هل تتزوج فتاة أحببتها من قبل؟؟؟؟

[داوود]

احب في البداية ان اشيد براي الاخ الفاضل راكان

وما اتحفنا به من ردود جميلة ومقنعة

وبصراحة ليا مداخلة قوية مع الاخ X_bioc

في البداية اتفضلت يا اخونا الفاضل وقلت لو عملنا دراسة

وبقدرة قادر ماشاء الله عليك على طول حطيت انه النسبة الغالبة انه الزواجات اللي بتقوم من غير حب فاشلة

واسمح لي اقولك عدة اخطاء ارتكبتها في دي الجملة

اول خطا انك خليت انه السبب العظيم والسبب الاول والاخير في فشل هادي الزواجات هو عدم وجود الحب


تاني خطأ انك قلت حق يراد به باطل وهو ان نسبة كبيرة من الزواجات تفشل ( وانا اقول حسب مجلاتو جرائد محلية وتحقيقات صحفية كلامك صح )

ولكن كونك تنسب ان سبب الفشل هو عدم وجود الحب هدا خطا كبير فالاسباب عديدة يمكنك الرجوع الى هذا الموضوع في اكثر من مكان والاستزادة فيه


بعدين انا بدي افهم حاجة معينة

دحين انتا بتجيب ادلة واحاديث ..... اش الشي اللي تبغا توصله ؟

مايبغالها واحد زكي

انك تثبت من خلال الاحاديث دي انه كلامك صح وانه الحب قبل الزواج صح

واحنا كلنا نتفق معاك

بس هنا في مفترق طرق

بينه الاخ راكان انه الحب موجود ولكن اللي ماهو موجود هو المقابلة أو الماسنجر أوالتليفون أو اللزي منو (مفرقة او مجتمعة )

يعني خلينا نكون صريحين

بعدين مين قال انه سنة كافية انك تعرف الشخص ....( ممكن تحدث بينكم يعني مواقف عديدة خلال السنة فا تعرفه )

ولكن حسب ما الواحد عايش الامور دي ما تكتشف الا من خلال عشرة طويلة

اثبتها برضو اخونا راكان صراحة رده كان جدا جدا رائع ومنطقي وكان يبحث عن الحق ؟


وفي الاخير يا اخونا اكس بايوك

تقول خلينا من الفتوى وخلي الموضوع حبي

اش اللي خلي الموضوع حبي

ترى يعني لازم نتمسك بديننا في هادي المواقف ونقول كلمة حق

يعني مو شرط انه الشخص يسويها بس على الاقل يقول اش هوا الحق

اش هوا الصح يعني لو سالت اي مدخن يقولك التدخين مضر وفيه ويخطيه وعادة خاطئة وهوا بيسويها

لكن في الاخير ما تخليه ينكر انها خطئ واللي ينكر فهو مكابر ومحد فينا يختلف على دي النقطة

بعدين ياخونا اكس بايوك

قلت البنت ماهي كافرة ......... اكيد تعرف انه في واحد اتعذب في قبره عشان كان مايستنجي من البول

مو عاد كفر

الكفر امر عظيم ........

يعني يا مسلمة يا كافرة ........ في بينهم طبقات حتى الاسلام يرتقي الشخص ليصبح مؤمنا ثم يرتقي ليصبح محسنا

وهو اعلى الدرجات

وبعدين ماذكرت عن انه ناوادايز كثر الاتصالات وما تقدر تثبت انه البنت كلمت قبل كدا احد او لا

فا هدا الموضوع على الطرفين مو فقط على البنت ..... هدا شي

ولكن الرد على هذه النقطة هو ان الشخص اللي بيتقدم لفتاة اهلو بيسالو عنها ويتاكدوا ويتمحصوا

واذا وجدوا في الاخير انها الفتاة المناسبة وعند النظرة الشرعية كل مين فيهم رضي بالتاني وصار الزواج

خلاص الرجل اجتهد وسوى اللي عليه طلعت البنت دي مكلمة ولد قبل كدا حيكون شي في علم الغيب بالنسبة له

مايدري هوا ...هدا شي بينها وبين ربها ... اذا تابت وربنا غفر لها (وراح افترض أنا ) انها بما انها اتزوجت فا مالها الا زوجها ( واذا كانت ريمة رجعت لعادتها القديمة) فاتمنى انه يكتشف دا الشي ويجري اللازم

فا خلاص مابيدو شي امر غيب كيف تحكم في امر غيب مجرد تفرض افتراض (مع وجود الحقيقة) وتحكم هدا لاهو عقل ولا منطق

بس لو انك متاكد مليون في المية انها كانت تكلم قبل ماتتزوجوا او بعدو

قبل الزواج كان يدري ورضي ما ادري اش اللي يخليه يرضى

وبعد الزواج اذا اكتشف دا الامر في واحد يطلق وواحد يستر وواحد ( كل بني ادم وطريقته) في النهاية دا موضوع تاني يعني

بالتالي لايجوز لك الافتراض على الغيب والادعاء بوجود احتمال انه تكون كلمت شاب قبل كدا

وتفترض ان هذا الافتراض صحيح وتفرض على حسب هذا الافتراض افتراض اخر وتقول

بما ان هدا الشي صحيح اذا اني اتزوج واحدة اعرفها افضل من اني اتزوج وحدة لا اعرفها


ليش مايصير لانه السبب الوحيد اللي انتا من خلاله تبغا تخلي فيه الزواج عن مسبق حب بطرق خاطئة

مبني على فرضيات افترضتها انت ونسجها خيالك حتى تصنع سببا لما تفعله

اما النقطة اللي قلت فيها اذا هي ما قدرت تساوي علاقة مع احد وهي عند اهلها

فهل هذا سيجعلها تقوم بعلاقة وهي مع حبيبها ؟(زوجها)

اذا كنت تقصد بالحب بعد الزواج فانا معك

وان كنت تقصد بالحب قبل الزواج بطرق خاطئة

فارد عليك واقول

هي خانت اهلها (ابوها امها اخوانها ان وجدو ) معاك

فا من الطبيعي جدا ان تخونك انت وحدك مع اخرين

ولا تنسى انك انت كمان خنت اهلها وكنت ........ تكلم بنتهم من وراهم

توضيح: لمن اقول انت ما اقصدك يا اخ اكس بايوك على وجه التحديد اقصد البني ادم الشخص

الا ان تابت وعلمها عند الله

المهم يا اخونا الكريم اذا اخطات سامحني ولكن ما اقصده هنا هو الخير ان شاء الله واحقاق الحق وابطال الباطل