي الفاينال قرأته بتركييز شديد مره وحده وحليت الاختبار تمام الحمدلله ..

فالماده دي مره سهله والكل يحبوها فاطمنو


وأخيرا ..
انصحكم وبشدة بحل عدة نماذج اختبارات ساااابقة في الفيزياء والماث ، لأانها تقيس دراستك + حتحس بإطمئنان لأنو هيئتة زي الاختبار .



هذي كانت مغامرتي مع خطة ألف ..

ومره اخرى اقولكم انتهزو دي الخطة لأنها أسهل من خطة ب

والسلام عليكم
وأي سؤال انا حاضرة