عزيزاتي الطالبات -تفضلوا هنا وضعوا تجاربكم مع الاستاذات -

[s.w]

رايتنج1 مع مس مايا اليافي
استاذة ذوق وعسل وطيبة بكل المعاني صراحة كنت متخوفة من السنترا لكن الله يسعدها كانت متعاونة معانا بشكل خيالي اتفاجات لمن شفتها حامل بصراحة كنت متعبتها من كثر ماارسلها مقالات تصححها لي والله انها تصحح كل كلمة وترد عليه وماتنطش ابدا حتى نكلمها بالجوال وعلى قلبها زي العسل الله يوفقها صح درجتي ماعجبتني بس الغلط ابدا مو فيها الوقت ماكفا وبجد يبغالي اتعلم كيف استعجل في الكتابة

فرنسي1 مع استاذة جيهان الحسن
هذي الاستاذة مافي اطعم منها <<ياحبي لكلام المصارية خاصة لمن يقولون بصي حضرتك
امينة جدا في شرحها وتركز على الشغلات المهمة والاختبار زي العسل مافي شئ خرج عن الكتاب ومتعاونة كثيييير الله لايضيع لهم تعب كلهم

[Andalus ~]

سهام فطاني ..

الله يسعدها كل ترم يخوفوني منها ..
أخدت كورسين عندها وما شاء الله عليها ممتعة في الكلاس لكن مشكلتها ماتشرح للبنات قد ماتسولف
أسئلتها متوسطة لا صعبة ولا سهلة مرة زي ماقالو البنات
مافي داعي تخافو منها أبدا والحمدلله أسئلتها في مقدمة في الأدب كانت أسهل بكثير من نجوى الغريبي
طلعت من الامتحان على طول أهزئ كل بنت قالتلي الله يعينك عليها و نجوى أحسن منها واللي حقلي حترسبي معاها ..

انا مرتاحة معاها ومافي خوف من النقد والشعر بعدين !

*

*


خولة زهران

أفضل شرح أستمتع فيه بعد سوزان فكهاني
عندها القدرة تخلي 80 طالبة في كلاس واحد .. الكل منتبه عليها محد شارد
بالنسبة لأسئلتها .. هية تحب المقالي مرة لأنو من خلالها تعرف اذا البنت فاهمة المنهج ولا لأ
الشيء اللي ما أحبه هية الفراغات من دون كلمات مفتاحية تختاري منها
تحط أسئلة قليلة جدا على توزيع درجات كبير لانها ماتحب تطول في التصحيح

لمن تاخدي معاها أي نقطة في الكتابة اتخيلي انها بتسألك describe أو explain
الحمدلله نجحت بأعجوبة في السينتاكس والسيمانتكس وبدرجات حلوة


*

*


منى صابر

البنت اللي فوق جابت الوصف الصحيح عنها ما أخالفها ولا فأي نقطة
شرحها حلو والاحلى البوربوينت اللي عندها .. لكن أسئلتها تحتاج تدقيق وتركيز
و هية تقلك انو موادها easy but tricky
عشان كده في ملزمة تمارين للمورفولوجي منفصلة أو مجموعة مع الكتاب المصور موجود الاجوبة في الخلف.
اتدربو قد ماتقدرو

[~soso~]

مس منى البلوي فونتكس
اخذته معاها مره كانت مممتازه تعتمد على الفهم اكثر من الحفظ يعني ماتجيب ايسي وبالشرح تعطيك الزبده وشرحها جدااااااا واضح وتبسط لك المعلومه وهي خلوقه ومحترمه تعاملها حلو مع البنات ..

بنات عندي استفسار عن مس صفاء المنصوري ياليت الي اخذت معها تقولي عنها كويسه او لا بالفكشن لاني محتاره اخذه معاها او ايمان حمزه؟ ياليت تفيدوني

[FAITH^_^]

انا حابه اكتب لكم تجربتي مع بعض الاستاذات
طبعا راي الشخصي و يمكن يختلف من بنت بنت
و ما قصدي اخوف احد ولا شي .,... اقصد فيها المساعده لبعض الطالبات و اجر وعشان تاخذو فكره
والله يوفق الجميع

الاء المحمدي >> اخلاق و طيبه جدا و الاهم تمشي في الدرجات و تراعي ضروف البنات و صعوبه اللغه عندهم

ليلى هاشم >> االإف الوحيده الي عندي كانت منها و كانت تهدد من بداية الترم ... نصيحه لوجه الله حاولو تبعدو عندها ...لكن اذا كنتو عندها توكلو على الله و شدو حيلكم و ان شالله خير

منال التاودي >> اخذت معاها الترجمه كانت مسهله علينا مره وما تبغا كتب بس قطع نترجمها .. تشرح كويس ,, تصحح اغلاطهم بدون ما تحسسهم بضعف اللغه عندهم ,, و تصحيحها جيد في صالح البنات
ايمان بوترعه >> العجب ...
مره تكون كويسه وما في احسن منها ومره نحس اننا راسبين مافيها كلام
درست عندها الدراما و الريسيرش
بشكل عام هيا متعاونه جدا ترسل عالايميل ملخص شرح عروض مواعيد التسليم و تخاف على طالباتها لكن ..تعصب بسرعه و تصحيحها دقيق و ما تعطي ولا نص درجه زياده ... الي تستحقيه راح تاخذيه و بس !
نسرين >> طيبه لكن شرحها ممل لابعد حدددد ملل ملل ملل ... نجحت عالحفه معاها .

منى البلوي >> روووووعه طيبه و تشرح وتوصل المعلومه سهلت الفونتكس علينا و اعطتنا درجات مرره حلوه حاولو تاخذو عندها بدل ليلى هاشم

سحر نصيف >> محاضرتها ممتعه .,, و ضحك و نكت لكن .... في الدرجات و التصحيح ما عندها لعب لو طلبت تكليف و تاخر عن موعده ما تاخذه ابداااااااااا
عن نفسي اشوفها كويسه و كلاسها ممتع

صفاء منصوري >> الله يسعدها طيوووووبه و قلبها على درجاتنا اكثر منا .. في مره بكت لما شافت بعض البنات مستهترات ,, هذا شي نادر في قسمنا .. و تسهل المواد و شرحها كويس

امم نسيت مين كمان ...عموما هذي تجربتي الشخصيه معاهم ما سمعت من احد..
ولا تخافو من ترم لترم يتغيرو الاستاذات و يتغير اسلوبهم

توكلو على الله وربي يوفقكم ..

[سعادة الطالبه الشاطره]

مايا اليافي >>>اللي يشوف اسمها في الجدول وماياخذ معاها غلطااااااااااااان 100 %
اخذت معاها Reading 1 وكانت جدا متعاااااااااااااااااااااونه ((لكن كله عندها بحدود يعني لا تغشش ولا تعطي درجات زايده))
وماتجيب طاري الرسوب ولا تخوفك منه زي عادة اغلب الاستاذات.,,
يعني تحسينها طول الترم وهي تعطيك طاقه ايجابيه

الاسئله موحده
20 20 20 40
...........................

مس رشا قزاز في مقدمه في الادب .,,طبعا كل البنات مايمدحونها
بس انا اشوف انها ابدا ماتظلم ومو صارمه بالعكس مرنه جدا في تعاملها
وتعطي اكثر من موعد للواجبات ووتقدر الظروف
واسئلتها على قد شرحها بالضبط وبس انتي اقرئي القصه او المسرحيه وحضري لها
وراح تكونين مرتاااااااااااااحه معاها وهي راح تقدر هذا الشئ
بالاضافه الى انها ماتحب الغياااب ابدا والتاخير الدائم.,,
15 15 15 5 >>اختبارات 10 >>بحث بسيط من صفحتين 40 >>فاينل
.............................
Syntax نحو ..مع مس مأثر .,,الشرح في جهه وهيه في جهه ثااانيه مع احترامي الشديد لها ولاخلاقها العاليه
بس الشرح قدرااات وهي تفتقر هذه القدره تماااااااااااااااااااما
رغم انه السنتااكس سهل جدا لو انشرح بطريقه وحده خبره ومحترفه الشرح .,,
لكن انا وصحباتي طول الترم واحنا نفهم بعض ونقعد على المحاضره في البيت عشاان نعرف محتواها وعلى ايش تركز
غير كذا اتحدا وحده تعدي معاها الا اذا على الحافه ..واللي زاد الطين بله انهم وحدوا الاسئله وتعاااالوا شوفوا العجب
شرح مس مأثر مختلف تماما عن الاختبارات .,,مواضيع جديده نتعرف عليها في الاختبار خخخخخ
تقسيمها كان 15 15 5 5 5 5 5 5 40
دوريين وسته اختبارات صغيره وفاينل..

.....................................

فونتكس مع الرااااااااااااااااااااائعه مس منى البلوي .,,
الصراحه انا احب هذه الانسااانه جدا جدا جدا محترمه وتعطيك الزبده واسئلتها في الاشياء المهمه
رغم انها لاتزود ولاتغشش ولا ترفعك
لكن تشرح المهم وتسأل عنه في الاختبار .,,بس اهم شئ ركزوا في محاضراتها .,,
وغيابها كثييييير جدا ..لكن تخلص بسرعه ..
تقسيمها كان 20 20 20 40
واهم شئ اهم شئ احترامها للبنااات


.......................................
وبس .,,

اتمنى انه مايكون ظلمت احد او زودت في المدح ..
وفي النهايه التوكل على الله و مفتاح التوفيق مو الاستاذات..

[Cramilla]

السلام عليكم

مقدمة في الأدب
أستاذة رشا قزاز > شرحها رائع و تاخدك لعالم تاني و محاضرتها الوحيدة اللي ما اطالع للساعة فيها من كتر ما انا مستمتعة، تحب البنات انهم يحضروا و يتفاعلوا معاها في المحاضرات، حتى لو اللي في راسك مو معقول او خطا رح تقدر انك بتتحاوري معاها و احيانا تقتنع برأيك و تنبسط منك، اتذكرو في الأدب مافي شي صح الا قدرتي تثبتيه، و مافي شي خطأ إذا أثبتيه
أسئلتها شوية عميقة - زي كل أسئلة مواد الأدب - و اذا ما بتحضري او تشاركي معاها لا تحضري لها
مرنة في التعامل و تعامل الطالبات زي أخواتها، تمزح و تضحك و تأجل مواعيد التسليم او افختبارات على حسب ظروفنا
الكل خوفني منها يقولوا انها شديدة، و قصدهم انه في التصحيح تدقق، بس اشوف انه كل الأستاذات بيسووا نفس الشي

أستاذة أشواق بصنوي > قمة في الرقي في التعامل مع الطالبات ، تساعد قد ما تقدر، تشرح من قلبها

أستاذة رندا آل الشيخ > تشرح كأنك فاهمة المنهج من قبل و هي جاية تراجع لك معلوماتك عنه ، أسلوبها مو كويس في التعامل مع الطالبات

مقدمة في اللغويات

أستاذة هيفاء الروقي > راقية و رائعة في الشرح
أستاذة آلاء المحمدي > تشرح بسرعة و ما احس اني افهم كتير معاها، بس الباقيين كانوا ماشيين معاها تمام

مناهج البحث

أستاذة خديجة باوزير > نص الترم غايبة و كنت ضايعة في المادة مو عارفة كيف اسوي البحث

مقدمة في الترجمة

أستاذة خديجة باوزير > برضو نص الترم غايبة بس يمشي الحال في دي المادة لأنه يعتمد على ترجمتك وقت الإختبار

[احساس أنثى]

الفيكشن مع الدكتورة صفاء المنصوري
بصراحة أنا أخذت معاها وكان الكلاس معاها نوعا ما حلو والروايات مكررة من الاترام اللي فاتت حتى الأسئلة مكررة أما أسلتها فكانت مابين مقالية واختيارات
بس بصفة عامة الكلاس معاها كان حلووووو وتحب اللي تحضر وتناقش معاها الرواية بالكلاس

[أزرق]

البوتري447 مع د .ناريمان
رووووووووووووووووووعه وماتشيلي همه في الفاينل تحذف قصايد كثير الدوريات ماتدخل في الاسئله المقاليه
برزنتيشن عليه 20 ودوريين وتعمل اختبار من 20 تحسين
ريسيرش مع د خديجه باوزير
معروفه طريقتها الكورس كان وايد مريح

[بهجة الروح]

اول حاجه مبروووك للي نجحوا ربي يوفقهم بالمواد الجايه
واللي ماعدو في بعض المواد ان شاءالله يكون هالشيء حافز لهم
وانهم ماييأسوا ويرجعوا بامل اقوى

تجربتي الترم دا اللي فات

اخذت ريسيرش مع دكتوره ابتسام فكهاني
من اروع الكورسات اللي اخذتها جدن ممتع ومنظم
اختبارين دوريه من 15
برزنتيشن 10
بروبوزال 10
ريسيرش 10
واجبات ومشاركه 10
فاينل 30
الله يسعدها مره كانت متعاونه وتراعي ظروفنا وتأجل لنا الاختبارات لو عندنا تعارض
تعاملها سهل واسئلتها سهله واضحه كلها فراغات وتعداد او ترتيب
اخذت معاها درجه عاااليه الحمدلله

اخذت بويتري مع دكتوره ناريمان
صح ان الشغل كله عليك وتدوري ع القصايد وشرحها من النت
لكن هالشي مرا مفيد يخليك مذاكره طول التيرم والقصايد اللي تجيبها سهله
بحث وبرزنتيشن مع قروب عليه 20 كان سهل الحمدلله
اختبارين من 20
اسئلتها مقاليه لكن تتكلم عنها كثير بشرحها فتقدري تفهمي ايش المهم اللي هي تبغاه
تركز على الخصائص لكل عصر وعلى الثيم العام للقصيده
اهم شي لما تقلكم دوروا او حضروا تكونوا مجهزين اللي هي تبغاه عشان ماتعصب عليكم وماعاد تشرح خخخخخ
برضو اخذت معاها درجه حلوة الحمدلله

اخذت فونتكس مع استاذه ليلى هاشم
والله الكلاسات كانت ممتعه وحلوة لكن اسئلتها كلها ترانسكبشن وهي ماشرحتو مزبوووط
3 اختبارات من 20
كانت الدرجه جيده


اخذت ابلايد مع دكتوره ماثر ماده غثيثه وصعبه الحمدلله اني افتكيت منها
دكتوره ماثر مره دقيقه باسئلتها تركز على شي واحد وتطلب منه كذا فقره
يعني كنت انقهر لما اذاكر كثييير وهي تركز على موضوع واحد تحط عليه كل الدرجات
البرزنتيشن والبحث عليهم 20 درجاتهم حلوة الحمدلله
واختبارين دوريه من 20
ادتني بالاخير 89 يابناااات تخيلوا مره انقهرت كان باقي بس درجه وحده اااه بس الحمدلله

بالتوفيق للجميع

[M!ss.cute]

تجربتي للترم الأخير والحمدلله سرت شبه متخرجة مع وقف التنفيذ بسبب تأجيل اختبار السيمانتكس ^^

سيمنار مع د. عزيزة العيسى

الكورس يعتمد بشكل كبير ع اللغويات الاجتماعية ويحتاج حفظ مع فهم لكن اسلوبها يخليه سهل ويمشي بسرعة وتعطيكي حقك وزيادة

تقسيم الدرجات : 15 اختبارين - 5 عرضين - 30 ريسيرش - 30 فاينل

المذاكرة كانت من الكتاب والسلايدز والاسئلة منوعة بين صح وخطأ وسؤال مقالي



الابلايد مع د. مآثر

المادة دسمة وتطفش يبالها حفظ بقوة بس مع مس مآثر كانت رووووعة وسهلة انسانة منظمة ومرتبة ماشاء الله عليها

تقسيم الدرجات : 20 اختبارين - 10 ريسيرش - 10 برزنتيشن - 40 فاينل

المذاكرة من محاضراتها طبعا اللي لازم تنحفظ مزبوووط والاسئلة منوعة بين مقالية و فراغات واختيارات



المودرن مع أ. إيمان حمزة و د. رندا

المادة طويلة شوية ويبالها حضور منتظم وتركيز ، مس ايمان كانت ماسكة قسم الدراما والفيكشن يعني روايتين ومسرحية وحدة ، مس رندا ماسكة قسم البويتري وهو 6 قصايد

تقسيم الدرجات :
1) مع مس ايمان : 20 درجة على اختبار في رواية ومسرحية مكون من سؤالين ايسي + 15 درجة على اختبار في الباكراوند والمؤلفين مكون من اختيارات
2) مع مس رندا : 15 درجة على اختبار في 4 قصايد مكون من سؤالين ايسي + 10 درجات على بحثيين سويناها
3) الفاينل مكون من 3 اسئلة مقالية من 40 درجة

الكورس بشكل عام شوية ملخبط بس ادا كان مع مس ايمان لوحدها اتوقع بيكون أحلى بكتيييير



السيمانتكس مع د. أفنان فطاني

الكورس خفيف وقليل ومرتب بس يبغالو تركييييز وحضور مستمر وفهم أكتر من الحفظ وبصراحة تعامل الدكتورة راااائع وراقي جدا الله يسعدها

تقسيم الدرجات : 20 على 3 اختبارات + 40 على الفاينل

في كل اختبار تختبري في شابتر واحد ومعد ترجعيلو ، والمنهج كلو كان 4 تشابترز
الأسئلة كثيرة وشاملة بس حلوة ومنوعة بين شورت ايسي و اختيارات وفراغات عشان كدا لازم تركزي على كل فتفوتة في التشابتر



البراكتكم 2 مع أ. منى البلوي

الكورس كلو تدريب وما ضيعنا ونزل درجاتنا الا الفاينل لانو يعتمد ع التوفل
اتدربت في المكتبة وكان التدريب ممل شوية بس سهل والفترة تعدي بسرعة وبصراحة يدويكي درجات كاملة يعني تعبك ما يروح

تقسيم الدرجات : 40 تقييم المشرفة على التدريب + 10 تقييم المس على التدريب + 10 برزنتيشن + 10 ريبورت + 30 فاينل

وهادي اخر تجربتي في الجامعة وأي احد عندو استفسار أو يبغى مساعدة أنا في الخدمة وشدو حيلكم ولا تتاكسلوا ولا تيأسوا والله يوفقكم