نشاط مادة الشباب وقيم المواطنة/فرع الفيصلية/ لطالبات الانتظام فقط

[عزتي عزوتي]

بسم الله الرحمن الرحيم
السلام عليكم ورحمة الله وبركاته

الموضوع دا ترى تحويلة من موضوع أساسي(متأثرة بطرق جدة ) وهوا

طالبات الأنتظام فقط_تجمع مادة الشباب و قيم المواطنة ،,, مع أ/ نورة الحمودي

وفيه تنويه بأن الموضوع خااااااااااص فقط للطالبات يعني يا استاذة المادة الحبيبة فضلا لا أمرًا
ما نبغى نتعب عيونك بالقراءة فريحيها


///
//
//
/




طالبات مادة الشباب وقيم المواطنة في فرع الفيصلية فقط
موعدنـــــــــــــــــــــا يوم الأحد الموافق
30/1/1433هـ
المكان : مبنى المدرجات / قاعة 110

طبعًا اللي معانا في المادة رح يعرف إيش الهرجة

فحبيت إننا نتفق على برنامج لداك اليوم إن شاء الله وأكيد عارفين إنو الاستاذة كانت تأكد على إنو
الجو العام يكون شعبيات وتراث وشي زي كدا يعني ثقافة كل منطقة من مناطق المملكة
ياريت اللي عندها شي يفيد البرنامج تقول عليه عشان نتفق عليه
ونشوف كيف ننفذو ونجمع أكبر عدد من الأنشطة اللي نقدر نعملها في داك اليوم


ــــــــــــــــــــــــــــــــــــــــــــــــــ ـــــــ
بداية حابه أخذ رايكم في عبارات ترحيب عند مدخل القاعة
حتكون عبارة عن عبارات ترحيب نزين بيها المدخل وفيه كلمات حاولت أجمعها من كدا لهجة
زي ( مرحبا ألف - يا مرحبا من ملفاك إلى ملقاك - مراحب - مرحبمبكم - مرحبا هيل عد السيل - يالله حيهم - )واللي عندها زيادة يكون في صميم لهجات مناطق المملكة عامة تفيدنا ربي يسعدها

وبعدين فيه كدا مسابقة أو ألعاب خفيفة مسلية وفيها كمان تعريف بأشياء من ثقافة المناطق

مثل

أمثال شعبية ( تكميل المثل - تمثيل المثل - ترتيب المثل - أمثال طريفة - تفسير المثل ...) طبعا مع المقترحات اللي عندكم

فيه كمان لهجات ( كلمات وتفسيرها ) طبعًا أنا اخترت لهجتي وهيا الجداوية وطبعا ضميت معاها المدينة ومكة وينبع ويعني اللهجة الحجازية.
والباقي عليكم كل وحده تشوف اللهجة اللي تعرفها وتقدمها بطريقتها
سواء كانت مسابقة أو تعريف أو أي شكل من الأشكال عاد كل وحده واللي تحبو

كمان المعتقدات لكل منطقة واعتقد دا شي سهل بما إنو كان من ضمن التكاليف اللي سويناها فأكيد
حتكون جاهزه عندكم

فيه اقتراح لكن يحتاجلو جرأة شوية
ألااااا وهوا إنو بنات من كل منطقة ولهجة يقولو جملة معينة وكل وحده تقولها بلهجة منطقتها
يكون فيها شوية فكاهه أو صعوبة أو غرابة وتكون الجملة من اختيار الاستاذة أو البنات

طيب دحين نجي للتقيل وإلي هوا الضيافة والحلويات والأكلات الشعبية
عاد تحاول كل وحده مننا تجيب سواء أكلات شعبية خاصة بمنطقتها أو حلويات أو اي شي
يمد بالصلة لتراث منطقتها

وياليت لو عندكم اقتراح لنوع الهدايا للمسابقات بما إن الجو
عامة شعبي فإيش تقترحو ؟

ترى يد وحده ما تصفق يا بنات فياليت نجاول نتجمع ونطلع بيوم ما ننساه بعد كدا ونسعد استاذتنا الحبيبة نورة وتستاهل كل خير

انتظر مزيد من الاقترااحات والنشاطات وفيكم الخير البركة ولا تستقلي أي شي ممكن تقدمية
حتى لو فكرة وغيرك يقدمها

أتمنى التفاعل وربي يجزاكم كل خير

وسلامتكم

[amooonaa]

كويس فتحتي الموضوع كنت مره شايلة هم دا اليوم افكارك حلوه انا جاني تبلد حسي مافي اي فكره جاتني

المهم عندي فكرة لعبة حلوه

نعمل دائره مجموعة معينة وكل وحده توصل للتانية كلمه تكون نفسها ونشوف مين اي وحده تغلط تطلع من اللعبة وتتعاقب

وعلى فكره جبت اكياس زباله الله يكرمك


وان شاء الله اعمل قهوة واحاول اجيب اي شي شعبي

[عزتي عزوتي]

يسعدك ربي أمووونه على تجاوبك
أعتقد الأغلب مشغول دي الأيام بالتجهيز للامتحانات
ربك كريم
لعبتك تقصدي تلفون خربان ههههههه ربي يسعدك

وشكرا على إحضارك لأكياس الزبالة -اكرمك الله - لأن النظافة شي مهم
وحرام نهلك العاملات أكتر ماهم مهلوكين ربي يعينهم وفوق كدا نعمل بقيمنا في المحافظة على بيئتنا الجامعية :)
وما يكون تقيمنا على ورق وبس

و كمان كلمت المشرفة في المبنى على الطاولات عشان نحط عليها الأكل والقهوه
والأشياء دي وقالت أي وقت تعالو كلموني ونجيبها لكم
لغاية القاعة :) ربي يسعدها ويوفقها كانت بشوشه ومتجاوبه وهيا تكلمني

المهم أموونه اعصري مخك ترى رح تطلع أفكار حلوه >>>>> يعني لا تنامي الليل بس فكري خخخخ
يعطيك الف عافيه

وفي انتظار البقية المتحمسة مثلنا ;)

[جوريه حربيه]

ماشاء الله عليكم .. ,, حمستوني اشوف ابداعاتكم .. الله يقويكم ..
اذا عملتوا معرض صوريه ونزليه فقسم الاخبار ..
وبالتوفيق لكم جميعا ^_^

[آمال جده]

بنآت المشاركه حتكون لآزم شي نلقيه نقدمو

ولآ عادي لو اكتفيت بالضيآفه ؟

والله يعطيك العافيه ع المبآدره

[عزتي عزوتي]

المشاركة الأصلية كتبت بواسطة جوريه حربيه ماشاء الله عليكم .. ,, حمستوني اشوف ابداعاتكم .. الله يقويكم .. اذا عملتوا معرض صوريه ونزليه فقسم الاخبار .. وبالتوفيق لكم جميعا ^_^

أسعدني تواجدك في الموضوع جورية
بس الموضوع ما يتعدى نشاط داخل القاعة إنتي خليتيه معرض مرة وحده
اتمنى إنو يكون شي مميز والكل يشارك وخصوصًا إننا داخلين
على فترة اختبارات يعني حيكون تغيير جو شويا
ربي يسعدك

[عزتي عزوتي]

المشاركة الأصلية كتبت بواسطة آمال جده بنآت المشاركه حتكون لآزم شي نلقيه نقدمو ولآ عادي لو اكتفيت بالضيآفه ؟ والله يعطيك العافيه ع المبآدره

ويعطيكم ألف عافية

المسألة يا قلبي مجرد اجتهاد شخصي ومافيه شي محدد طلبتو الاستاذة
لكن متوقعه تشوف مفاجآت مننا زي ما وعدناها

مشاركتك بحسب ما تقدري ولو في عندك حتى فكرة قوليها
ونشوف مين ينفذها أو يشارك فيها

[amooonaa]

اكزب عليكي لو اقلك في دماغي حاجه غير انو تيجي الاجازه واروح لمدينة ان شاء الله حاولت قدر الامكان اعصر اعصر اعصر بس مافي اي فايده

على فكره عجبتني فكرتك حقت الطاولات ماشاء الله متى رحتي كلمتيها

[نوره الحمودي]

السلام عليكم ورحمة الله و بركاته

يسعد أوقاتكم يا بناتي و ربي يحفظكم ، حبيت اسأل بالنسبة للغرفة ، مو كان اتفاقنا أن النشاط في غرفة 9 ، كيف صار في غرفة 10 ؟؟؟


و بانتظار مفاجأتكم :)

[عزتي عزوتي]

المشاركة الأصلية كتبت بواسطة نوره الحمودي السلام عليكم ورحمة الله و بركاته يسعد أوقاتكم يا بناتي و ربي يحفظكم ، حبيت اسأل بالنسبة للغرفة ، مو كان اتفاقنا أن النشاط في غرفة 9 ، كيف صار في غرفة 10 ؟؟؟ و بانتظار مفاجأتكم :)

وعليكم السلام ورحمة الله وبركاته ...الاستاذة نورة هنا ويسعد أوقاتك كمان يا استاذة
اممممم حبيت الموضوع يكون مفاجأة عشان كدا قلت التنويه إن الموضوع للطالبات فقط

صحيح الخطأ مني في رقم الغرفة مع إنو كل مرة نحضر فيها المحاضرة حق المادة
لكن الحمد لله العتب على التركيز

الغرفة اللي فيها النشاط بإذن الله غرفة 109 زي ما قلتي يا استاذة
لقائنا بإذن الله يوم الأحد في غرفة 109