اتمنى المساعده من طالبات الطفوله بخصوص المواد

[noona]

السلام عليكم ورحمة الله


بنات الله يخليكم اللي عندها خلفيه او اللي تقدر تعطيني رايها
بالجدول بصراحه مره حايسه مدري ايش المواد اللي اقدر اخذهم مع بعض بترم واحد وانا ودي اخذ اكبر عدد من المواد لاني ابي اخلص واتخرج باسرع فرصه ممكنه وبنفس الوقت خايفه اجمع مواد صعبه بترم وينزل معدلي
عشان كذا ياااااريت تساعدوني وتعطوني رايكم

انا هذا اول ترم لي بتخصص طفوله

وحسب مارتبت حطيت هذي المواد بس عشوائي طبعا

صحة فرد
رياض اطفال
صحة الطفل وتغذيته
مراحل نمو الطفل
الثقافة الاسلامية (3)
برامج رياض الأطفال


برايكم ممكن دراسة هالمواد مع بعض
او تشوفونها كثيره وصعبه بترم


الله يخليكم ابغى الرد بسرعه
لاني فعلا محتااااااااااااااااااره

الله يعطيكم الف عافيه ..

[ساكنه في بيتنا]

و عليكم السلام و رحمه الله و بركاته



شكلك ناويه على نفسك انتي

شوفي يا قلبي اول نصيحه راح اقلك هيا لمن تحطي جدولك لا تختاري مواد المفروض تاخديها في السمسترات الجايه .. يعني اتاكدي انو كل المواد اللي اخترتيها في اول سمستر تخصص ..



تاني شي .. صحه الطفل و تغذيته ماده تعتبر تقريبا زي الاسعافات الاوليه ... ناخد فيها عن الامراض و وكيف تتعرفي انو الطفل دا عندو دا المرض و كيف تساعديه و ايش تعملي و الكلام دا كله .. يعني الماده كلامها كتتيييير و يبغالها مزاكره اول بأول و ترتيب أفكار .. في البدايه راح تحسي انها حوووسه و صعبه بس اذا رتبتي افكارك و زماراكمتيها تتتيسر ان شاء الله

برامج اطفال .. الماده دي في البدايه شفتها تقيله دممممم بس لمن دخلنا في الماده زي الناس و استوعبت الهرجه .. حبيت الماده كتيييييييييير .. فيها نتعلم كيف نعمل برامج للأطفال في اليوم المفتوح او في نادي صيفي او في حفله .. حاجات كدا .. الدكتوره اللي اعطتنا الماده سافرت نهاية الترم دا .. ما ادري مين راح يعطيها الترم الجاي .. الماده دي بالزات لو فاهمتها خلاص :) امورك تمام ان شاء الله

رياض أطفال اخدتها مع د. نهله .. الماده مرررررررررررررره حلو و الدكتوره كمان رووووعه ..

اذا الد.نهله منزله ماده خدي معاها على طووووووووول مررره يفوتك عمرك كله لو ما درستي معاها ..
الماده دي تعرفك بالروضه و ايش الاركان اللي فيها و كيف ترتيبها و تعرفك بالمساحات اللي المفروض تكون في الروضات و كدا ..

مراحل نمو .. كمان الد. اللي اخدت معاها الماده سافرت نهايه الترم اللي فات ..

الماده مرررره تستمتعي معاها لو كنت حاجبه الاطفال بجد .. تعملك مراحل النمو >> احلفي

يعني لو كان في السنه الفلانيه متى يمشي .. و لو كان عمره كزا كيف يشوف و ايش ممكن تعمليه اخلاق و تعرفيه اذا كان ممكن يفهم ولا لا وكيف المفروض تتتعاملي معاها .. الماده دي كما دسمه ..
الثقافه طبعا ما عليها كلام قبل الاختبار او يومتها في الصباح و بسسسسسسسسس

صحه فرد

دي يبغالها سمستر لوحددددددددها مع نداء جمبي

شوفي عشان لا اخوفك .. الد.كتوره تعاملها مره حلو شرحها مرررررررره تمام بس أسئلتها فظيييييييييييييعه وربي في الاختبار اسيب الحل و افكر هيا كيف تفكر في اسئله زي كدا .. بس ترا مافي غير نداء يعطي الماده
واجبات الماده تحسسك انو مافي ماده غيرها تندرس .. بس نصيحه كمان اي بونس تقول عليه الدكتوره اعمليه و كوني كمان قائده لمن تتقسم الشعبه لفرق عشان القائده لها بونس من غير نقاش ..
كوني متواصله مع الدكتوره نداء و خليها تحس انك بالفعل مهتمه بالماده و حابته وانتي تشوفي درجاتك ان شاء الله تمام ( لا تفهميني غلط انو لازم تتمصلحي معاها ,, لا والله بالعكس مررره هيا لو حست كدا راح تعطيكي على راسك )

بس اهتمي بالماده و اشتغلي فيها كووووويس ..


ملحوظه

المواد حقت الطفوله الحمدلله ما حسيت انها صعبه في الفهم و الاستيعاب لا صعبه من ناحيه اهميه الكلام اللي فيه .. يعني ممكن تلقي فصل في كتاب 10 صفحه و تقولي دا ماياخد وقت قليل بس تعالي زاكريه تطلع عيونك لانو اغلب الكلام مهم ..

في الاول و الاخير ارجع اقلك .. لا تاخدي مواد مهي مقرره عليكي في اول سمستر تخصص و راجعي جدولك مع المرشده حقتك عشان وقت التخرج لا تتلخبطي و تزيد عليكي مواد و تنقص مواد ..

لا تخافي وقت ما ربنا رايد انك تتخرجي راح تتسير امورك .. لا تستعجلي صدقيني ايام الجامعه حلوه خصوصا في الطفوله و راح تحسي بنفسك لمن تدخلي في التخصص اكتر و تعملو معارض و حفلات و مسابقات بأعمالكم وتكاليفكم ..
آآآآه يا بنتي قلبتي عليا المواجع ..

اي سؤال تاني نحن حاضرين .

آسفين على الكلام الكتير .. .

[cinnabon]

المشاركة الأصلية كتبت بواسطة ساكنه في بيتنا شوفي يا قلبي اول نصيحه راح اقلك هيا لمن تحطي جدولك لا تختاري مواد المفروض تاخديها في السمسترات الجايه .. يعني اتاكدي انو كل المواد اللي اخترتيها في اول سمستر تخصص لا تاخدي مواد مهي مقرره عليكي في اول سمستر تخصص و راجعي جدولك مع المرشده حقتك عشان وقت التخرج لا تتلخبطي و تزيد عليكي مواد و تنقص مواد .

انا رايي برضو زي ساااكنة مو شرط في قسم الطفولة في اي قسم من قسم الاقتصاد المنزلي

لانو لو لخبطتي شعبان ع رمضاان ولا تبي تعمليلك يوم اوف وتكنسليلك مادة انسي نفسك تتخرجي

لانو موادنا اغلبها معامل ويادووبك الموااد تبع كل سمستر اوقاتها تمشي مع بعض

وكمان في بعض المواد تتطلب انك تكوني اخده مادة قبلها


ولا تخاااافي مدام الواحد الي يكون مثاابر ومجتهد كل امووروو حتمشي معا باذن الله

[noona]

مشكوره ساكنه والله ماقصرتي كفيتي ووفيتي الله يوفقك يارب

وcinnabon كمان مشكوره الف شكر على الرد ويعطيكي العافيه

بصراحه معاكم حق في حكاية المواد اللي من السمسترات الجايه
بس المشكله انه المواد اللي حاطينها في السمستر الاول تتعارض اوقاتها ولافي شعب كثيره

انا لما شفت المواد في السمستر الاول وشفت الشعب مره ملخبطه ومتعارضه

السمستر الاول حاطين فيه

انترنت وبحث علمي
رعاية ذوي الاحتياجات الخاصه
صحة الفرد
مراحل نمو الطفل
صحة الطفل وتغذيته
رياض الأطفال

...

انترنت خلاص اخذتو عشان كذا حطيت مكانه ثقافه
ورعايه وقتها نفس وقت مراحل النمو عشان كذا حذفته وحطيت مكانه البرامج


بس ايش رايكم مو كثيره كذا اخليها 5 مواد بس
ولا احذف ماده واحط غيرها
ولا ممكن تندرس كذا مافيها صعوبه

ومشكورين حبايب قلبي .. استنى ردودكم

[ساكنه في بيتنا]

لا ما عليكي انا اعتبرها 4 مواد مو 5 .. لانو الثقافه ما ينخاف منها ان شاء الله

اعتقد الجدول دا كدا تمام

ثقافه3
رعاية ذوي الاحتياجات الخاصه
مراحل نمو الطفل
صحة الطفل وتغذيته
رياض الأطفال

صحه فرد لا تاخديه في اول سمستر عشان لا تجيكي صدمه عاطفيه من الطفوله ... >> زي ما قلتلك شغلها كتير و د. نداء تبغا شغل على اصوله :)

و على فكره رعايه فيه له جزء عملي .. كل اسبوع ننزل مركز من مراكز الاحتياجات الخاصه .. استمتعوا

بالتوفيق ياااارب ..

ادعولي اتخرج ممتاز و معدل عالي ياااارب

[ام-حمودي]

ساكنه ببيتنا ترى مو بس نداء تعطي صحه فرد

هدى جلال تعطيها




موفقه يارب

[ساكنه في بيتنا]

اول مره اعرف ..

اللي اعرفه د. هدى تعطي صحه الطفل و تغذيته .. ولا مو ؟؟

[ام-حمودي]

موو انا اخذت صحه فرد مع هدى جلال قريب يعني اقل من سنتين

والله دكتوره نداء وهدى جلال زي بعض بالاسئله

بس دكتورة نداء تعاملها راقي وانساني ومحترمه

واذا تحب البنت تعطيها ممتاز

[ساكنه في بيتنا]

و الله يا بنتي ما عندي علم .. السنه اللي فاتت كلها اعطتها نداء لوحدها ..

المهم على قولتك من جد اسئلتهم ما تختلف عن بعض ..

ربي يوفق الجميع يارب ..

يسلمو ام حمودي :) ..

[noona]

مشكورين بناااات ع ردودكم والله يوفقكم وتجيبوا اعلى الدرجات والمعدلات

وبالنسبه لصحة فرد فعلا هدى تدرسها انا درستها معها الترم اللي راح بس ماكملت الترم وقدمت اعتذار .. بصراحه حلو شرحها لكن الاختبار مدري عنه مااختبرت معاها ..