قانون جديد ..قلل الساعات يترفع المعدل !!

[anwaaaar]

هاي جميعا....

لاحظت انو اكتر من موضوع ..يكون محورو الاساسي ..انو الطالب او الطالبه بيقولو لازم اقلل الساعات عشان ارفع المعدل ؟؟!!...
مني فاهمه بيتكلمو كانو دا مبدأ والا مسلّمه والا نظريه !!....
والتبرير انو عشان لما تقل الساعات يزيد التركيز!!...

يعني في بنات ياخدو ساعات اقل وبحجه ترفع المعدل وتلاقيها طول الوقت طلعات وماتذاكر ,,كيف يترفع المعدل ؟؟...والا هيا يعني الشغله اتوماتيك تقللي الساعات يروح المعدل يترفع من نفسو..!!!

وفي بنات ماشالله تنزل الساعات الي مسموح بيها لاخر قطره وتلاقيه كلو اي واي بلس ..لانها تذاكر وتكرف نفسها....واظن داالصح ...

احنا بنات جامعه وهادي مرحله من الحياه ..ايش عندنا فيها غير نذاكر ونشد ونتعب ..ليش نقعد نقلل ساعات ونمطمط فالتخرج والحجه ...ابغا ارفع المعدل ......

الي يبغا يرفعو لو عندو 20 ساعه وحاط فراسو انو يبغا يرفعو حيترفع ...والي عندو 9 ساعات وقاعد يستهبل طبعا ماحيترفع ...

مافي قانون فالدنيا يقول كلما قل عدد الساعات يترفع المعدل !!!...والسبب زيادة التركيز...يسلاااااام...

الي يسمع يقول عاد الدراسه عندنا صعععبه ياحرام نحزززن ...والاختبارات مستحيله ...والمواد يالطيييف تكسر الكتف من كتر الكتب وتفقع العيون من كتر المراجع والوقت الي نحتاجو فالمذاكره ..
ترا والله احنا مرره مدلعين فجامعتنا ....

يعني اذا جات دكتوره بين كل عشره قالت معاكم الكتاب كامل وطبعا نقعد نسخط وندعي ونقول استاذه فيها ويخطيها ..لانو اكيد كمان مهو اسلوب انو الواحد يصم 300 صفحه اكييد ماحيحل .. ودا مو موضوعي دحين ...

وبعدين ترا هيا كبيرها 6 مواد و18 ساعه مررره عشان احنا مهمين وورانا حل قضية الامم محنا قادرين نداكر 6 مواد ...كيف كنا ايام المدرسه بعشروميه ماده ..والا عشان ماكان احد يخيرنا ...كنا نعرف ندرس وننجح...
بغض النظر طبعا انو في ناس عندهم صعوبه فالفهم ..وناس منجد ماعندهم وقت ..دي الاشيا استثناءات ......بس منجد سرت مااقرا كم موضوع الا الاقي احد كاتب ابا ارفع معدلي عشان كدا حقلل ساعاتي ....

عجبي!!!!


((اعتذر منكم جميعا لو الاسلوب شويا مو مزبوط بس والله من قهري انو احنا كدا ..اتعودنا عالدلع ))