اش شعوركم وانت انقبلتو في كلية الطب << ابغى مشاااااعر

[LucKy LAD]

طيب اول شي

شكرا لصاحبة الموضوع وما يحتاج اثني عليه لأنه واضح مدى روعته من التفاعل الحاصل


ثانيا
ما اعرف اذا اقدر اوصل للمبتغى من الموضوع لكن حأعمل كل اللي في يدي وانقل الموقف كما حصل

ولكم ان تحكمو على المشاعر وقتها

حأكتب الموقف واتوقع انه يوضح الشعور هذا ما وصلت اليه بعد نقاش مع نفسي عن اسلوب الرد على الموضوع دا

طيب

يوم الثلاثاء اتأكد الخبر ان النتائج حتكون الاربعاء

انا ما ابديت اهتمام كبير ( بصراحه ما ادري السبب ) واتصل عليا ولد خالتي


يقللي تعال البيت اقعد معايا نتكلم شويه وزي كدا

انا شفت اني ما عندي ارتباطات ووافقت وفعلا رحت وانا خارج من بيت خالتي

قلتلها ترى بكرا حأعرف انا ايش حدرس فدعواتك يا خاله

قالتي الله يوفقك ومن دا الكلام الروتيني بدون نفس


رجعت البيت تعبان حطيت راسي ونمت

صحيت ونزلت الصاله وفي يدي لاب توبي ( كالعاده )

امي في المطبخ

فتحت الاودس وانا اكتب رقم الطالب

فجأه حسيت بالخوف وكأنه اتفجر داخلي وحده مرره


وقفت يدي ثواني وبعدين هديت نفسي واكملت الرقم ( مع العلم اني ادخلته غلط اول مرره من الخوف )

بعدين فتح مع العلم اني فاقد الامل من طب الاسنان بقوه لأن كثير قالولي ان العدد حقه اقل من البشري وما الى ذلك

وكنت راسم توقعات الى 90 في الميه انه الكليه حتكون صيدله او بشري

فعلا قرأتها وكان مكتوب اسنان

ابتسمت وسجدت لربي سجود شكر وهذا الي لاحظت ان الكثير سواه وفعلا سررت بما قرأت

رحت لأمي سلمت على راسها وقالتي انا عارفه يا ولدي وزي كدا

بعدين مسكت الجوال ولأني لا املك اي صديق شعرت بحزن لأنه لا يوجد من اقول له باركلي

صليت العصر وجاني ولد الجيران بعد الصلاه يكلمني

وقلتله وباركلي وقالي لازم تعزمنا

انا وافقت واتعشيت معاه في فدركرز في الروشان مول

دا كان يوم قبولي واسأل المولى انه احتوى المشاعر الي تبغو تشوفوها

طبعا احلا ما في الموضوع وانا اكلم امي كان اخويا الكبير ( طالب طب بشري واقنعني ع الاسنان ) جالس ع الطاوله

ومن بعيد عمل بإبهامه علامة الجوده ^^ قالي تمام عليك


كامل احترامي للكل

LucKy LaD