استشارة بخصوص التدريب العملي 1

[AseeR-jeddah]

السلام عليكم جميعاً ...

يا شباب والله محتاس وأبغى منكم الفزعة بالمشورة ..

الموضوع وما فيه إني رحت لقسم سكرتاريا الإعلام آخذ ورقة التدريب العملي 1 وكنت طالب التوجيه للسيف للإعلان .. وقالوا لي وش قصتكم مع السيف للإعلان أعداد اللي طلبوها كثير جداَ جداً وهالموضوع مثير للشبهات وننصحك تشوف لك مكان غيرها أو تطلب التوجيه لعملك دامك موظف حكومي .. فأجبتهم إن هالشركة متعاونة مع الطلاب وتتيح لهم التدريب وتطبيق اللي تعلمناه عن العلاقات العامة .. وقالوا نصيحة لك لا تاخذ فيها لأن الدكتور أحمد اليوسف منزعج منها ..

وشوي إلا والدكتور جاي وقلت له يا دكتور أنا طالب التوجيه لها الشركة وقال ليش بالذات هالشركة وش السر فيها وقلت له ما فيه سر ولا شيء السالفة وما فيها ما نعرف غيرها وقد اعتاد الطلاب التدرب فيها وتطبيق العلاقات العامة فيها .. فأجاب بنبرة غضب لا لا يمكن وأرفض تاخذ التدريب فيها لأنها غير معروفة عندي ولا قد سمعت فيها أبداً ..
قلت له يا دكتور هذي دعاية وإعلان ولقينا فيها الجو المناسب للتطبيق ورفض بشدة وقال خذ التوجيه على عملك وفهمته إن العمل عندي ما فيه علاقات عامة وقال طيب ما فيه عندكم استقبال وقلت إلا فيه قال خلاص يكفي .. والمشكلة عندنا حتى الاستقبال مهمش ووضعوه بس للاستفسار عن مواقع مكاتب القضاة (لأني أعمل بالمحكمة طبعا) يعني بس يجي المراجع ويقول وين مكتب الشيخ الفلاني ويفيده اللي في الاستقبال إنه في المكتب الفلاني وبس ..

وش تشيرون علي .. لأني ما أعرف وش الطريقة بالضبط اللي أكتب فيها التقرير وكيف بألف له عمل وهمي قمت به ..

ما فيه أحد عنده صيغة أقدر أستفيد منها أو تطبيق سواه أحد في عمله أقدر آخذ منها الفكرة ..
أرجو منكم المساعدة يا أخوان وجزاكم الله خير ...