(رابعة طب أسنان) سنة العيادات.. سنة المغامرات !

[Dr~NanoOok]

السلام عليكم ورحمة الله ,,


كعادتي بعد انتهاء كل سنة أمّر بها .. أحكيكم عنها وأذكر نبذة عن موادها
تجاربي وانطباعي عنها ..

لكن السنة هذه لم تكن كالعادة !
بل كانت بداية السنوات الاكلينيكية ودخول العيادات وعلاج المرضى

أجمل السنوات وأكثرها حماسًا ^_^

بدايتنا كـ أطباء أسنان رسميًا .. و حصولنا على عيادة خاصة باسمنا
ومرضانا


فقط الآن.. بيدينا هذه اصبحنا نقدر على تخفيف الآلام و علاج الأبدان !
ممارسة الحلم الذي طمحنا إليه سنين طوال
و شعور بشرف المهنة الغالية التي أنعم الله علينا بدخلونا فيها ودراستها

استشعار كوننا .. وُضعنا هنا.. لتحقيق رسالة.. والوصول لغاية
وأن كل شي لم يعد يتعلق بي وحدي !

أن أذاكر لأنجح ولأجل تحصيل درجاتٍ فقط

أو أذاكر لأجل الاختبار.. وعند خروجي منه اخرج ما تبقى منه برأسي !

الآن باتت مسؤولية أكبر بيدي ..
و أمانة أمام الخالق تعالى .. وأن أبذل أفضل ما عندي لأجل معالجة غيري


~


إنها السنة الرابعة من مشوار الحلم ..
السنة الرابعة بكلية طب الأسنان

سنة العيادات.. وسنة المغامرات أيضًا !






~



نبذة عامة عن هذه السنة ..


أجمل السنين وأكثرها فراغًا
طيب ممكن تقولوا كيف حتكون أقل وحنكون فاضين مع ان عدد المواد مازال 10 زي سنة ثالث !؟

هي 10 مواد صح .. لكن كمية المناهج والمحاضرات اللي تاخدوها خلال الأسبوع أقل
وكثرة العملي.. اللي يسهل الفهم ويخلي كل شي أحلى ^_^


بثالث كنتوا تاخدوا المادة الواحدة.. من 2 - 5 محاضرات في الأسبوع

لكن دحين حتاخدوا المادة مره واحدة أو مرتين بالأسبوع فقط
و بعدها العيادة أو المعمل لمدة 3 ساعات

غير أن أغلب المواد تكونوا أخدتوا فكرة عنها من قبل.. والأساسيات معاكم
فمره حيسهل فهم الأشياء الجديدة

وأحلى خبر ..

أن مواد البشري اللي حتاخدوها هذه السنة .. بس مادتين !! ^_____^

بدال ما كانت تلات ارباع المواد في ثانية و شوية من ثالث !

وصراحة المادتين هذه احنا ما نعتبرها مواد ولا ليها قيمة كبيرة مقارنةً بمواد التخصص الأسناني :p


~

ودخلنا في فهم طب الأسنان حقيقةً ..
وقد ايش هو علم رائع رااائع !

حتحبوا الدراسة فيه


~

بالنسبة للعيادات ورهبة اعطاء المرضى ابرة التخدير لأول مره
و العمل في فم انسان حقيقي والتعامل مع بشر

كلها في البداية تكون صعبه.. لكن حتصير من أحلى الأشياء وأمتعها

العملي بسنة رابع .. يُعتبر حلو وكويس

أكثر من سنة ثالث << وعشان كده ممكن تحسوا بالضغط
وأقل من سنة خامس << يصير واسوا نفسكم وخففوا على نفسكم برضو
احنا بخامس حننكرف كرف محصلش :p

لكن كلوا يعدّي وربي يسهلها باذن الله .. أهم شي

اتعاونوا اتعاونوا اتعاونوا !!

من غير التعاون ما حتقدروا تنجزوا وتعملوا أحسن ما عندكم
حاولوا توفروا مرضى ليكم .. ساعدوا بعض اذا أحد ما لقي الحالة اللي يحتاجها

في مادة الاندو ساعدوا بعض في توفير الأسنان الطبيعية

وصدقوني.. صدقوني

اللي يساعد غيره.. ربي حيساعده ويعطيه الين يرضيه !
وأوقات لما تكوني في شدة الضيق .. ربي يساعدك ويفرجها عليكِ كالمعجزة !

فلا تستهونوا بكده أبدا.. وكونوا يد واحدة وقلب واحد



يُتبع ,,

[Dr~NanoOok]

قبل ما ابدأ في المواد وشرحها ..


حشرحلكم الأسبوع الأول من الدراسة "الاسبوع الارشادي"
orientation week


وزعوا عليكم الجدول بآخر يوم بالاختبارات.. واعتقد كلموكم عن المتطلبات قبل دخول سنة العيادات
وشرحولكم هيا


اهم شي خدوا دورة الـ CPR من بدري عشان تخلصوا وتختاروا موعد مناسب ليكم
لأنه دايما يكون زحمة وما تلاقوا أماكن فاضية

ولا تخلوها لأول أسبوع دراسة لأنه غالبا حتكونوا مشغولين وتحضروا المحاضرات والأشياء التانية بالجدول

~



بالنسبة للتطعيمات ..

برضوا حاولوا تخلصوا منها خلال الاجازة
غالبا ما تكون كل التطعيمات موجودة .. فممكن يأخروكم

فتح الملف بالمستشفى الجامعي و تعبئة قائمة التطعيمات تاخد وقت

وحيكونوا البشري كمان لازم بياخدوها.. وبيكون زحمة

ونصيحة لا تاخدوا فقط التطعيمات اللي طلبوها مننا كليتنا .. خدوا كل التطعيمات الموجودة بالقائمة
لأنكم داخلين عيادات ومرضى وما تضمنوا ايش يكون عندهم
فالوقاية أفضل


..


ممكن تاخدوا التطعيمات من خارج المستشفى الجامعي
لكن أسعارها حتكون غالية شوية
و اذا تبغوا تروحوا المديكال حق الخطوط السعودية .. ما فيه كل التطعيمات للاسف


~


أهمية حضور الأسبوع الأول ..


بالنسبة ليكم يا رابع

أنصحكم وبشدة تحضروا دا الأسبوع

حيعرفوكم على كل شي بالعيادات ونظامها وكيفية التعامل مع ملفات المرضى وأجهزة العيادات
وكل شي فيها
وبنهاية ال
أسبوع في كويز بسيط عشان يتأكدوا انكم فهمتوا أهم الأشياء اللي انقالت خلال دا الأسبوع

<< على فكرة احنا خامس وسادس حنرجع وناخد كل دي الأشياء مره ثانية !
والحضور الزامي للكل


~



بالرد الجاي حتكلم عن المواد وشرح بسيط عن كل واحدة




يُتبع ,,

[Dr~NanoOok]

نبذة عن المواد ~

حتكون 10 مواد في الترم الواحد

3 مواد حتاخدوها الترم الأول وتنتهوا منها .. وحتاخدوا بدالها 3 مواد جديدة
وتبقى 7 مواد مستمرة طوال الترمين ..

~

حبدأ بالمواد السنوية اللي حتاخدوها الترمين مع بعض

Operative Dentistry
اصحاح الأسنان

عليها 4 ساعات + العيادة

مادة مو جديدة عليكم.. واخدتوها بسنة ثالث.. وتقريبا نفس دكاترتها حيدرسوكم
كمية المنهج أقل بكثير من ثالث

منهج هذه السنة بيعتمد كتير على الـ dental materials
وتقريبا نفس اللي اخدتوها السنة اللي فاتت

لكن هنا بطريقة عملية وكيف حتستخدموها انتم

في شابتر كبير عن الـ cariology بالتفصييييل
ومهم تفهموه وتعرفوه كويس

حتاخدوا الكلاسات حقت الكافيتي من جديد بصفة عامة
لكن بشكل مكثف في بعضها
class III , class IV , class V

وكل شي حيكون شرحه على أساس تطبيقه بعدين في العيادة
فمره حلو حيكون و ممتع

~

العيادة ..

أحلى وأمتع عيادة في سنة رابع .. وكلكم حتتحمسوا فيها ^_^
أول مره حتشتغلوا على مريض حقيقي

حتبدأوا بعمل
class I simple amalgam & composite
بعدين حتعملوا كل الكلاسات لكن كلاس 1 & 2 أكتر شي يطلبوه منكم في الـ requirnments

بالبداية ما حتعطوا ابرة التخدير بنفسكم .. الدكاترة المشرفين عليكم حيعطوها
الين لما تتعلموا كيف تعطوها على نهاية الترم الأول أو الترم التاني في مادة التخدير

والدكاترة حيكونوا دايما متواجدين معاكم.. وأي خطوة تحتاج مساعدة فيهم
اسألوهم وحيساعدوكم

حاولوا تدوّروا على المرضى والحالات بنفسكم ولا تعتمدوا على الكلية في توفيرها
عشان تقدروا تخلصوا أكبر عدد من الريكوايرمنت

<< كلمة ريكوايرمنت حتسمعوها الين لما تطفشوا خلال هذه السنة "^^
الله يعيننا جميعا


~



المراجع ,,


الكتاب بالاضافة للنوتز
الدكاترة ما بيعطوا شيتات في هذه المادة كالعادة





&

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ ~~~~~~~~~

Periodontics
علاج اللثة و الأنسجة المحيطة بالأسنان

4 ساعات + العيادة

مادة حلوة جدا.. حتدرسوا فيها اللثة وأمراضها وكل الأسباب المسببة للمشاكل فيها
علاج عضام الفك اللي يكون سبب المرض فيها الأسنان و الأنسجة اللي حولينها

كيفية ازالة الجير وتنضيف الأسنان
والكثير من الأشياء

المادة كميتها كبيرة.. ومعلوماتها كتير.. لكنها حلوة
ومع العيادة والعملي حيسهلها كتير وخاصة في جزء الـ instruments واستعمالاتها

~

العيادة ..

في الترم الأول حتشتغلوا على بعض .. وما حتمسكوا مرضى
على الترم التاني حتمسوا مرضى وتعملولهم فحص كامل و تنضيف للأسنان

حتاخدوا كيفية استعمال الأدوات و طريقة فحص شامل
و تعبئة ملف الـ charting اللي حتمسكوا سنّة سنّة من كل الجهات عشان تقيسوا
كمية البلاك و النزيف و البوكيت وكل شي

بالترم التاني حتعملوا كل اللي اتدربتوا فيه على بعض
لكن دي المرة على مرضى ..
العيادة شغلها حلو وسهل لكن يبغاله طول البال
والمريض حتشوفوه خلال زيارتين الى 4 زيارات
فحاولوا تخلوه معاكم وما يسحب عليكم "^^


~


المراجع ,,


الكتاب مهم في الصور وفي التوسع
الشيتات + النوتز مهمة

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ ~~~~~~~~~

Fixed Prosthodontics
التركيبات الثابتة

4 ساعات + العملي

أهم مادة في سنة رابع , و مجموع درجاتها = 300 درجة أي تساوي 3 مواد !
أما مواد الأسنان الثانية فمجموعها يكون 200 درجة
و تؤثر على المعدل والنسبة أكثر شي وخاصة في التخرج

وتعتبر من أصعب وأدق التخصصات في طب الأسنان
وأكثرها ربحا $ $ وتدخل فلوس كتير "^^

درستوا السنة اللي فاتت removable التركيبات المتحركة
وهذه دراسة التركيبات الثابتة

مشابهه ليها لحد ما.. لكنها تحتاج أشياء أكثر بكثير ودقة

حتدرسوا أنواع التركيبات "الجسور" و حالات استخدامها, خصائصها ومميزاتها
كيفية عمل preparation of the teeth
عشان تحطوا عليها الـ bridge or crown

والحفاظ على الأنسجة و الأسنان ..

ذاكروها أول بأول لأن كمية المعلومات كثيرة
و اسئلة الدكاترة ما تكون سهلة ومباشرة بالمره !

~

العملي ,,

معمل مُقسم مابين معمل الفانتوم.. ومعمل التركيبات حق الريموفابل السنة اللي فاتت

في معمل الفانتوم حتتعلموا كيف تعلموا الـprep. على الأسنان الاكريل
لعدة أنواع من الـ crowns

وبمعمل الريموفابل حتعملوا temporary brige
&
lic bridge على الترم التاني
وحترجعوا تعملوا waxing up زي حق سنة ثانية
وكل الشمع والأدوات حقتكم حترجعوا تستخدموها ثاني

شغله دقييييق والدكاترة مره بيدققوا
اتدربوا قد ما تقدروا على الشغل عشان تتقنوه ويصير كويس


~


المراجع ,,


الكتاب مهم جدا جدا !
بالاضافة للشيتات لأخذ النقاط المهمة بالدرس ومن ثم دراستها وقراءة الجزء المتعلق بها من الكتاب

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ ~~~~~~~~~

Removable Prosthodontics
التركيبات المتحركة

4 ساعات + العيادة

اخدتوها من السنة اللي فاتت .. وبهذه السنة حتكملوا دراستها وتتعمقوا فيها أكثر
وكل شي يعتمد على اللي اخدتوه قبل

خلال سنة رابع حتركزوا على دراسة الأشياء اللي حتصير وقت العيادة ومع المرضى
كيفية اختيار خطة العلاج للمريض
أخد الـ impretions
و الخطوات كلها الى تسليم الدينشر للمريض

وعلى الترم التاني حتدرسوا خطوات ما بعد تسليم الدينشر للمريض
وكيفية تقييم جودة الدينشر وتصحيح الأخطاء فيه

مادة خفيفة حتكون مو زي السنة اللي فاتت
برضو عشان كل شي بيتطبق عملي في العيادات

~

العيادة ,,

أول مريض حتتعاملوا معاه في مشوار حياتكم الاكلينيكية ^_^
حتعملوا طقمين
complete dentur & RPD

فقط مريضين على مدار السنة .. حاولوا توفروا مرضى للطقم الكامل
لأنه صعب تحصلوهم

العيادة هذه حتعلمكم الكثير من الصبر و تطويل البال على الدكاترة
وعلى فنيين المعمل عشان يعملولكم الشغل والدينشر !


~



المراجع ,,


الكتاب حلو في الصور
الشيتات + النوتز في المحاضرة

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ ~~~~~~~~~

Endodontics
علاج العصب والجذور

4 ساعات + العملي

حتدرسوا فيها الأسنان و أشكال وأنواع العصب بداخله
وكيفية تنضيفه وازالته و وضع مواد داخل الأسنان لتقويتها بعد سحب العصب
و الأدوات الخاصة بعملها

مشوارها طويل.. وحتبدوا خطوة خطوة الى نهاية السنة

مادة معلوماتها كتير.. والحلو أن دكاترتها بيعملوا كويز كل بعد درسين او ثلاثة
فيتكونوا مزاكرين المادة أول بأول

~

العملي ,,

من دحين دوروا وروحوا عيادات الأسنان وجمعوا الأسنان المخلوعة
وجيبوا كمية كويسة عشان تقدروا تتدربوا على كيفكم
و تلاقوا الأسنان الكويسة والسهلة في الشغل
اعملوا كده عشان لا تتعطلوا بعدين في تسليم الريكوايرمنت

وترا شغل الاندو مااا يخلص بسهولة .. وكان عاملنا أزمة كبيرة !
وكل لما تجونا يا سنة تالت وتشوفونا محيوووسين بالمعمل وتسألونا ايش المادة دي ؟؟
نقلكم انها الاندوووو :p

لكن ربي يسهلها إن شاء الله
وكلـــــــــه يخلص ويتسلم بالنهاية ^^

حتطبقوا كل شي اخدتوه في المحاضرات خطوة بخطوة
من بداية السنة اللي نهايتها خلال الترمين

وفي نهاية الترم التاني.. حيكون في اختبار عملي
تمسكوا السنّة وتعلموا فيها كل الخطوات الى نهايتها خلال 3 ساعات


~

المراجع ,,


الكتاب + شيتات الدكاترة + النوتز
مرررره مهم تكتبوا كل شي ينقال في المحاضرة

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ ~~~~~~~~~

نجي لمادتين البشري اللي في دي السنة

General Surgery
الجراحة العامة

&

General Medicine
باطنة

عليها ساعتين لكل مادة.. ومافيها عملي

حتاخدوا فيها كل شي بالحياة :p
وخاصة المديسن كأنوا مايكرو على باثولوجي على فارما !

والسيرجري نفس الشي

للاسف القسمين غير متعاونين ابدا .. وما بيحضروا كل المحاضرات حقتهم !
ونصيحة من كل الدفعات اللي قبلنا

زاكروا الكومون اهم شي!
مع بعض الاطلاع على المادة :p

لأنهم قسم ما بيصحح للاسف ! والدرجات بتتعطى عشوائيا !

ذاكرنا وحلينا مرررره كويس في الاختبارات.. والدرجات غير منطقية!

و السيرجري يحبوا يجيبوا أسئلة من براااا المنهج وعمرنا ما درسناها !

يقولوا على سنتكم حيحاولوا يضبطوا الوضع ..
إن شاء الله يارب


~



المراجع ,,


ما ليهم كتب .. و المزاكرة من الشيتات + الكومون


~

يُتبع ,,

[Dr~NanoOok]

نجي للمواد الفصلية .. واللي حتاخدوها خلال فصل دراسي واحد فقط ,,

بالنسبة للفصل الأول ~

Oral Diagnosis
تشخيص أمراض الفم وخطط العلاج

ساعتين + العيادة

مادة تتعلموا فيها أساسيات التعامل مع المرضى بالعيادة و خطوات التشخيص
خطوة بخطوة ..
Extra oral examination & intra oral

وبالنسبة في الـ extra oral
حتعملوا قياس لضغط الدم للمرضى و قياس نبضات القلب و العديد من الأشياء
اللي بيقوموا بها أطباء البشري !
وحتستخدموا السماعات و جهاز قياس الضغط
ولا زم تجيبوها من عندكم

وكل شي حتاخدوه بالمحاضرات حيتطبق في العيادة
ما عدا المواضيع العلمية اللي ما تتطبق

و في جزئية مواضيع عديدة حتتقسم عليكم.. انتوا حتشرحوها و تعملوا عرض عليها
والمزاكرة حتكون من المصادر حقتكم

~

العيادة ,,

مررره ممتعه وحتكون تطبيق لكل اللي اتعلموته وفحص شامل للمريض من كل النواحي
فحص للجسم + فحص للفم + جميع الأسنان + أشعة بانوراما للفم والأسنان

بالبداية كان مررره ممتع وحلو.. لكن بعدين صاير عادي :p

حتفحصوا 4 مرضى خلال الترم .. والمريض الخامس حيكون عليه الاختبار النهائي العملي


~


المراجع ,,


الكتاب + شيتات الدكاترة + النوتز

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ ~~~~~~~~~~~~~~~~~~~~~~~~~~~~~~~~~~~~~~~~~~~~~~

Pain Control
تسكين الألم والتخدير

ساعتين + العملي

مادة إعطاء إبرة التخدير

حتدرسوا فيها الاناتومي حق الوجه والرأس من جديد
أهم الأعصاب وأماكنها بالتحديد

بعدين مكونات ابرة التخدير وموادها << كأنها فارما "^^

و أهم جزء هو التكنيكات لإعطاء الابره
حتتعلموا كل التكنيكات .. وحتطبقوا بعضها عمليًا

~

العملي ,,

حتشتغلوا و تتطبقوا على بعض !!
ايوا حتعملوا كده.. ومن بداية الترم حتختاروا تكونوا اتنين اتنين وحيبدأ التعذيب :p

بالعكس مرررره كان يحمس .. شعور أول مره امسك الابره و بدخلها في فم صحبتي

و الأيام اللي كنا نرجع فيها البيت و نص فمنا مخدّر من بعد التجريب

بس لا تخافوا .. حيكونوا الدكاترة فوق راسكم و معاكم خطوة بخطوة
وما حتدخلوا الابره في العصب إلا وهو متابع معاكم كل شي ومتأكد انكم حطيتوه في المكان الصحيح

حتتعلموا اعطاء الابر على نهاية الترم الأول
ومن بعدها في عيادة الابوريتيف الدكاترة حيطالبوكم انكم بنفسكم تعطوها للمرضى


~




المراجع ,,


الكتاب + الشيتات + النووووتز

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ ~~~~~~~~~~~~~~~~~~~~~~~~~~~~~~~~~~~~~~~~~~~~~~

Oral Radiology
أشعة الفم والأسنان

ساعتين + العيادة

تكملة للمادة بسنة ثالثة .. لكن هذه المره بتعمق وتطبيق عملي على المرضى

وجزئية كبيييرة في دراسة الأمراض والتفريق ما بينها
نفس اللي اخدتوه في مادة الـ oral pathology

زاكروها أول بأول عشان تسهلها .. كميتها تعتبر كبيرة
لكن مادة حلوة وتقدروا تجيبوا فيها درجات

~

العيادة ,,

تصوير كامل لفم المريض .. بعدين تعملوا تشخيص كامل لكل الأفلام
المرضى هم حيوفروهم ليكم فلا تاخدوا هم

هنا حتحسوا قد ايش كان ديكستر حلووو ومتعاون
مو زي المرضى الحقيقين :p


~


المراجع ,,


شيتات الدكاترة + النوووتز
ممكن بجزئية د.عماد يعطيكم جزء من الكتاب تقروه

~ ~ ~ ~

للفصل الثاني ~

Orthodontics
تقويم الأسنان

ساعتين + العملي ,,

أساسيات علم تقويم الأسنان
تصنيف الحالات و أشكال الأسنان وتركيبها وأنواع الـ occlusion
بعض الأمراض اللي تؤثر عليها
أنواع العلاجات في تقويم الأسنان
والخصائص الفيزيائية للمواد المستخدمة في العلاج

مادة ممتعة وسهلة.. ودكاترة مررره ممتازين ومتعاونين ومنظمين

~

العملي ,,

حتستخدموا الأسلاك wires و تعلملوا بيها أشكال
و كيفية عمل الأسلاك الخاصة بـ retainer

بالبداية يبغالها قوة ومهارة في ثني ولف الأسلاك << خاصة للبنات "^^
لكن للاولاد الموضوع أسهل


~


المراجع ,,


الكتاب مهم وحيفيدكم كثير في السنوات الجاية
النوتز مهمة جدا + الشيتات

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ ~~~~~~~~~~~~~~~~~~~~~~~~~~~~~~~~~~~~~~~~~~~~~~

Pedodontics
طب أسنان الأطفال

ساعتين + العملي ,,

مادة حلوة وخفيفة .. تقريبا كل شي أخدتوه في الاوبريتيف هو نفسه لكن على صغير
أسنان صغيره و أحجام صغيره وكل شي

هذا القسم مشهور بحبه بالأرقام والقياسات فركزوا عليها

~

العملي ,,

أعتقد انهم حيلغوا العملي على سنتكم
هو تقريبا زي شغل الاوبريتيف اللي عملوته بسنة ثالث
لكن على أسنان أطفال صناعية ..

و اشتغلنا برضو على أسنان أطفال طبيعية
و قياسات للفكين و تحليلها


~


المراجع ,,


لا يوجد كتاب هذه السنة

الملزمة اللي حيعطوكم هيا القسم.. مهمة في العملي والنظري
بالاضافة للشيتات والنوتز

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ ~~~~~~~~~~~~~~~~~~~~~~~~~~~~~~~~~~~~~~~~~~~~~~

Oral Biology & Nutrition
أحياء الفم و التغذية

ساعتين ولا يوجد عملي

مادة مالها مصدر مزاكرة محدد أو منهج محدد
الدكاترة بيغيروا المواضيع حقتهم من سنة للثانية

مواضيعها حلوة وغريبة ومواكبة لتطور العصر

الدكاترة هم نفسهم اللي درسوكم الـ oral histology

ممكن ياخدوكم مره واحده عملي اذا نفس الموضوع بيحتاج
وحيكون برضو في معمل الهيستو

~ ~ ~ ~

وبكده خلصت شرح مبسط عن سنة رابع ..

وإن شاء الله حضيف معلومات ثانية على الموضوع

وأي استفسار أو معلومات أكثر عن أي شي.. اتفضلوا شاركوني هيا ^_^

~

موضوعي هذا بيتكلم بشكل عام عن المواد ..

بالنسبة للتفصيل عن كل مادة وكل المواضيع حقتها.. فلا تاخدوا هم
وزي بداية كل سنة .. نجيكم و نعملكم محاضرة تعريفية عن كل شي .. مع ليدرات المواد

عشان كده ما طولت كتير بالكلام ..
واعذروني عن أي تقصير

تحيتي لكم ,,
ودعواتكم

[Dr~NanoOok]

موضوع وضعته بالقسم من فترة

موضح فيه عيادة الأسنان و الأدوات والأجهزة الموجودة فيها

حيفيدكم خلال هذه السنة باذن الله

وتزيد حماسكم لها ^___^

http://www.skaau.com/vb/showthread.php?t=230224

[طالب طب في المستقبل]

موضوع جبار ورائع ....

الله يوفقك ويعينك وإن شاء الله نشوفك من احسن دكاتره الاسنان

موضوع كامل

وجزاك الله الف خير

بالتوفيق دكتورتنا

ولي باك اقرا الموضوع كامل *_^

[Dr~NanoOok]

شكرا لك أخي على تواجدك وكلامك
يعطيك العافية ^_^

وانت ماشالله عليكِ عامل موضوع جبّار شارح فيه ثانية بشري
جزاك الله عليه خير الجزاء
أمس قريته وكان متكامل ومليان تفاصيل ماشالله


موضوعي قاصده فيه أقلل من الكلام والمادة العلمية بشكل مفصل
لأنه حنرجع و نشرحه للدفعة اللي اصغر مننا لما تبدأ الدراسة

ودا الموضوع تقدروا تقولوا .. مقبلات و تحميييييس لسنة العيادات "^^

بالتوفيق للجميع آمين ,,

[مَـزٍآج ..}..]

رإأأأئع . . وحمآآآآآآآآآآآآآآس

بصرإأحه مره متحمس للسنه دي . . خلاص طفشنا من النظري . .

وفيها تجربه جديدهـ . . والاحظ موإأد كثير عليها ساعات كثيرر . .

يعني إن شآء الله نقدر نرفع شويآت المعدل بعد الانهيار الي حصلوو في سنه ثالثه هع . .

الشئ الي يخوف تقريبا اإنك راح تبدا تتعآمل مع مرضى حقيقيـن . . يعني الغلطه محسوبه عليك

مو زي لاب الاوبرتف تعيشش جوك وتدخل للبلب وفجاه تحصل نفسك في البوون هههههه . .

وطبعا كيف تتعآمل مع الناس شغله مهمه برضوو . . لانه راح يجوك انواع واشكال من الناس . .

فيه الي متعآون وفي القروووشـه والله يبعدنآ عن النوع الثاني لاني انا انسان فآير فآير

بعديين بصفه عامه كيف تقآرني سنه رإأبعه ب سنه ثالثه من حيـث الضغط في النظري فقط ؟!

يعني كميه المنهج وكذآ ؟ يعني قوليلي نسسبه مئويه >> شقلب انت وسؤالك :73

وكيف يعني نحنآ الي ارح نجيب سماعات والاشيآء دي ؟ هيا الجامعه دي كل شئ نحنآ نجيبوو

وبالنسسبه للفآكسين ؟

انتوا تقولي عادي نسويها من براا . . مع انو دكتوره هبه تقول لا ممنوع لازم في الجامعه

لاني ابغى اسويه برا وارتاح من هم الموإأعيد والزحممـه . . وبرضو انا حكومي يعني عيادات التحليه . .

والله يعطيك العافيه موضوع ولا اروع بصرإأحه .. !!

[Dr~NanoOok]

اهلين مزاج
يب خلي الحماااااااس أكتر شي ^_^

ومن أول يوم الكل يروح يدّور على عيادته ويشوفها هههههههه

بالبداية حتحسوا بكمية الفراغ اللي حتعيشوه !
خاصة انه ما حتبدأوا العملي والشغل المضبوط لأول 3 أسابيع !
وبالجدول في ساعتين بالأسبوع حاطينها عملي للسيرجري
مع اننا ابدا ما نبطلع فيها حاجه !
وكل سنة بيكلموا الادارة انهم يلغوها ويحطوا بدالها شي مهم ولا تعويض للمعامل مثلا.. لكن ما يرضوا


~

والمرضى لازم تطول بالك معاهم.. وربي يعيييييييين على الناس اللي حتقابلوهم
سواءً مرضى أو دكاترة !
لكن لازم نتعلم كيف نتعامل معاهم .. ومهما كان لازم نتغاضى ولا حتحصل حرايق بالمكان :p

~

بالنسبة للمقارنة من جهة النظري بين السنتين

شوف من جهة كمية الشيتات .. تعتبر مررررره أقل.. تقريبا نص اللي بناخده في ثالث
يعني متوسط الشيتات اللي ناخدها بالأسبوع في سنة ثالث لكل المواد تكون 5 - 10 شيتات

لكن برابع.. 2-4 شيتات بس

كمية المنهج أقل.. وأغلبها حاجات اخدنا فكرة عنها من قبل
المنهج كتيير منه دراسة من الكتاب وخاصة الفيكسد
عشان كدع ممكن تقل عدد الشيتات

في مواد ما يعطوا شيتات ابدا.. لكن احنا عملنا تلخيصات وزاكرنا منها

وكمان عشان بناخد المادة الواحدة مره واحدة بالأسبوع بس !
يعني عندك اسبوع كامل تقدر تقرأ و تمخمخ المعلومات براسك الين المحاضرة اللي بعدها

غير العملي حقها بعدها على طول فيسهل مررره

من جهة المعلومات..
منهج رابع أصعب ومعلوماته متقدمة


الفرق الكبير يكون بالمزاكرة وكمييتها .. تقدر تقول 40 % أقل من سنة ثالث


~


يب كل شي حتجيبوه في العيادات ..
من الرابنق حق العيادة و الأدوات حقت التنضيف فيها .. والسماعات وأجهزة الضغط
وتقدروا تستلفوها من أصحابكم بالبشري أفضل من شرائها !

وجهاز الضغط لازم اللي يكون يدوي وممنوع استعمال الالكتروني
<< اذا طلبة ال بشري ما اشتروا الجهاز .. احنا نجي ونشتريه !!

لكن جبناه من صحباتنا في التمريض الحمدلله


وخلاص عودوا نفسكم على الصرف المحترم من جيبكم !
واذا احتجتوا تودوا شغلكم لمعامل خارجية.. عاد هادي ضربه ع الراس "^^


~


ومين قال ممنوعه !

نص الدفعة راحوا مستشفيات خارجية وخلصوا بسرعه بدل مرمطة المستشفى الجامعي !

عندك المركز الطبي عنده كل التطعيمات ..

لكن في تطعيمات غالية سعرها يوصل الـ 500 ريال .. أكيد خدوها من الجامعي "^^

بس أهم شي جيب ورقة التطعيمات وخلي الادارة الطبية تختملك عليها وخلاص يقبلوها


~


وأي استفسارات تانية اتفضل ولا يهمك =)

واذا حاب تنقل الموضوع لمنتداكم.. اتفضل وإن شاء الله الكل يستفيد منه
بس قلكم خليهم يجوا هنا وينورونا
ليهم وحشة البنات بالقسم هنا ^^

ويصير لو في أي استفسارات يجوا يشاركونا

[Glamor Mada]

ماشالله موضوع متكااامل ونايس .. بحفظه في المفضله عشان ارجعله السنه الجايه اذا ربي اعطاني عمر
صح اني لسا طالع سنه ثالثه بس عادي مو مشكله اشوف عشان اتحمس من بدري متحمس للشغل xD
الله يعدي سنه ثالثه على خير اول .. ويعيننا على اسئلة دكتور هشام
اممممم وشكلنا ما رح نستفيد من سنه ثانيه غير في الاناتومي حق الهد والنك في مادة Pain control و كمان من الدينتال اناتومي اكيد والباقي كله لا .. كفاية السنه التحضيريه ما استفدنا منها ولا اي شي وضاعت مننا سنه عالفااااضي >_<

ربي يوفقك في دراستك وحياتك وينورلك طريقك على قد ما بتساعدي غيرك ..