.+| لـــــــ(13)ــــــدفعة الجديدة *_~ |+.

Abdullah Al-juhani · #1 18-06-2012, 03:48 PM

Abdullah Al-juhani · 18-06-2012, 03:51 PM

السلام عليكم ورحمة الله وبركاته

الحمدلله كما ينبغي لجلال وجهه وعظيم سلطانه
الموضوع كنت أبغى آخره إلا أن تظهر نتائج التسكين
لكن الوضع يمكن يآخذ وقت وأنا مستعجل مررة نقرتين لعرض الصورة في صفحة مستقلة

فهذه هي عصارة ما تعلمته من السنة التحضيرية

أتمنى أن أكون قد وفقت في طرحها نقرتين لعرض الصورة في صفحة مستقلة

Abdullah Al-juhani · 18-06-2012, 03:54 PM

[ الأحياء ]
مستوى الصعوبة: متوسطة
مدرس المادة: محمد ابراهيم أبو السعود.
مدرس زي العسل أسلوبه حلو أخلاق عالية .. يعطيك الزبدة دائماً .. يهتم بتوصيل المعلومة بذهنك قبل سردها
من عيوبه يعدي على الجزيئيات الطويلة بشكل مختصر فبعض الأحيان نتنح في وجهه ما نستوعب ايش يقول ^^"
رابط موقعه في الجامعة: لا يوجد
شرح المادة: الأحياء مادة تعبت دفعة 12 بدون إستثناء .. الأحياء معروف إنها مادة كثيفة من ناحية المنهج
وما يمشي معاها غير المذاكرة أول بأول .. لا بد تذاكر أول بأول لأنك لو راكمت المنهج على بعض حتضيع في الإختبارات
ولو تبغى تجيب الـ A+ .. أربعاء وخميس راجع اللي ذاكرته الأسبوع كامل =)
مصدر المذاكرة: المصدر الأساسي هو كتاب مقرر من الجامعة لكن ما يحتاج تشتروه
رئيس القسم د. نزار رضوان مسوي لنا سلايدات ( شرائح بوربوينت ) نذاكر منها
الإختبارت: إختبارات الأحياء ممكن ما تجي بالنص من السلايدات
ممكن تخرج من محتوى السلايدات فيسألك في شيء برا .. هل موجود في الكتاب الله أعلم ^^"
فممكن تصيب وممكن تخيب .. غالباً يجي سؤال سؤالين خارج السلايدات
^ معلومة في الأحياء اللي تختبر فيه ما ترجع له مرة ثانيه ^^"

[ الكيمياء ]
مستوى الصعوبة: متوسطة
مدرس المادة: مجدي يوسف عبدالعال
مع إحترامي لشخص الدكتور الكريم .. شرح سيء .. يفترض في شرحه انه كل الطلاب فاهمين الأساسيات
فما نفهم منه إلا القليل كمان في نقطة ما عجبتني فيه .. أنا من النوع اللي أكتب المحاضرة وأرجع أذاكرها في البيت
كتابته على السبورة كانت مشتتة مرة يعني ما يمسك السبورة بالترتيب :( .. ميزته الوحيدة ما يهتم بالغياب فما كنا نحضر غير 6 يمكن من الكلاس كله
رابط موقعه في الجامعة: http://mabdelaal.kau.edu.sa/Default....0052866&Lng=AR
شرح المادة: الكيمياء في السنة التحضيرية كلها نظري يعني كلها حسابات ومسائل .. كنت أستمتع بهذه المادة أحب الحسابات الكيميائية
بس للأسف لو كان فيه عملي أحلا ^^"
مصدر المذاكرة: الكتاب المقرر من الجامعة أو الكتاب الصغير ( Chemistry for Preparatory Year )
لكن الكتاب الصغير ما يكفي لحاله فيحتاج تدعم معلوماتك بمخلصات ، أشهرها: ملخصات السيد + ملخصات يوسف زويل
كمان في سلايدات حلوة كنت أذاكر منها للـ د. ليلى الحربي
أفضل دكتور للكيمياء هو د. ياسر العنقري
الإختبارت: إختبارت الكيمياء تلاقي فيها كل أنواع الأسئلة السهل والمتوسط والصعب .. طبعا الأسئلة الصعبة لابد منها وتحتاج واحد مذاكر صح وفاهم المنهج تمام لكن ماهي تعجيزية

[ الإحصاء ]
مستوى الصعوبة: متوسطة
مدرس المادة: حسن محمد السعيد عكاشة
شرحه متوسط يعني في الأجزاء النظرية كنت أشوفه كويس بس المسائل والقوانين لأ .. بعض الأحيان يوقف عند نقاط في المحاضرة
يكون ناسيها يمكن ولا مو فاهمها .. فيحك رأسه دقيقة ويرجع يكمل ^^" .. من مميزاته فلاوي شوية =)
رابط موقعه في الجامعة: http://www.kau.edu.sa/Default.aspx?S...0054856&Lng=AR
شرح المادة: الإحصاء مادة تحتاج فهم وتركيز أول ثلاث شباتر الجزء النظري أكثر من العملي عكس الشباتر اللي بعدهم
لا تستهينوا بهذه المادة لأنها ماهي داخلة في النسب الخاصة للكليات عشان لا تتعبوا في الإختبارات
مصدر المذاكرة: الكتاب المقرر من الجامعة ما يحتاج تشتروه
فيه سلايدات للإحصاء نذاكر منها والإختبار ما يخرج عنها
الملخصات في نظري ضرورية عشان نطبق على المسائل لأنه في السلايدات شرح ومثال واحد أو اثنين بالكثير تطبيقي وبس لازم أكثر
أشهر الملخصات لجمال السعدي
أفضل دكتور للإحصاء هو د. أحمد العم
الإختبارت: الإختبار الدوري الأول عادة يجي سهل لأنه زي ما قلت النظري فيه مآخذ جزء كبير
الدوري الثاني أصعب لأنه في مسائل أكثر وممكن تلاقوا أسئلة تحتاج واحد فاهم ومركز
النهائي متفاوت الصعوبة =)

Abdullah Al-juhani · 18-06-2012, 03:57 PM

[ الفيزياء ]
مستوى الصعوبة: متوسطة
مدرس المادة: ما أعرف < هذا الدكتور ما صرح بإسمه الكريم أبداً
طبعاً سألناه لكن يقولنا بعدين بعدين =( .. طبعاً شرح سيء .. يشرح من غير نفس .. طريقته: يدخل الكلاس يكتب مثالين ثلاثة يحل الأول وطبعاً يأخذ نص المحاضرة يحله
والنص الباقي نحل المثالين الباقية .. التحضير ما يهتم فيه إلا أحياناً فهذه ميزة في الدكاترة اللي ما يعرفوا يشرحوا ^^"
رابط موقعه في الجامعة: =(
شرح المادة: الفيزياء تتكلم عن الحركة وأشكالها وعن الإحتكاك وعن أشياء ثانية نسيتها ;d < بدري ^^"
تعتمد على الفهم أولاً بعدين على تطبيق المسائل .. الحفظ فيها غالباً في القوانين فقط ..
مصدر المذاكرة: إعتمادي فيها كان على مدرس خصوصي وكنت أذاكر من ملخصاته وبس ..
الإختبارت: إختبارات الفيزياء متوسطة الصعوبة ماهي صعبة ممكن يسألك في شيء مادرستوه نصاً لكن زي ما قلت إذا فاهم حتجاوب =)
^ على فكرة الفيزياء ممكن يكون ضروري إنك تستعين بمدرس خصوصي لأنه مو كل الدكاترة يشرحوها تمام

[ الرياضيات ]
مستوى الصعوبة: سهلة
مدرس المادة: حمزة علي سنوسي ابوجبل
من أفضل دكاترة الجامعة .. أسلوباً وأخلاقاً وشرحاً .. الله يسعده كان منسق المادة يعني اللي يسوي الإختبارات
بكل بساطة معتمد على مبدأ { إن الرفق لا يكون في شيء إلا زانه } < وكان كاتب في تويتر هذا الشيء
للأسف حالياً نقل من تدريس الرياضيات وسار وكيل الدراسات العليا في كلية الحاسبات فرع رابغ .. من جد هذا الإنسان خسارة كبيرة في حق طلاب التحضيري
رابط موقعه في الجامعة: http://habujabal.kau.edu.sa/Default....0000970&Lng=AR
شرح المادة: الرياضيات مافيها شيء جديد =) كلها معلومات أخذناها بالإنقليزي بدال العربي .. مع بعض المحاضرات اللي أول مرة ندرسها
لكنها بسيطة جداً .. الحل يأخذ وقت ممكن لكن كثير مسائل تنحل بالنظر ^^"
مصدر المذاكرة: على أيامنا البروف حمزة الله يوفقك فين ما كان مسوي لنا وورك شوب .. عبارة عن أوراق كلها مسائل مكررة لكن بأفكار جديدة
هذه كنا نذاكر منها وندخل الإختبار وبسس ^^" طبعاً تحتاج تذاكرها أسبوعياً عشان لا تتراكم عليك الأوراق
الإختبارت: عسل على عسل =) ما تخرج من أفكار الوورك شوب أبداً أبدأ

[ مهارات الإتصال ]
مستوى الصعوبة: سهلة
مدرس المادة: ماجد عبدالله حامد الحارثي
دكتور خلوق وحبوب ومحترم .. يهتم جداً بالتحضير
رابط موقعه في الجامعة: http://malharthy.kau.edu.sa/Default....0008334&Lng=AR
شرح المادة: المادة هذه تأخذوا فيها الـ 100 بسهولة ما كنت أذاكر إلا الإختبارات بس
محاضرات المادة حلوة تكسبك ثقتك بنفسك وكيف تتعامل مع الناس وأشياء حلوة
مملة وقت المذاكرة عشان كلامها كثير ^^
مصدر المذاكرة: الكتاب المقرر من الجامعة وحتعرفوه مع بداية الدراسة إن شاء الله =) وتلاقوه في مكتبة الخوارزم بالجامعة ...
الإختبارت: أحلا شيء في إختباراتها إنها إلكترونية يعني على أجهزة حاسب بسيطة مرة بس تحتاج تكون قارئ المنهج بتركيز
^ في هذه المادة حطلبوا منكم تكاليف تسووها وعليها درجات يعني مثلاً كتابة رسالة أو خطاب وكمان إلقاء عن موضوع معين وهكذا ...

[ مهارات الحاسب الآلي ]
مستوى الصعوبة: سهلة
مدرس المادة: عادل باحداد
أستاذ كويس في شرحه ما يقصر
رابط موقعه في الجامعة: مافييش
شرح المادة: أول شابتر في المادة نظري سهل بس تحفظه
بعد كذا حتاخذه الأجزاء العملية زي الوورد والإكسل والأكسس والبوربوينت والآوتلوك ...
وكمان آخر شابتر يتكلم عن تقنية المعلومات أعتقد والإنترنت ^^
مصدر المذاكرة: الكتاب المقرر من الجامعة وكمان موجود بالخوارزم
الإختبارت: إختبارين عملية وإخبارين نظرية وإختبار نهائي نظري فقط .. طبعاً اللي تدرسوه في العملي ممكن يجيك منه في الإختبارات النظرية طبيعي جداً ^^
الإختبارات زي مهارات الإتصال على الحاسب الآلي =)
^ في الحاسب اللي تختبروا فيه ما ترجعوا له ثاني ^^"

[ أخيراً وليس آخراً الإنقليزي ]
مادة سهلة أغلب الأشياء أخذناها في الثانوي لكن حتاخذوها بتوسع أكثر
دوامها يطفش أربعة ساعات يومياً .. مملة جداً جداً الله يعينكم عليها
طبعاً الكتاب تشتروه من الخوارزم ...

Abdullah Al-juhani · 18-06-2012, 03:59 PM

أغلب الملخصات المذكورة في الموضوع وبعض الكتب يمكن ^^ تلاقوها في هذا القسم الجميل
http://www.skaau.com/vb/forumdisplay.php?f=85

في النهاية لا توفيق إلا بيد الله سبحانه وتعالى
أولاً وآخيراً توكل الله فهو خير معين لك

أتمنى أن أكون وفقت في شرح تجربتي للسنة التحضيرية
وأهدي هذا الموضوع لكل من وقف معنا من الدفعات السابقة وعلى رأسهم دفعة [ 11 ]
الله يوفقهم في حياتهم الدراسية والعملية مستقبلاً
هذا الموضوع لكم .. فلم أصل لهذا المستوى إلا بعد توفيق الله ثم بنصائحكم الذهبية

دفعة [ 13 ] الجدد أماكم طريق طويل والسنة التحضيرية أولى محطاته وأهمها
الله يوفقكم =)

والصلاة والسلام على أشرف الأنبياء والمرسلين