مدونة "شخص مختلف" ~

[the change]

لا إله إلا الله


قبل شويا أسمع صوت صراخ عالي جدا وقوي من الشباك

تجاهلت الصوت واستمريت اكتب في المدونة هنا

شويا تتعالى الاصوات أكثر واسمع صوت حرمه تصرخ

وشويا صوت رجال يصرخ .. هنا اتفجعت

فتحت الشباك مستغربة ايش فيه

إلا بالفعل صراخ بين اثنين وصراخ عالي جدا

الصوت ما كأنو في البيت اللي جنبنا

كانو جنبي ولا عندي في الغرفة !

خفت بالمره والله


ورحت عند أمي أقلها ترا فيه صوت صراخ من اول انتي سامعة ولا لا

قالت إلا يابنتي الصوت واصل لعندي الله يهديهم ويفرجهم عنهم

قلت ايش فيه ؟!

تقلي شكلو متزوج او بيتزوج عليها !

فاستغربت من كلامها قلت يعني عشان بين اثنين فقلتي يابيتزوج او متزوج عليها !!

قالت يابنتي في نفس صراخها بتقول : تتزوج عليا ؟


فخفت اكثر قلت اقلك ياماما انا سامعة صوت تكسير

قالت يابنتي خلاص روحي شكلو يضربها قلت كماااان ؟؟؟؟


وربي ياجماعة الصوت مو طبيعي لا اله الا الله

واللي نعرفه انو عندهم اطفال يعني حرام والله

انا هنا كبيرة واتفجعت وامي والبيت كلو منفجع .. هذه اصوات تعذيب

صوت صحون صوت اشياء تتكسر وابواب تتقفل وتنفتح يا إلهي !!

شكلو ضرب ودهس وصراخ والخ !!!




قلت لامي ترا لو استمر الوضع هذا حبلغ

ومنجد لو استمرت المهزلة هذه والضرب وقلة الدين لابلغ

ياربي الله لايبلانا , وماهمني فيهم لكن الاطفـــــــــــــــــال !!!

لاحووول ولا قوة إلا بالله

[the change]

وأول مرة أخاف خوف زي كذا , ولاول مرة في حياتي يتألم قلبي بهذه الطريقة


حسبنا الله ونعم الوكيل

[the change]

وسؤال وجيه يتبادر في ذهني الان : ماذنب الاطفال ؟!

- الاطفال بشكل عام في وجودهم بين أب وأم متخالفين متشاجرين ومشاكل وقضايا وصراخ ومؤامرات وزواج وطلاق وتشتت وتفرق وغضب وحزن


ماذنبهم ؟!

مامصيرهم ؟!



سؤال وجيه بالفعل , ومؤلم

الله يعين كل طفل وطفلة وجدوا وأتوا في ظروف "صعبة ليس لهم ذنب فيها " !!

[the change]

تسجيل خروووووج


النفسية اكتئبت يارب هونها !!!