مهارات التعامل مع الاختبارات – قدرات وغيره

[واحد هادي]

السلام عليكم ورحمة الله وبركاته

أخواني وأخواتي الكرام كيف حالكم وايش اخباركم؟؟؟

في البداية أحب أقول اني ماعرفت وين أحط هذي المشاركة وخاصه انها ماتتعلق فقط بالماستر أو الدكتوراة بل بكل طلبة الجامعة... لقيت بعض الأقسام لكن ماقدر احط فيها مواضيع وعشان كذا حطيته هنا

في ناس قبل كذا طلبو مني أعطيهم مهارات أو التكتيك اللي أستخدمه في التعامل مع الاختبارات بصفة عامه وخاصة الاختبارات اللي تكون اختيارات مثل اختبار القدرات وستيبس تبع الإنجليزي

قبل لا أبدء اتكلم اسمحو لي اني اذكركم في بيتين للإمام الشافعي رحمه الله والتي يقول فيها

------------------------------------
شكوت إلي وكيع سوؤ حفظي * فأرشدني إلى ترك المعاصي
واخبرني بـأن العلـم نـور * ونور الله لا يهـدى لعاصـي
------------------------------------


الان مع أول وأهم خطوة أقوم بها قبل الاختبار بيوم وهي أنني أنام كويس جدا جدا وقبل الاختبار بساعة على الأقل اشيل من بالي كل شي يخص الاختبار واحاول اما اكون في حالة استرخاء تام أو مزح وضحك وفرفشه ولا كأنه في اختبار بعد ساعه عندي.

النوم بينشط خلايا المخ وبيخلي الشخص جاهز للضغط النفسي والعصبي اثناء الاختبار وبدل ما يكون ضغط متواصل لا يكون فقط ضغط الاختبار لانه مهما كان الشخص مستعد للاختبار اكيد راح يجيه ضغط وقت الاختبار من الجلسة الطويلة والتركيز والكراسي (المريحة جدا) والصالات والخ.

الشي الثاني نشيل من بالنا كل المشاكل أو الأمور الخارجية... سواء كانت مشاغل عائلية أو دراسية أو أي شي اخر... تركيزنا الاختبار وبس...

قبل دخول الاختبار مباشرة أو في صالة الاختبار أحاول أكرر الدعاء المذكور في الحديث التالي وأقسم بالله ان مفعوله سحر والله العظيم.

--------------------------------------

عَنْ عَبْدِ اللَّهِ بن مسعودٍ رَضِيَ الله عَنْهُ قَالَ: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ: "
مَا أَصَابَ أَحَدًا قَطُّ هَمٌّ وَلَا حَزَنٌ فَقَالَ اللَّهُمَّ إِنِّي عَبْدُكَ وَابْنُ عَبْدِكَ وَابْنُ أَمَتِكَ نَاصِيَتِي بِيَدِكَ مَاضٍ فِيَّ حُكْمُكَ عَدْلٌ فِيَّ قَضَاؤُكَ أَسْأَلُكَ بِكُلِّ اسْمٍ هُوَ لَكَ سَمَّيْتَ بِهِ نَفْسَكَ أَوْ عَلَّمْتَهُ أَحَدًا مِنْ خَلْقِكَ أَوْ أَنْزَلْتَهُ فِي كِتَابِكَ أَوْ اسْتَأْثَرْتَ بِهِ فِي عِلْمِ الْغَيْبِ عِنْدَكَ أَنْ تَجْعَلَ الْقُرْآنَ رَبِيعَ قَلْبِي وَنُورَ صَدْرِي وَجِلَاءَ حُزْنِي وَذَهَابَ هَمِّي إِلَّا أَذْهَبَ اللَّهُ هَمَّهُ وَحُزْنَهُ وَأَبْدَلَهُ مَكَانَهُ فَرَجًا

" قَالَ: فَقِيلَ يَا رَسُولَ اللَّهِ أَلَا نَتَعَلَّمُهَا؟ فَقَالَ: "

بَلَى يَنْبَغِي لِمَنْ سَمِعَهَا أَنْ يَتَعَلَّمَهَا".

أخرجه أحمد (1/452 ، رقم 4318) ، وابن أبى شيبة (6/40 ، رقم 29318) ، والطبراني (10/169 ، رقم 10352) ، والحاكم (1/690 ، رقم 1877) وقال: صحيح على شرط مسلم ، وصححه الألباني في "السلسلة الصحيحة" (1 / 337

[واحد هادي]

بعد كذا خطوات الاختبار....

1-في كثير اوقات نمر في اسئلة سهله مره واسئله صعبه.... حاولو تحطو في بالكم نوعين من الرموز بحيث نسوي التالي.... نقرأ السؤال بسرعه واذا كان بسيط وسهل نحله على طول... اذا كان السؤال مشكوك فيه ولا نص ونص نحط مثلا نجمه جنبه.... اذا كان سؤال مره صعب نحط اكس او اي اشارة.... بعد ما ننتهي تماما نرجع اول شي للأسئلة اللي نص ونص وبعد ما ننتهي منها تماما نرجع للصعبة.

2-في حالة عدم معرفة السؤال نهائيا نقرأ الاجابات ونركز فيها شوي... نحذف الاجابة المستبعدة ولا اللي باينه تماما انها خطأ... وبعد كذا اللي بعدها يصير عندنا اجابتين نختار منهم.... طبعا الشي المهم انه ندور على الخطأ ونلغيه مش الصح لانه اوقات يكون في اجابتين صح بس وحده صح اكثر من الثانية.

3-اذا قرب الوقت ينتهي ولا في الأسئلة اللي نهائيا مانعرف حل لها نخلي كل الاجابات موحده... يعني مثلا لو عندي 10 اسئلة لا قدر الله ماعرفت ولاشي فيها ولاني عارف اشيل خطأ ولا في وقت ولا أي شي.... نحط مثلا كل العشر أسئلة على الاختيار جيم... أنا أتفائل بالخيار جيم وفي ناس يقولو انه هذا الاختيار اكثر شي مستخدم في اغلب هذي الاختبارات.

4-في أشخاص ينتظر التعليمات وهذا شي جيد وغير جيد.... يعني مثلا لو قالنا لا تبدئو تحطو معلوماتكم الا لما نقول لكم اذا وقتها نبدء.... لكن للأسف البعض حتى بعد ما يبدئو ينتظرو التعليمات المفصلة والدقيقه وهذا راح يأخذ وقت طويل.... جميل اننا نتبع القوانين لكن المفروض نعرف متى وكيف.

5-لو مثلا كان في جوابين مو عارفين نختار بينهم.... نحط علامه صغير فقط على الحل حق الجوابين.... هذي فايدتها انه في الاخير لما نجي ننهي الاختبار ونشطب عليه وبدل مانجلس نمسح واحد من الحلول أو ندور اي حل هو الصح يصير خلاص... من العلمه الصغيره عرفنا الحلين المطلوبين ولما نأشر على الجواب المطلوب مايحتاج نمسح الجواب الاخر لانهم ماراح يتعاملو معاه الا لما يكون مؤشر تماما.

[واحد هادي]

أنواع الأسئلة.....

1-في أسئلة تجي مباشرة وسهل حلها وهذي انصح انه الواحد يقرأ الأربع اجابات قبل السؤال... عادة الواحد يقرأ السؤال وبعدين الاجابات وبعدين يرجع للسؤال وبعدين يرجع للاجابات.... اللي انا اسويه اني أقرأ بداية السؤال ولو شفت الفكرة بسيطة على طول على الاجابات اقراها كلها وبعدين اشوف السؤال كويس وعلى طول اختار الاجابة.

2-في أسئله الجواب تلاقيه في نفس السؤال.... وهذي يبغالها الواحد ينتبه... يعني مثلا يعطيك اربع خيارات وكل خيار فيه أكثر من معلومة... لو ركزت شوي تلاقي في أكثر من خيار فيه معلومات معينه تتكرر... ندور على المعلومات المكرره طبعا.

3-في أسئلة تكون غريبه مره أو فيها معلومات غريبه.... وقتها نحاول نربط بين السؤال والأجوبة.... يعني مثلا السؤال بيقول كذا والخيارات فيها كذا وكذا... الخيار الفلاني ممكن يكون فيه ارتباط مع السؤال لكن الخيارات الثانيه لا.

4-في اختبار القدرات مثلا في اختبارات الذكاء.... لازم نقسم الأشكال الموجودة حسب أجزائها ونقارن كل جزئين مع بعض.. كمان لازم نشوف تسلسل الأشكال وترتيبها.... مشكلة هذي الجزئية ان الواحد لازم يكون عنده خيال واسع ويقدر يتعامل بالمنطق لكن مع شوي تجارب راح نقدر نجيبها.

5-في اختبارات القدرات لما يجيب كلمات عربي... نحاول نرجعها لأصلها وكل كلمات اللغة العربية الأساس فيها 3 أحرف فقط.... على سبيل المثال لو أعطانا كلمة قربان واحنا مو عارفين ايش معناها نقوم نخمن أساسها وهي (ق ر ب) وهذا راح يبين لنا انه شي يخص التقرب أو الاقتراب من شي اخر ونقدر وقتها نخمن الكلمة الصحيحة من الخيارات.

6-في الختبار اللغة الانجليزية ممكن يعطينا كلمات ونفس الشي بس هنا نحاول نقسم الكلمة وخاصة لما نشيل الجزء الأخير منها.... بصراحه مو حاب أحط أمثله هنا لانه صعب الواحد يذكر نقطه وبعدين الباقيين يقيسو على هذا الاساس والانجليزي مو دائما نفس المقياس.

7-في اختبارات الحسابات او الرياضيات.... هنا تكمن المشكلة لانه الواحد لازم يكون سريع البديهه.... مو كل مره المسألة يبغالها حسابات واله... اوقات شوي نظر نقدر نحلها بس يكون شي غير مشابه.... اهم شي التبسيط في هذي المسائل.... نحاول نبسط الأرقام أو السؤال بأكبر قدر ممكن.

8-في أسئلة القواعد باللغة الانجليزية.... ممكن نحاول نأخذ الخيار الموجود ونحطه في الجملة ونقولها... في أشياء راح تكون غير منطقيه ولما نقولها نحس انها ماتنفع لكن بيكون في خيار منهم منطقي أكثر شي.... طبعا هذا ماينطبق على كل الحالات لكن على الأقل البعض منها راح يكون تمام.

[واحد هادي]

أعتقد كذا أنا غطيت كل شي ممكن تحتاجوه ولكن لأي توضيح أكثر أو أي إستفسار أنا حاضر وتحت أمركم لكن ماحبيت أطول الكلام وأكثره بدون فائدة

بالتوفيق

أبو الجود

[ǁ غــلأآإ ، رٍوٍحــي ǁ]

^^
مجهود رآآئع .. و من جد مهآره يجب إتقآنها ..
الله يعطيك العـآإفيه .. ~

[واحد هادي]

المشاركة الأصلية كتبت بواسطة ǁ غــلأآإ ، رٍوٍحــي ǁ ^^ مجهود رآآئع .. و من جد مهآره يجب إتقآنها .. الله يعطيك العـآإفيه .. ~

أهلا وسهلا فيك أختي

شرف لي تواجدك في موضوعي المتواضع وأتمنى إني أكون حطيت الموضوع في المكان المناسب ولو اني كنت أتمنى الاقي مكان بحيث ان كل الطلبة سواء انتظام او انتساب او دراسات عليا يقدرو يدخلو عليه لكن ان شاء الله يستفيد منه أكبر عدد ممكن من الطلبة

شكرا لتواجدك وبالتوفيق

أبو الجود

[First Officer]

تسلم على الموضووع الأكثر من راائع,,
وحقاً هذا التكتيك والأساليب جداً مفيدة لحل أسئلة الخيارات المتعددة,,
وقد اختصرتها جميعا,, بارك الله فيك,,

وشكرا مرة أخرى,,

تحيات أخوك
First Officer

[واحد هادي]

المشاركة الأصلية كتبت بواسطة first officer تسلم على الموضووع الأكثر من راائع,, وحقاً هذا التكتيك والأساليب جداً مفيدة لحل أسئلة الخيارات المتعددة,, وقد اختصرتها جميعا,, بارك الله فيك,, وشكرا مرة أخرى,, تحيات أخوك first officer

هلا والله بالكابتن

عقبال ما تصير كابتن حقيقي وتعلق النجوم يارب وعلى الوايد بودي كمان

الله يوفقك ويسهل امرك ويكتب لنا جميعا كل الخير

أبو الجود

[نور المحبه]

شكرا أخي علي هذا الموضوع الأكثر من رائع والله يجزاك الجنه

[واحد هادي]

لا شكر على واجب اختي الكريمة

ان شاء الله يستفيد منه الجميع