افيدوني .. محتاره في اختيار التخصص

[فاطمه احمد]

السلام عليكم ورحمته الله وبركاته

انا طالبة توي تخرجت من الثانوية
محتاره في اختيار تخصصي
فكرت كثير وسالت اقربائي .. المشكلة اغلب اهلي داخلين تدريس
وانا ما ارغب في التدريس , وحطيت ببالي تخصصات ( قانون - طب - وادارة اعمال )
لكن المشكلة ليس لدي رغبة واضحة في اي تخصص ..

واحيطكم علماً انقبلت بجامعه الملك عبدالعزيز الحمدلله ,

وايضا عندي سؤال : هل تحديد التخصص لازم يكون قبل السنة التحضيرية او بعدها ؟؟

حابه تنصحوني و اخذ ارائكم ايش الافضل وشكرا جزيلا .

[FOFO02]

وعليكم السلام والرحمة ..

مبروووك القبول ..

شوفي ياحياتي .. انتي ممكن تبدعي في اي مجال ..!!

حاولي تشوفي الشيء الي بتحبيه .. وتقدري تكملي فيه ..

الطب تخصص مرغوب اكيد .. لكن مااقدر اقول لك ادخليه او لا .. حسب رغبتك ..

وبالتوفيق يالغلا ..

[آمال وأحلام]

هلا
اهم شي تخلصي السنه التحضيريه بمعدل عالي وبعدين شوفي انت ترغبين اي تخصص

[فاطمه احمد]

يعطيكم الف عافيه
ريحتوني بكلامكم

انا ما عندي ولا رغبة وهذه هي المشكله , او اني لحد الحين مالقيت رغبتي الصح

طبعا لمن جلست مع اهلي .. اعطوني كذا تخصص ومن ضمنها الي ذكرتها
ف على اساس كذا انا احـترت بينهم ..

للعلم : انا ما اعرف شيء كثير عن هذه التخصصات ,


-------

ترددت في الطب , كثير خوفوني منه و يقولو صعب ويحتاج وقت طويل


-------

وكمان ادارة الاعمال
برضوا جات كذا من ضمن الاختيارت

ومازلت محتاره !!!

[ام روان1]

قانون بتطلعين مافيه فائدة لانهم مايوظفون البنات شهادتك بتصير على الفاضي للاسف


طب : تتحملين دم ومناظر ومشرحة واموات ؟ تتحملين ساعات عمل طويلة و احيانا يدقوا عليك الساعة 2 بالليل تعالي المستشفى بسرعة + طبعا الدراسة الطويلة والدكتور لازم دائم دائم يحدث معلوماته ويدرس و يحضر مؤتمرات ويسافر حتى لو صار له 5 سنوات وهو متوظف تتحملين ادخليه


إدارة أعمال : بنوك او مستشفيات او شركات ( مؤسسات حكومية اذا ربي وفقك ) , بس رواتب عادية وشغل روتيني يذبح ومكتب و كرسي


فالاخير استخيري وجيبي ورقه وقلم واكتبي الايجابيات والسلبيات لكل تخصص وبعدها قرري

[Abrar Ibrahim]

صعب نحدد تخصص لانو لكل شخص رغبتوا
فكري صح واستخيري واختيار التخصص يكون بعد السنه التحضريه
ولكن للعلم لكل تخصص معدل مطلوب يعني حاولي قد ما تقدري تجيبي معدل عالي
وبالتوووفيق