غرابه يادنيا كان العشم يبقالي ويحبني لحالي>>فيس يبتس

[ماسة المنتدى]

بسم الله الرحمن الرحيم

أحد قال سماجهـ..؟
أحد قال مرض..؟
بالفعل ذءهـ واقعن يحوم التسبد وينغص منامات الجن والانس

يااااربييه وتقولون لي خليتس مره وتقولون لي الحريم مب بثراات قسمن الواحد صار يستحي هالوقت يقول انه بنت

قررنا في ساعه مشؤمه ندخل هالمنتديات النسائيه وماادراك ما المنتديات النسائيهـ!!

,’
اعلان:
الحقن يبنات طريقه تخلي الزوج يقول لتس كلام حب خلال 24 ساعهـ <~ياحياه الشقى
جديد:

رجلي يغار من السواق !!1!

عاجل:

ابونا معيي علي نسافر للشرقيه بالقيطار

لايفوتك:
ليلتي الليكلها هواش وضرب(بالصور المتحركه)

..!!

طبعا هاذا قطره من بحر مابعد خشينا بالعميق....

سكرو النور واربطو الاحزمه استعدادا للاقلاع ورجاااءن مانبي حركات نص كم لان الرحله مطوله

1/الالعاب الزوجيهـ:

من تبدا تدخل المنتدى الاوتلقى هاكا "التوقيع" اللي يشوفه العمى ومكتوبن عليه العاب زوجيه !

سارعي قبل نفاذ الكميه"ممنوع دخول المراهقين" ..(خشت ولد توه مخشن صوتهـ )

لعبة العصا المضيئه (عصير غوار مهب لعبه)

عزيزتي لما يطفى الكهرب عليكم ماعليتس الا انتس تقومين وتأشرين بها في عين رجلتس وتقولين انا هناا من باب الظرافه يعني
لحظتها بيلحقتس واذا خلصتي كبي اللون على جسمتس لين تغدين تسنتس لوحه تموينات وبيخق همن تعيشون حيات سعيدهـ

**
موظي وهي تسولف مع جارته ام اثير ياكلون فشفاش ويشربون نعناع..ومطيحين سب برجالهم تهمس اميظي :مالتس علي يميين يم اثير ان ابونا ماغير يوكلن من هالتبن
واانا يحول دابتن سليمه لااهش ولا انش
تعدل ام اثير الجلسه وتدق الصدر بحاله هستيريه فتطلق صرخه مدويه
هزهزت اركان البيت ازهلللليه ازززهلييه ازهلييه ياميظي وانا مرت فادي.
ترد موظي هها وش عندتس.
عاد ام اثير مثقفه ودايم على النت قالت شوفي
انا مره جاني زوغة عقل .. ودخلت هكا المونتدى الفوشي .. وقلت بدخل قسم الحياة الزوجيه حيث اني ابي اتثقف حالي حال الحريم قالت موظي : الله واكبر حبكت الثقافه يوم كبرتي وطقيتي الـ 39
أم اثير:اعقبي خليني اكمل كلامي انا منيب مثلتس داقمتن عمري .. اسمعي عاد .. وادخل والقاهم طايحين في شيّن اسمه العاب عااد تخيلي [سعودي يلعب لعبه مع زوجته ]
- هاااااااااااو مير تشرق موظي وتهبدها ذيك مع ظهرها .. قالت تقولين صادزه قالت والله منيب اتسذب زد عمرتس شفتيني اتسذب عليتس هاه !!
موظي:لا والله التسذب خيبه بس اخبرتس جحوده وماتطلعين الهرج..
- لامنيب جاحده هالمره بثقفتس..شوفي بس هما لاجا رجلتس تافلن العافيه من العمل عاد انتي انقزي واحظنيه.

طررطاخ <~صوت بيالت الشاهي راقعتن بجبهت ام اثير
- وووجع وش جاتس لمختين
-صاحيه انتي صاحيه تقولين هالحتسي وش اللي احظني ومااحظنني وين احظنه بالصاله بعد عشان يخلين انا والارض واحد
.. ردت ام اثيرايييييه وصلنا خيير.. اللعبه هذي بتفك العقده
قامت وفتحت اللاب توب وقالت شوفي هالالعاب هذي ..

عندتس لعبت الكوكاو تجي معه هديه براطم ومصاقيل .ترد ذي اقول هها بس ابونا به سكر قسمن ان ماتعدي نص الليله ولاه طايحن علي(صح يالرومنسيه

اما ذي مدري وش سنعهـ بس لاسمح الله وتبي تسون لكم فنتو ولا شي وخلص ثلجكم حطيه وسكري اللنمبات بس انتبهي لاينفض براطمتس

و لابغيتو تسوون حفله بالظلام وتشربون ويسكي ولاالكيسان مولعه <~تسمع بالرومنسيه ذي

وهذا اذا بغيتي سريركم يولع تسنكم في عرس دواسر عقودهم فسفوريه شغليها

وهنا جن يساعدونتس في الرومانسيه بسم الله شوفيهم عيون وقلب بس

وذي عاااد ازيين لعبه تخليتس انتي و رجلتس تسنكم معاريس..

ركزو لي على همسه ولمسه بالله

موظي شاقه الحيا:هههيهيهي
ام اثير:يحليلتس تستحين
:هها بس اعقلي وعلميني عن هاللعبه
وراحت ذيك تعلمها وتفهما وكلش .. وخلص الحتسي وكلن راح لبيته .. يطبق هالالعاب لين انكرشن من رجالهن وعرفنان الله حق..
سااده يعني وشوله الحوسه والقروشه ..؟
ترى البساطه زينه ياحريم البلا لو انها تسوي ليلة رومانسيه على حق وحقيق كان محد نقد عليها لكن العاااب اضائه . وشروخ وصواريخ ونوافير وقمر وشمس
ليه طيب

ماظنتي فيه رجال ينبسط على هالخرابيط من وجهه نظري يجاملها اول مره اذا كان فيه خيير واذا بايعها كرشها وكسر مجاديف والدينها
يعني نصيحة يابنات لا تطاوعون هالنوعيه وقسماً حركات ولامبزرت المتوسطه..يعني بدال هالقروش اللي تضيعينهن بهالمطاريس سنعي دارتس ابرك
اثاث راقي ونظافهـ ووجه سفر وريحة زينهـ افضل لتس من هالخرااااااابيط الغبنه انهم يلعبون على هالحريم وذولي يصدقن...

2/حركـآت الترللي:

اقتباس:

ألبسي ملابس اسبورت برتقالية اللون ولا تنسي الحذاء البرتقالي والماكياج البرتقالي الصارخ.

معرسن على واحدن من البلديه مب آدميه

[quote]

اقتباس:

ضعي علي الطاولة عصير برتقال وكيكة البرتقال

زيني المكان ببالونات بيضاء وبرتقالية اللون واحضري برتقال الزينه وعلقيها في كل زاويه

شكله ذي مقطوعن سره بمزرعه بردقان الله يحوم تسبد العدو اجل ليله رومنسيه ونقرض من البردقان ياشيخه روقينييي

اقتباس:
يذهب للحمام وبالتالي يحصل على المفتاح للدولاب ويفتح الدولاب ويتفاجأ بالبالوانت والهدية

وااااااااااااااااااااااو

ياااربااااه بلالين بلالين

طيب سويت ذا الحركه والمطلوب؟ زاد معدل الحب؟ سويت حركه اغراء؟ زياده فتنه

ياصبر الارض بس

اقتباس:

وخمس بالونات كتبت فيها (اوامر) .. مثلا : أأمرك ان تقوم بعمل مساج ..... أو اامرك ان تقوم بالنط على السرير 5 مرات ... خلي بعضها مغري وبعضها مضحكه

عنبوتس مهبوله انتي؟ رجال كبر الحمار وتبينه يدابتس فوق السرير طيب وان جاتس طرنمبه واللياقه صفر عالشمال

اقعدي به مير مااخبل منتس الا هو

فـــــآآآآصــــل

اقتباس:

عزيزتي الم يخطر في بالتس مد حب الزوج للعبايه حيث انه عندما يرى شيئاً اسود

يتزلزل كيانه فما بالك عندما تكون للرومانسيه .. وفي البيت ..

كل ماعليك .. تنظفين بيتس وتعطرينه وتجهزين شنطتس .. وتلبسين عبايه

وتحطين مكياج وعاد انتي واختيارتس في العبايه .. انتبهي الله لا يخزيتس تلبسين عبايه اسلاميه تبرق ..

.. واجلسي بإنتظار زوجك عشان تلعبون حريم .. ولا تنسين تجلسين ع الكنب الا وانتي ملثمه

قومي بتشغيل اغنية حمام جانا مسيان ولا سلّم عليا .. وارقصي بغنج .. عاد انتي دبر عمرتس اخلقي رقصه خاصه بالعبايه
حينها سيراكِ زوجك بهاذا الشكل ويجنّ جنونه .. اذا كان من الفاهمين راح يطامر من الروعه ويشهق ويقول انهبلت .. واذا
كان دبشه راح ينسجم بالجو ويعش اجو بحرينيه بعدين شغلي اغنية تايتنك .. والبسي برقع الصقر عشان خدودتس تطلع
وارقصي معه ولا تنسين تلوينه ظهره لانه صار حرمه مهوب انتي بتقولين وشوله هالحقران بقول لانتس فقدتي عقلتس وجربتيها

جيــــناكم

3/حركات التميلح:

تقول قلب زوجها

اقتباس:

بقول لكم حركة اذا سويتها احس زوجي ينبسط

لما نكون نشاهد التلفزيون اخلي راس على رجلية ورجولي بأتجاة اللتلفزيون (زي الأطفال) ههههههه

هو عفويآ يجلس يمسح على راسي

اذا شفت فية تفالع هههههههههههه ( تفاعل) بحكي لكم الباقي

طيب وش نزين لتس؟ نخق على رجلتس همن ندوره عشان نعرس عليه؟ ولانقول ياحظه اخذتن ذرب

ههابو من مسكتس كيبورد

تقول قلب دحومي
اقتباس:
هلا خواتي
انا الصراحه ابو الشباب اذا جاء من اي مشوار ......قبل البزران كان يناديني بسمي وحيانا حبوبتي
وعقب البزر الاول صار يناديني يا..................بنت الحمدلله مخليني صغيره واذا عصب ؟؟؟؟؟؟؟
يناديني وجع عادي لاني ارفع ضغطه ههههههه
بس يحبني. اذابغاء عشاء زين تعالي شوفي انواع التميلح عشان اسويله عشاء يفتح نفسه يستاهل يدلع ويشوف الزين كله وه يارب يخليه لي وللبزارين
هاذا اللي يسمونه بعلم النفس الشعور بالنقص

لو احلف ان الحب والدلع ذا اللي تقول عنه هو طراقين قبل وبعد العشا وبقس سفري على الطاير

<--------يتبع تكفون لاحد يرد