علمي خطة ب >> بنات <<

[كوكو شانيل]

السلام عليكم ورحمة الله وبركاته
كيفكم بنات واش اخباركم
يا بنات بليز ما عليكم امر اللي تقدر تساعدني يا ريت ما تبخل عليا
اختكم في الله تعبانه وما قدرت اداوم لا امس ولا اليوم .. يعني مو دلع والله
وطلبي منكم تفيدوني اللي جدولها زي جدولي بليييييييييز تقلي اش اخدوا واش قالولهم واش سار معاهم
ولو طلبي صعب انا اسفه واعتذر مره تانيه والمصيبه الاكبر اني ما اعرف ولا احد خطة ب كل صاحباتي خطة أ
واكون ممنونة جدا
وفاااائق شكري للجميع

[كوكو شانيل]

طيب على الاقل بس فهموني اش حيقولولي على غيابي وهل طلبو كتب ولا لأ
بليييز والله أحزّن

[بـ س ـام]

الأخت الماركه ..

اهلا فيكي .. (فيس يضحك )

اقولك لاتقلقي ولا حاجه
أولا اكيد حالكم مو أفضل من حالنا
فنحن للحين ما أخدنا شي رئيسي قولي ليش ؟
لأنه تحديد مستواك بالإنجليزي راح يغير جدولك
والجدول الأساسي حيكون يوم السبت ياريت تشيكي عليه
الصباح قبل الروحه للجامعه وتطبعيه اذا تغيرت أوقات المحاضرات
والمباني كذلك ..

لاتخافي ماحيكون حصل شي من ناحية طلب الكتاب لأنه لسه بدري
ومن ناحية الغياب أيضا ماغيبو أحد بأي مكان ومافي أي ضرر من غيابك مره أو مرتين
أو حتى 5 ..

حبيت أفيدك لانك متحمسه وماشفت أحد رد عليكي من البنات (فيس خجول ) ..

:

[مشمشانا]

للاسف مو نفس جدولي

بس هم ما رح يتكلمو عن الغياب ان شاء الله الشعبة حقتي اخدو كيمياء واحصاء و في شعبة اخدو احياء و احصاء
الانجليش مافي لحد دحين وطبعا طلبو الكتب بس تقدري تروحي بكرة وتسالي اي وحدة من شعبتك ايش الكتب المطلوبة

[rarba]

اوكي لا تخافي ما صار شي,
الدكاترة ما اخذوا الغياب ولا الحضور,
بس أعطونا أسماء الكتب ومقدمة بسيطة عليهم , يعني أول chapterبس
أسماء الكتب:
الإحصاء: Elementary Statistics A step by step approach
by: Allan Bluman الطبعة العاشرة
الكيمياء: Chemistry by: chang الطبعة السابعة
الكتب تقدري تشتريها من مكتبة الخوارزم إلي في الجامعة, بس جيبي 140 ريال لكل كتاب
أما النجليزي والاحياء ما أخذنا شي

[مشمشانا]

^

للبنوتة اللي فوقي اعتقد انك من شعبتي الكيمياء بتاخديها عند د. فوزية و الاحصاء أ. دعاء

معلومة صغيرة الاحصاء قالت الطبعة العاشرة بالنسبة لمكتبة الشقري قالو مافي طبعة عاشرة طبعة دي السنة هي السابعة
ومستحيل تنزل العاشرة قبل تلات سنين وبعدين اثناء ماهي بتتكلم قالت العام كانو بياخدو الطبعة السادسة فمعناتو السنة السابعة

[شوق جده]

مشمشانا انا احصاء عند استاذه دعا بوقري
وبعد اخت كوكو شانيل
لاتخافين انا بعد ماحضرت اليوم بس يقلون انو الكيمياء اخذت غياب
وبعدين انا نفسك بالاحصاء
يعني لاتشيلين هم الدراسه الفعليه يوم السبت
وهاليومين كلها مقدمات لاغير ونصيحه لاتشترون الكتب اللحين خلوها السبت لما تنزل كل الاصدارات >>>> لايكثر هرجك بس

يله تقبلوا مروري
شووووووووووووووق

[مشمشانا]

يب على حسب استاذة لكيميا تبعكم الدكتورة تبع الشعبة حقتي اخذت الحضور وخلتنا نسجل الايملات و الجوالات
بس استاذة الشعبة التانية راحتلها صحبتي قالت ما راح اديكم شي

[Ġlαмσяσυş]

وعليكم السلآم والرحمة


كوكو شآنيل .. أنا جدولي مثل جدولك بالضبط ..
مآ عدآ بالإنجليش آنتِ بكلآس 1314 .. وأنا 1315 ..
عالعموم الإنجليش مو مشكلة بكرة قالو لنا نروح مبنى 1 ..
ونسأل عن نتآئج الإختبار ونشوف الـLevel حقنا وهم يعطونا كلآسآتنا الجديدة ..

بالنسة للكتب مثل ما قالت الأخت rarba ..

بس نحنا أخذنا أحيآء .. ثآني يوم واليوم .. والدكتورة شرحهآ مآ عليه كلآم حلوو ..
والكتآب إللي طلبته منآ هو كتآب Biology 101 وعليه صورة بومة ..
تلآقيه بالمكتبآت إللي بالجآمعة ..

كمآن أخذنا أمس الإثنين محآضرة إحصآء .. الدكتورة مره رهيبه مآ شآء الله عليها وتفهم ..
الكيميآء أخذنآ محآضرة أمس .. الدكتورة مآشي حآلها ^^"

تقريباً هذي الأشيآء المهمة .. واليوم أخذت دكتورة الأحيآء الحضور ..
يعني يمكن بكرة بيحآسبون على الحضور في بآقي الموآد ..

[[اسيرة الصمت]]

وعليكم السلام ورحمة الله وبركاتهـ ..~


ياحلوات كوكو شانيل و Ġlαмσяσυş انتو معايا بمحاضره الاحصاء ..

كوكو شانيل ياقمر لا تقلقي ولا تشيلي هم لانه ما اخذنا غير المقدمهـ وان شاء الله نساعدك وما نقصر ..

وسلامتك يا عسل ماتشوفي شر ...