طلبت خلع ...أبغى نصايحكم

[فنية معمل]

السلام عليكم ورحمة الله وبركاته
مااعرف هل موضوعي اللي نزلته في المكان المناسب ولا لا
أبغى رأيكم في موضوع الخلع من زوجي
أحكيلكم الحكاية من أولها
أنا انخطبت في شهر شعبان (السنة اللي فاتت) وفي نفس الشهر ملكت
الموهم في يوم ملكتي دخلوا علينا حريم اخوانه يضحكوا ويمزحوا معه أنا مرا زعلت لأن في البداية ماصرح لأهلي إنو من العوائل اللي يشوفوا حريم بعض ويتكلموا مع بعض
بعد الملكة صار زوجي يكلمني كل يوم وسبحان الله كل يوم أحس اني مو مرتاحة معه
وكانت زيارته لي مرا قليلة تقريبا زارني وقت الملكة 4 مرات فقط
كنت أحس أحيانا انو مايصلي من كتر مايكلمني ويدخل وقت الصلاة ويطول معي ومايقلي إنو بيروح يصلي
ودائما في نهاية كل مكالمة يقلي انا رايح انام اتصلي علي وصحيني ويحددلي الساعةاللي يبغاني اصحيه فيها
الموهم في منتصف شهر شوال طلب مني اسويله وكالة بإسمي قلتله والله صراحة أنا أخاف من دي الأمور وماحب أدخل فيها
راح عصب وصار يصرخ علي ويقلي أنا أقدر أستخدم اسمك من دون ماأقلك بس أنا حبيت أستأذنك
من بعد موضوع الوكالة صرت خايفة وقلت لأهلي خلاص أنا ماأبغى اكمل معاه....أهلي منعوني وقالولي مافي عندنا بنت تطلق قبل زواجها
صرت أبكي أبكي مرا متضايقة وأمي قالتلي الرجال مرا طيب وموضوع الوكالة ماله حق فيه وليه الحق أرفض
بعد 3 أسابيع تقريبا صار فرحي
ولاحظت على زوجي فترة شهر العسل انو مايصلي أبدا ولما كنت أقله ليش ماتروح تصلي يقلي أنا عندي عذر اللي هوا القولون العصبي فما يصلي الا لما يخرج في الليل
ويوم الجمعه يشغل أغاني في الصباح وقبل صلاة الجمعة بساعتين ينام ويصحى على الساعة 2 ومايصلي أبد
في شي ثاني انو الزمني انو اكشف وجهي على أخوانه وانو اجلس معاهم لما يجتمعوا على سفرة الأكل وقلي الحرمة لازم تتبع زوجها وانو هوا يعتبر حريم أخوانه زي أخواته
.............بعد فترة صرت أحس خلاص انو أنا ماابغاه وقلت لأهلي وبرضو اهلي يحاولوا يقنعوني انو طيب
مرا تعبت وصرت أحس ببغض له حتى مرات كان زوجي يسألني هل انت تبغيني ولا لا في كل مرا يسأل دا السؤال
آخر مرة قلي اذا كنت ماتبغيني اطلقك بس ترجعيلي حقي اللي هوا 250000 ريال
أنا قلتله يازوجي احنا لسه ماكملنا شهرين ولازم نصبر على بعض ونتأقلم
قلي انا ماعندي شي اسمو حنتأقلم
المهم زوجي راح كلم أهلي وقلهم إنو أنا عرضت عليه 250000ريال علشان يطلقني.......مرة انصدمت لما بلغوني أهلي بالموضوع
وكان كل صغيرة وكبيرة ويبلغ اهلي واهله بيها
مرا انصدمت من أشياء ما كنت متوقعها منو
وقلي النفقة مافي نفقة الا لما احمل وبطاقة الصراف تبعي مايبغاني أخليها عندي...يقلي خليها عند اهلك (طب كيف دا مالي وتعبي بأكسبه من تعبي في وظيفتي؟؟)
أبو زوجي اتهمني اتهامات صعبة قلي انو أنا وحدة فاجرة واتهمني اتهامات بطالة
زوجي كمان قال انو أنا أشرب حبوب منع حمل علشان مااحمل منه......وانا الحبوب اللي جالسة اشربها تبع حمض الفوليك
في حاجة قهرتني مرا انو زوجي راح كشف عن حساباتي البنكية وعرف انو أنا ماخدة قرض قبل سنتين حولته لوحدة كنت أبغى اساعدها علشان مرت بأزمة وكمان كشف على حسابات الحرمة اللي ساعدتها
بالله ايش رأيكم انا مرا متضايقة رحت وكلت محامي ورفعت قضية خلع