مدونة nova09

[nova09]

بسم الله الرحمن الرحيم

أنا هادا الترم حيكون الترم التاني لي في القانون
عشان السنة اللي فاتت ما قبلوني << اخص عليهم.. وحطوني ادارة أعمال.. بس الحمدالله حولني قانون الترم التاني.

طبعا لمن خلصت السنة التحضيرية ماكنت عارفة إيش أبغى قامت ماماتي الله يسعدها قالت خشي قانون ومن ديك اللحظة
علق في بالي القسم وما سرت أبغى غيروا .

القانون قسم ممتع، كل اللي تاخدوا يطبق في الحياة الواقعية، مو بس احفظ واختبر وخلاص.. لابالعكس.
وبالنسبة للسهولة والصعوبة مافي شي مرررة سهل ومررة صعب لازم يكون خليط و صراحة كلو يعتمد على جهد الطالب.

الفرص الوظيفية عن نفسي مهي من أولوياتي اللي خلتني أقرر أدخل قانون كنت أدور على شي أستفيد منو في حياتي وأقدر أفيد
أولادي في المستقبل بمعرفة ايش حقوقي وحقوقهم... الفرص الوظيفية للقانون في تطور لأنه قسم لسى جديد بس اللي أعرفو
مو كتير زي: مستشار قانوني- محاماة .

وبس صراحة الحمدلله إني خشيت القسم دا وأحس أستفدت وإن شاء الله راح أستفيد زيادة أكتر من كل السنين اللي درستها في المراحل الدراسية.

أترككم مع آرائي عن المواد:

1- اسم المادة : قانون تجاري

2- اسم الأستاذ: عبدالهادي الغامدي

3- الأسلوب في الشرح: شرحه مفهوم تحس انو فاهم المادة لكن يتكلم بسرعة.

4- طريقة المعاملة: لا بأس بها، لكن تلزم حدودك وتحاولي ما تنسي الكتاب وما تتكلمي لانو يعصب .
5- توزيع الدرجات: 50 نصفي 50 نهائي

6- الاختبارات: اختيارات فقط وفي النهائي أضاف توصيل .. أسئلتو معقدة وكثيييرة تكون فاهم المادة، لكن تجي في الاختبار تنصدم من الأسئلة.

1- اسم المادة : مبادئ قانون

2- اسم الأستاذة: ماجدة مصطفى

3- الأسلوب في الشرح: تقعد على الكرسي وتقرأ الكتاب بس صراحة أنا أفهم منها، لأنو اذا ما فهمت أسأل وكمان لازم تراجع كل درس في المحاضرة اللي بعدها وتوقف تسأل البنات .. أنا فادني لأنو في الاختبار اذا نسيت شي أفتكر من المحاضرة.

4- طريقة المعاملة: طيبة ازا ما اتعدي حدودك وازا كنتي متفاعلة ومشاركة .

5- توزيع الدرجات: 25 دوري - 25نصفي 50نهائي 10 نشاط

6- الاختبارات: متنوعة من مقالي واختياري وصح وخطأ

1- اسم المادة: قانون دستوري

2- اسم الأستاذة: صباح المصري

3- الأسلوب في الشرح: ما تعتمد كثير على الكتاب تحب- المواضيع الخارجية - لازم تكتبي معاها- تحب تعطي أسئلة تحليها ومواضيع تقرأيها- عندها البحث شي مهم ( مع انو ازا أخدتي معاها حتتعبي شوية لكن ما عمرو مرت عليا أستاذة زيها مثقفة ومن جد فاهمة المادة عندها خبرة وتحب تفيد طالبتها وشرحها عال العال)

4- طريقة المعاملة: لا تتأخري ولا تغيبي كتير .. وتحب تناقشيها .. أبدا لاتتعدي حدودك معاها وحتكون زي السمنة على العسل.

5- توزيع الدرجات: 5] 25 دوري أول-25 دوري ثاني - 40نهائي - الانضباط والنشاط 10

6- الاختبارات: مقاليييييييييي وصح وخطأ .. مرررة كوني مذاكرة مزبوط وأعملي اللي عليكي حتكون درجتك حلوة.

1- اسم المادة : أحوال شخصية (1)

2- اسم الأستاذة: سوسن المعلمي

3- الأسلوب في الشرح: لأن المادة ألفاظها معقدة فتقعد طبعا تشرح كل كلمة وهادا شي لازم لتفهمي المادة

4- طريقة المعاملة: طيوبة ما بها شي .. بس ازا كنتي مجتهدة وتروحي تسأليها في مكتبها عن أتفه الاشياء تحطك في بالها وتحاول تساعدك ازا نقصتي في الاختبار

5- توزيع الدرجات: 5] مني فاكرة على ما أعتقد 25 دوري 25 نصفي 50 نهائي

6- الاختبارات:صح وخطأ -اختياري- تعاليل- أدلة

1- اسم المادة : أصول فقه (1)

2- اسم الأستاذ: مازن بخاري

3- الأسلوب في الشرح: شرحه ممتاز يحب الأمثلة، يخطط

4- طريقة المعاملة: راقي وممتااااااااااز - لاتتأخري ولاتنسي الكتاب

5- توزيع الدرجات: 10 حضور وغياب، 10 على الواجب، 20 على الدوري الأول، 20 على الدوري الثاني، 40 على النهائي، ويساوي بين أعلى درجتين إما الدوري الأول أو الثاني للطالبة اللي ما تغيب ولا محاضرة حتى لو بعذر.

6- الاختبارات: اختيارية سهلللللة.. ركزي على الأمثلة