ماذا تعرف عن الهندسة الصناعية؟....موضوع جديد بأسلوب مختلف!

[Eng.khaled]

السلام عليكم يا شباب...بكرة خميس يلا ناكل تميس ههههه (بيض!)@19@......

طلبات و استفسارت كثيرة عن تخصص الهندسة الصناعية جتني....من أعضاء مخضرمين و من اوريات كمان!....و زي ما أنا ملاحظ إني- تقريبا- السينيور الوحيد من قسم هندسة النظم اللي فعال في المنتدى عشان كذا قررت اني أشيل مهمة تعريفكم بالتخصص @2@.....

هندسة النطم الصناعية ببساطة هي هى مجال من مجالات الهندسة ومن مميزاتها أنّها لها مجال في العديد من الشركات والمصانع المختلفة مثل الطيران و البنوك و المستشفيات و شركات البترول وغيرها فهو يعتبر مجال عام لتحقيق أهداف الإدارة من دقيقة دقيقة دقيقة........هذا الأسلوب هو من أفشل الأساليب في تعريف الناس بتخصص معين خصوصا اذا كان مو مفهوم زي تخصصنا...حأجيب لكم النوم.....عشان كذا قررت إني أعرفكم على التخصص.....إن ماي واي@34@.....

صديقنا العزيز "أبو عزيز" هو اللي طلب مني اني اكتب لكم موضوع زي كذا.....عشان كذا اسمح لي يبو عزيز راح تكون كبش الفداء اليوم!@4@

أبو عزيز عنده راس مال و قدره مليون ريال ناوي يستثمرهم في المواشي...بس محتار؟....يبغى يطلع أكبر ربح ممكن لكن مو عارف يشتري بكل المبلغ نوع معين من المواشي؟...و إذا قرر أي نوع حيشتري؟ أو إنه يشتري من كل نوع عدد معين؟...و ايش هي التركيبة اللي تخليه يحقق اقصى ربح؟@37@

أبو عزيز اتصل بالباشمهندس "وسوس" عشان يساعده في حل المشكلة العويصة هذي...الباشمهندز وسوس عمل احصائية في السوق مستخدم الأشياء اللي تعلمها في se 205و se 325 و طلع بكم معلومة منها: العرض و الطلب....أعلى سعر للنوع و أقل سعر للنوع و أكثر الأصناف مطلوبة إلخ إلخ....ثم رجع لأبو عزيز و طلب منه يحدد أهدافه: مثلا عدد الحاشي و السواكني مجتمعين ما يكونوا أكثر من النجدي و زي كذا....

بعد ما اتحددت الشروط مكتملة قدام المهندس وسوس....بقي عليه يحدد لأبو عزيز العدد اللي يشتريه من كل صنف...هنا حيطبق اللي اتعلمه في se 303 بالتحديد حيستخدم linear programming ....مع وجود الشروط السابفة الباشمهندس وسوس طلع بنتيجة و اعطاها لأبو عزيز و راح اشترى العدد المحدد و باعهم كلهم و طلع له اكبر ربح ممكن من هذي العملية@18@....

مرت الأيام...و تجارة ايو عزيز تكبر و تكبر و تكبر الين ما صار عنده شركة البان....ابو عزيز وجد انه الالبان اللي بيبعها متفاوتة الجودة بشكل كبير.....وجد ايضا انه بيصرف فلوس كثير على صيانة المعدات......حيتصل بمين؟ بالأسطى وسوس....وسوس قال له خلاص مو مشكلة انا حأطبق اللي تعلمته في 320 و حأعملك جداول تحكم بالجودة و برضه حأطبق اللي تعلمته في مادة ال maintenance و حأخليك تعرف بالضبط متى تعمل صيانة للأجهزة عشان تصرف أقل مبلغ ممكن.....

أبو عزيز سمع الكلام....لقى انه بيربح اكثر و تجارته ما شاء الله بتكبر.....جاب عمال زيادة لقاهم بيتلكعوا في الشغل....شغلات بسيطة ما تاخذ وقت بيعملوها في وقت طويل....ألو؟ الحقني يا باش مهندس. الباش مهندس جا و قال لأبو عزيز: شوف....أنا راح أدرس و احلل كل شغلة لحالها و حأحدد لها فترة زمنية معينة لإتمامها باستخدام الأشياء اللى تعلمتها في 323 بحيث ان العمال لو اشتغل في أكثر من المدة هذي راح يتعاقبوا.....

سمعة أبو عزيز تخطت الآفاق.......صارت تجيه طلبات من كل مكان في العالم يبغوا البانه بس هو متلخبط...كيف يقدر يوفى بطلبات العملاء في الفترة المحددة...و كيف يوصلها لهم بحيث يصرف اقل مبلغ ممكن في المواصلات... مرة ثانية اتصل بوسوس و وسوس عمل له خطة انتاج و مسار توزيع ما تخرش المية مستخدم الأساليب اللي تعلمها في 402....النتيجة...ابو عزيز كسب احترام زباينه و كل يوم بيزيدوا...

ابو عزيز ناوي يفتح مصنع جديد....ماشاء الله المصنع القديم ما عاد يغطي الطلب المتزايد...بس محتار...فين يبنيه؟ و كيف يخلي طريقة الأستلام و التوزيع للبضايع...و كيف يرتب المستودع بأقل تكلفة ممكنة؟...قبل لا يتصل ابو عزيز الا وسوس عنده موجود....باستخدام الطرق اللي تعلمها وسوس في 422 تمكن انه يحل كل المشاكل اللي فوق....

ابو عزيز ناوي يعمل خطة استراتيجية لخمسة سنين قدام...مين راح يعمل له هي؟ اكيد وسوس

ابو عزيز ناوي يحسن العلاقة بينه و بين الموزعين المعتمدين له بحيث انه يقنعهم يشتروا منه أكبر كمية ممكنة و كل الظرفين ما يخسروا.....المهندس وسوس زبط له الموضوع باستخدام supply chain management

باختصار...هذا هو تخصصي...التخصص اللي ياما تعبت و انا اشرحه للناس.....منصبي محجوز في الشركة عندك يبو عزيز@3@


رابط الموضوع http://www.skfupm.com/vb/showthread.php?t=16205