العياده النفسية لضحايا السنه التحضيرية (( خطة أ و ب ))

[سحر البيان]

المشاركة الأصلية كتبت بواسطة صياد النسور +++++++++++++++1 معاك حبيبي روح والقلب داعيلك

هههههههههه

عجبني توقيعك ....

ماشاء الله تبارك الله و الله يزيدك من نعيمه و يوفقك و يديم عليك نعمة الرضا

[nadooodi]

يعطيكي ألف عافية جد غريبة انو يكون في ددكتورة زيك الله يحفضك ويحميكي يااااااااااااارب ^_^

[سحر البيان]

من يوم ما فتح الاوديس ...

و أنا جوالي و الرسائل الخاصه و ايميلي ما هدأ ....

منهم مجموعة درجاتهم حلوه ( 98 و 93 ) مو عاجبتهم

ما أبغى ردود فيها تجريح أو أستهزأ أتقبل الردود الايجابية (( قصدي على هذه الحاله ))

و بعضهم درجاتهم مو طيبه أو راسبين و يبغوا يطلبوا المشوره

و لاني أحب الفائده تعم على الجميع فقلت أكتب رد شامل هنا



طبعا أنا أقبل ما أكون أستاذتكم أنا أم و أخت

للاسف ... احنا ضحايا تعليم معقد ... بس لما شفتكم .... حبيت هذا التعليم

بالرغم أن تعليمنا كان معقد و صعب ... بس ميزته أنه كل واحد كان ما أخذ حقه و كل واحد كان عارف مستواه

مو اي أحد يجيب الفل مارك في كل المواد كان في فوارق فرديه و ما كان في أحد يجيب معدل 100% أو 5

أصلا لو كان في هذه النماذج ... كان حطوهم في متحف و قالوا لنا روحوا شوفوهم كائنات أنقرضت و بدأت في الظهور

و عشان تجيب فوق 90 لازم تكون بذلت الغالي و النفيس (( ذاكرت لين ما طلعت عينك ))

لدرجة أن زميلاتي اللي كانوا ذاك الوقت جابين 80 و الله أحسن من ناس يجيبوا امتياز هذه الايام

أنتوا للاسف ضحايا تعليم أخر .... تقيم الكل واحد .... الكل ممتاز .... الكل 96 ... ماشاء الله

لما أجلس من العائلة (( للمعلومية أنا أنتمى لعائلة تنقسم الى قسمين واحد في الشرق و الثاني في الغرب ... بمعنى فرع فقير لدرجة العدم ( التعليم أخر همه أهم شيء عنده يعيش لحد الكفاف فئة أقل ما يقال عنها تستحق التبرع لها )) و الفرع الثاني غني جدا جدا جدا ... الحياه كلها عندها رفاهية ( المضحك و المبكي هذا الفرع اكثر فرع يعرف يخلي الناس تتبرع له ) راح أتكلم عن هذا الفرع لما أجلس معاهم ... كلهم أولادهم ممتازيين اولادهم 96 و فوق

تعالوا نشوفهم هم و أولادهم .... طول النهار أولادهم في المطاعم و الكوفي شوبات و بناتهم في الشوبنغ ... سهر لاخر الليل ...

و اذا ماقالوا اجازة ... تلاقهيم أول المسافرين و أخر الراجعين

أتذكر واحد من العائلات بعد ما أتخرج أولادهم من الثانوي ... ما أنتظروا حتى يعرفوا النتيجه ... سافروا على أول طياره

و الله و أنا أشوف حالهم جاتني عقده نفسية ... هذولا معدلاتهم فوق 96 ....

و أنا لما كنت في عمرهم حابسه نفسي في البيت حتى أتذكر وقتها وقفت سماع أغاني ( بالنسبة لي الاغاني عطله عن الدراسه هههه) ((بعدها صرت ما أحبها أو أتعودت ما أسمعها )) ...

لدرجة خلاص أقتنعت أنه أنا اللي كنت غبية عشان كذا أخذت هذا الوقت في المذاكره في الوقت اللي ذولا بيذاكروا في وقت أقصر و الدرجات زي و أحسن .....

المهم لما جا المحك .... اختبار قدرات ...... الخ ..... طلع مستواهم 86 و أقل ...

( عارفه راح يجي بعضكم و يقول انتي ما جربتي اختبار القدرات .... راح أقول لكم .... احنا عندنا كان شيئ اسمه اختبار من الرئاسة (( الحمدلله ما تصدقوا أنه جبت في درجات أعلى )).....


المهم الكلام الطويل و العريض اللي كتبته فوق .... كله عشان أقول لكم أنه أنتوا عشتوا على مدار 12 سنه مو عارفين مستواكم الحقيقي ... و منها نرجع لاول مثال قلت لكم عليه ... أنه لو الواحد لو ما عرف مرضه .... ما راح يتعالج أو يتعافى

و لما جيتوا على المحك الحقيقي ..... الجامعه و ظهر فيها مستواكم الحقيقي مو قادرين تصدقوا و بتحاولوا بكل الطرق تثبتوا أنه الجامعه غلطانه مو أنتوا ....

أتذكر زميلتي حطت سؤال ... كم عدد الروابط التي يكونها الكربون في المركبات العضوية (( قلت في قلبي سؤال ما في أسهل منه ليه تحط سؤال مثل ذا )) ,,,,, في نظرها هذا السؤال بونص .... أنا اللي كنت موجوده مع طالباتها في الاختبار.... تصدقوا كلهم يسألوني عن هذا السؤال محيريهم ...

رجعت البيت سألت أختي (( خريجة رياضيات ربة بيت أصغر مني بسنتين يعني من زمان متخرجه )) قالت لي 4 (( متخيلين))

و أول ما بدأت التدريس كنت أدرس المعمل .... كنت قبل المعمل أروح و أعمل التجارب بنفسي ... و تطلع النتائج بالضبظ زي ماهو مكتوب .....

و جيئت المعمل كلي تفاؤل ... فجأة و أشوف أشياء ما تخطر على البال .... يعني المفروض راسب أبيض يطلع أحمر

و كنت أجلس مع كل طالبه أسألها و أستفسر منها حتى أوصل للخطأ اللي عملته (( أسئلتي و جلوسي معهم أكيد أداني تصور كبير لطريقة تفكيرهم و المهارات اللي تنقصهم ))

و فضلت على هذا الحال ( لمده خمس معامل في الاسبوع لمدة فصلين دراسين ) بعدها وصلت لمرحلة بمجرد النظر أعرف الخطأ و بعدها أعتقدت أنه خلاص ما راح أشوف أخطأ ... دائما كانت في أخطأ جديده

المهم كان عندي طالبه مقبوله في كلية الطب معدلها 97% و الله ما أبغى أستخدم لفظ معين .....

بنت تفتقد لأبسط مقومات التعليم و الله كنت أخصص وقت لها عشان أشرح لها..

لكن كانت كل مره تعمل غلظ طوال فترة تدرسي الخمس سنين ما مر علي

أخطرها لما أضافت حمض مركز على ماده شافتها على البنش دون ما تقرأ وش مكتوب فيها و سخنتها في وجود ماده حافزه و طار شيء في عينها ( ما كانت أول غلطه ) ... رعبتنا في المعمل بس ما أظن أني شفتها بعدها

الخلاصه الاخيره ((للمجموعة درجاتهم حلوه ( 98 و 93 ) مو عاجبتهم)) .... هذا مستواكم و تذكروا الماده فيها اختبارين فقط و نهائي .... و أغلب أسئلتها اختياري بدرجه .... بمعنى نقصان درجه أو أكثر وراد بسهولة .... و أذكركم بقوله تعالى (( لئن شكرتم لازيدنكم )) .... و اذا لكم حق أنا معاكم ...

عندي طالبه ما عجبها أنها أخذت 22 في الدوري الأول و ما فكرت تراجع ورقتها و ما شافت درجة الدوري الثاني جابت 66

و عندي كم طالبه جابوا 22 في الدوري الاول و 18 في النهائي .... بس شفتوا هذه 22 اللي ما عجبت زميلتكم كانت كافيه لنجاح هذولا البنات ..


بالنسبة للفئة الثانيه ينتظروني أن شاء الله أرد عليهم قريبا

تقدروا تردوا بس من غير ما تجرحوا و تحسدوا صحبات .... ردود أحمدوا ربكم ..... الخ مرفوضة

[HaMo0ody]

باك بعد طووول غياب بسبب إنقطاع النت بسبب عطل في الشبكات ,.,.كالعادة يعني,.,.

أول شئ الحمدلله على سلامتك يادكتورة ليلى وإن شاء الله تكوني دايما بصحه وعافيه,.,.والحمد لله أنكتبلك عمر جديد وأنا حاس إنك في يوم من الأيام راح توصلي بس لمن توصلي لا تسحبي علينا أذكرينا لو ساعه في الأسبوع خخخخخخخخخخخخخخ,.,.وتأكدي إن أكثر المتواجدين هنا يدعولك بكل خير فالله يفرحك بعيالك وتعيشي سعيده ومبسوطه,.,.

قريت كل شئ صار من يوم ما كتبت آخر رد لي من جد أشياء لو الواحد يقف عندها راح يجلس طووول عمره واقف,.,.بس وش نسوي مالنا غير الدعاء لإخوااننا المتضررين وإلي راحوا نسأل الله أن يتقبلهم من الشهداء,.,.

بس عندي ملاحظه أرجو إنها ما تنأخذ بمحمل شخصي أو غيره لآني أبي الفائده تعم ووالله ثم والله إني ماني قاصد فيها أحد بعينه بس جات في بالي وبكتبها لآني دايما إلي يجي في بالي أكتبه ماأخليه عشان ما أجلس أفكر فيه,.,.

سؤال هل كل شخص منا يحتاج لموقف أو حادثه معينه تنبه إنه على خطأ أو تصحيه من نومه,.؟,.؟ إفرضوا إن الفاجعه أو الموقف ما صحاه من سباته لين متى راح يكون ناااايم,.؟,.؟ ليش حنا ما نعتبر بغيرنا يعني لازم نكون عبره ولا ما نتحرك.,.’,.!!!! كل بعد ترم بالنسبه لنا حنا يالطلاب يقف أكثرنا موقف صارم من نفسه ويبداء يحط الخطط والجداول وتكون مرتبه ومقننه ومدروسه وكل شئ ولكن للأسف ما نبداء بها من حيث أنتهينا لا نبداء نلصقها ببدايه الترم الجديد يعني تغيرنا لازم يكون له وقت أو شئ جديد (البعض يضعه بعد الإجازه والأخر السنه الجايه والبعض لم يدرس الموضوع بعد,.,.)أسموحولي أقول لكل من سوى هذ1 الشئ إنه ماراح يتغير لو إش ما صار تدرون ليش لآنه راح يبداء بدايه قويه ويتهي نهايه ضعيفه حده الشهر الأول وبعدين راح ترجع حليمه لعادتها القديمه يعني راح يبداء ويرجع لنفس النقطه ويحط مخطط جديد يعني يرجع لنفس الفلم ويظل يراوح ماكنه,.,.

الشخص إلي من جد يبي يتغير ما يستنى مناسبه من متى التغير كان له مناسبه مثل سنه جديده, عيد, حجه ,عمره, رمضان,موقف معين وغيرها لا التغير يكون في أي وقت ومكان وإلي يبي يتغير يبداء من اليوم يبداء يغير بنفسه يشتغل عليها يشوف سسلبياته وإيجابياته السلبيات يحاول يعدلها والإيجابيات يحاول ينميها وصدقوني راح تحسوا بالتغيير إبداؤ من الآن لحد يقول بكره وغيره ويعيش نفسه في وهم البكره,.,.

هذ1 أول شئ حبيت أقوله بس لي وثاني شئ بقوله شئ تعلمته من شيخ فاضل جلسنا في مجلس وكان هذ1 الشيخ سبحان الله يحرجك بتصرفاته ويخليك لا إراديا تسوي شئ إنت ما كنت ناوي تسويه والسبب هو أخلاقه وتعامله وسلوكه,.,.طبعا هذ1 الدرس تعلمته منه وإلا اليوم ادعي له بالخير الله يوفقه إن شاء الله,.,.يقول إلي يبي يغير غيره أول شئ يغير نفسه وبعد ما ينتهي من نفسه ما يغير غيره بنصايحه وكلامه لا يخلي أفعاله هي من تغير غيره يعني الشئ إلي تبي غيرك يسويه إنت سويه وداوم عليه وصدقني تحصل الشخص إلي تبيه يسويه صار يسويه,.,.إلي أبي أوصله هو خلوا أفعالكم هي إلي تدلل عليكم مو أقوالكم لآن القول تذهب ولكن الأفعال يبقى تأثيرها ما حيينا,.,.آسف على الشطحه نرجع لموضوعنا الأصلي إلي هو حديث اليوم والشارع والجرايد والناس ,.,.

وقفه مع سيول جدة والأضرار إلي صارت فيها,.,.

كثير منا بداء ينظر ليوم الأربعاء أنه يوم أسود ومشؤؤم وغيرها من نظرات سلبيه مع إني ومع كل إلي حصل أقول إلي صار خير والله خير صدقوني خير تبوا تعرفوا ليه أنا أقلكم,.,.

الحمد لله مافي شخص معلم طالب (جامعي أوثانوي أو غيره)شاف الحدث وما آلمه قلبه وأكيد كل واحد جلس يلوم الحكومه والمهندسين والإداريين والمعماريين وغيرهم على الشئ إلي صار إلي جالسين يلوم اليوم بكره راح تكونوا مكانهم سواءً إنت يالمهندس او الإداري أو المعماري ودام إنه قلبك آلمك من إلي شفته أنا متأكد إنك ما راح تكرر إلي صار وما راح ترضى يصير نفس إلي صار وما راح ترضى بالتجاوزات ولا التعديات تدري ليش لآنك عيشت الحدث وكنت معه من لحظة وقوعه لإنتهاؤه من أول قطرة مطره لين أخر قطرة صدقوني إن شاء الله الجيل إلي عايش هذه الأحداث ما راح يرضى إنها تصير للجيل إلي بعده لأنه عارف معاناتها وقسوتها وأنا أقول سبحان الله الله أراد تكون المطرة بهذه الكميه عشان إلي بيتخرجوا ولي يدرسوا وإلي يدرسوا يشوفوا إش كانت نتيجة التسيب والإهمال وهم نفسهم عاشوها عشان بكره لمن يصيروا ويوصلوا يتقوى الله في الشئ إلي راح يكون تحت يدهم ويعرفوا إش هي مردوداتها وأنا متفائل خير في الأمة دام فيها ناس ما ترضى بالخطأ الحمد لله أجل لسع في ضمير وفي شئ إن شاء الله بيصير أحسن وأحسن من تطور وغيره فخلونا نبداء بنفسنا ونغيرها ونحاول نغير من إلي صار ونخليه نقطة تحول لكل من تعايش مع هذه الأزمه,.,.

آآسف على الإطاله والقرقرة الكثيرة بس إن شاء الله إلي كنت أبيه يوصل يكون وصل للجميع,.,.
وفي الختام ما أقول إلا الله يعوضنا خير مما نظن,.,.
موفقين,.,يارب,.,

[سحر البيان]

المشاركة الأصلية كتبت بواسطة hamo0ody باك بعد طووول غياب بسبب إنقطاع النت بسبب عطل في الشبكات ,.,.كالعادة يعني,.,.

ماشاء الله عمرك طويل اليوم افتقدتك و قلت في قلبي فين الولد اللي يكتب باللون البني ( ناسية النك نيم)) ...

سؤال هل كل شخص منا يحتاج لموقف أو حادثه معينه تنبه إنه على خطأ أو تصحيه من نومه,.؟,.

لا أبدا ما خذها بشكل شخصي ... المفروض دايم الانسان يراقب نفسه ....

لكن بعض القرارات تتأخر في أخذها .... أو بمعنى أخر تكون متردد فيها ...

لكن يجيك موقف مثل ذا يحمسك أو يدلك على الطريق الصحيح ...

كل بعد ترم بالنسبه لنا حنا يالطلاب يقف أكثرنا موقف صارم من نفسه ويبداء يحط الخطط والجداول وتكون مرتبه ومقننه ومدروسه وكل شئ ولكن للأسف ما نبداء بها من حيث أنتهينا لا نبداء نلصقها ببدايه الترم الجديد يعني تغيرنا لازم يكون له وقت أو شئ جديد

و هذا معاك حق فيه ....

لكن أنا بما أني للامور بناحية ايجابية في نظري طالما الانسان بدأ في التغير هذا ممتاز ...

المفروض أنه لو مشيت على جدول معين و حصل ظرف ما و خلاك تتأخر .... عادي أرجع و صصح وضعك

ممكن أعطيكم مثال على هذا الموضوع ... بالنسبه لي هذا كان وضعي لما كنت في عمركم و أمشي بنظام حسب الجدول ...

و أول ما يبدأ الدوري الاول ...يتلخبط الجدول ... و تتراكم الدروس ... بعد ما أخلص الاختبارات أبدأ مراجعة الدروس اللي فاتتني و أضغظ على نفسي شوية .... بعض الاحيان الاجازات مثل اجازة الحج تساعد كثير ...

و ينتظم الجدول مرة أخرى الاهم الواحد ما يستسلم و يهمل ...

بس عارف المشكله فين ياحمودي ...

لما يكون عندك انسان عنده رضا كامل عن نفسي و ما عنده أي رغبة في التطور أو التغير ....

حتى اذا مر عليه حادث مثل ذا ممكن يجلس يبكى و يسب الكل بس ما يفكر لحظة يحاسب نفسه ....

يعني الشئ إلي تبي غيرك يسويه إنت سويه وداوم عليه وصدقني تحصل الشخص إلي تبيه يسويه صار يسويه,.,.إلي أبي أوصله هو خلوا أفعالكم هي إلي تدلل عليكم مو أقوالكم لآن القول تذهب ولكن الأفعال يبقى تأثيرها ما حيينا,.,.

و في هذه معاك حق 100%

[quote]

وهم نفسهم عاشوها عشان بكره لمن يصيروا ويوصلوا يتقوى الله في الشئ إلي راح يكون تحت يدهم ويعرفوا إش هي مردوداتها وأنا متفائل خير في الأمة دام فيها ناس ما ترضى بالخطأ الحمد لله أجل لسع في ضمير وفي شئ إن شاء الله بيصير أحسن وأحسن من تطور وغيره فخلونا نبداء بنفسنا ونغيرها ونحاول نغير من إلي صار ونخليه نقطة تحول لكل من تعايش مع هذه الأزمه,.,.[/quote]

برافوا عليك و هذا اللي نتمناه ....

الحمد لله أنكم بداتوا تفكروا بمنطقية و ايجابية ...

الحمدلله شبابنا فيهم الخير و البركه ....

و اكبر دليل وقفتهم الشجاعه في سيول جده .. وهذا شفته بعينى و بشهادة الكل

وأنا حاس إنك في يوم من الأيام راح توصلي بس لمن توصلي لا تسحبي علينا أذكرينا لو ساعه في الأسبوع

ههههههههههههههه .... ان شاء الله لا ...


فعلا الترم الجاي ما راح أعطي للتحضيري .... لكن أكيد راح أجي هنا أطمن عليكم

و اذا تخصصتوا كيمياء راح تلاقوني في منتدى كلية العلوم .... و حتى راح تلاقوني أرد على رسائلكم الخاصه باي وقت

[rano00nah]

المشاركة الأصلية كتبت بواسطة سحر البيان فعلا الترم الجاي ما راح أعطي للتحضيري .... لكن أكيد راح أجي هنا أطمن عليكم و اذا تخصصتوا كيمياء راح تلاقوني في منتدى كلية العلوم .... و حتى راح تلاقوني أرد على رسائلكم الخاصه باي وقت

دكتورهـ ,,
مآ حتعطي الترم الجاي :| وآي =( ,,
ع حظي يعني ؟ :( ,,

كنت أبغى أجي محاضرآتكـ ,,

::

الله يوفقكـ وين مآ تروحي دكتورهـ :) ,,

[سحر البيان]

المشاركة الأصلية كتبت بواسطة rano00nah دكتورهـ ,, مآ حتعطي الترم الجاي :| وآي =( ,, ع حظي يعني ؟ :( ,, كنت أبغى أجي محاضرآتكـ ,, :: الله يوفقكـ وين مآ تروحي دكتورهـ :) ,,

من الطريف السبب اللي خلاني أعطي التحضيري هذا الترم

هو نفسه اللي راح يخليني ما أعطيكم الترم الجاي ,,,

بس ان شاء الله راح أكون معاكم هنا ...

و شكرا على الدعوه الحلوه

[miss you]

حمد لله شفيت من المرض النفسي لاني نجحت

[سحر البيان]

المشاركة الأصلية كتبت بواسطة miss you حمد لله شفيت من المرض النفسي لاني نجحت

هههههههههههه

أنا ما ألومكم لان أنتوا اليوم في مرحله مصيريه من حياتكم ...

و أكيد حالتكم النفسية تعبانه .... الحمد لله أنك أنت و زملائك نجحوا

الله يوفقكم

[سحر البيان]

استكمالا لهذا الرد

من يوم ما فتح الاوديس ... و أنا جوالي و الرسائل الخاصه و ايميلي ما هدأ .... منهم مجموعة درجاتهم حلوه ( 98 و 93 ) مو عاجبتهم و بعضهم درجاتهم مو طيبه أو راسبين و يبغوا يطلبوا المشوره و لاني أحب الفائده تعم على الجميع فقلت أكتب رد شامل هنا

طبعا رديت على الفئة الاولى .... اليوم راح أرد على الفئة الثانية

درجاتهم مو طيبه أو راسبين و يبغوا يطلبوا المشوره

أولا أقول لهم (( قدر الله و ماشاء فعل )) و (( اللهم أجرني في مصيبتي ، واخلف لي خيرا منها))

عن أبي هريرة رضي الله عنه أن رسول الله صلى الله عليه وسلم قال : « يقول الله تعالى: ما لعبدي المؤمن عندي جزاء إذا قبضت صفيه من أهل الدنيا ثم احتسبه إلا الجنة » رواه البخاري .

عن ام سلمه رضي الله عنها قالت : سمعت رسول الله صلى الله عليه وسلم يقول : « ما من عبد تصيبه مصيبة ، فيقول : إنا لله وإنا إليه راجعون : اللهم أجرني في مصيبتي ، واخلف لي خيرا منها، إلا أجره الله تعالى في مصيبته وأخلف له خيرا منها . قالت : فلما توفي أبو سلمة ، قلت كما أمرني رسول الله صلى الله عليه وسلم فأخلف الله لي خيرا منه رسول الله صلى الله عليه وسلم . رواه مسلم .

ثانيا.... أحمدوا الله على نعمة الصحة العافية ... الصحة و العافيه كنز من الكنوز احنا ما نقدر نعمتها ...

اذا عندك الصحة و العافية تقدر تعمل أي شيئ .... و اذا ما عندك كنوز الدنيا ما تسوى و لا شيئ عندك

قبل فترة توفيت بنت شابه من أرحامنا بالسرطان الله يحمينا و امراه بمرض نادرا جدا بالرئة .... و بالرغم من انتمائهم الى أغنى العائلات ماقدروا أبدا أنهم يعالجوهم .... و ماقدروا يستمتعوا بشيئ من اللي عندهم في الوقت اللي ممكن لو أي أحد فينا شاف عزهم كان حسدهم .....

عارفه أنكم صغار و ممكن ما يعجبكم كلامي ....

للحديث بقية أنتظروني